Posibleng abutin pa ng higit isang buwan bago tuluyang makilala ang lahat ng bangkay sa nasunog na NCCC mall sa Davao City.
Ayon kay Regional Crime 11 Medico Legal Director Police Chief Inspector Nolan Genova, ito ay dahil sobrang nasunog na ang buto at bungo ng marami sa mga bangkay na mas nagpahirap pa sa proseso ng pagkilala sa mga ito.
Sa ngayon, lima mula sa tatlumpu’t pitong (37) mga bangkay ang nakilala na ng kanilang mga kaanak batay na rin sa kanilang suot na damit at nakuhang kagamitan.
Kaugnay nito, umapela si Davao City Mayor Sara Duterte- Carpio ng pang unawa sa pamilya ng nasawi na ipaubaya muna sa mga otoridad ang bangkay upang maisailalim sa DNA testing.
Pansamantalang ililibing ang mga ito at lalagyan ng tag upang madaling makuha ng mga pamilya kapag lumabas na ang DNA result.
