Iginiit ng Kilusang Bayan Kontra Kurakot (KBKK) na layunin ng malawakang kilos-protesta sa Nobyembre 30 sa Luneta at EDSA na kalampagin ang pamahalaan na magsagawa ng mas maraming aksyon at reporma upang maprotektahan ang kaban ng bayan, sa gitna ng imbestigasyon sa maanomalyang flood control projects.
Pinuri naman ng mga organizer ng kilos-protesta ang mga Pilipino dahil sa pakikibahagi sa tuloy-tuloy na mga pagkilos at panawagan para sa katotohanan at pananagutan, matapos ang malalaking rally noong Setyembre 1.
Bukod dito, sinabi ng KBKK na hihiling sila ng mas malawak, independent, at mas bukas sa publiko na imbestigasyon tungkol sa mga iregularidad sa flood control.
Dagdag pa ng mga organizer, dapat sumailalim sa masusi, mabilis, at transparent na imbestigasyon ang lahat ng mga isinasangkot na personalidad sa kontrobersya, kabilang na ang mga opisyal ng Department of Public Works and Highways, Budget and Management; mga kontratista; at district engineers.
Binigyang-diin ng KBKK na ang lahat ng may sala sa mga maanomalyang flood control project ay hindi lamang dapat magbitiw sa posisyon kundi dapat managot din ang mga ito.
