Pinaigting pa ng Philippine National Police ang paghahanda para sa nalalapit na ikalawang bugso ng Trillion Peso March sa Nobyembre a-trenta.
Ayon kay PNP acting chief Lt. Gen. Jose Melencio Nartatez Jr., mayroon silang sapat na tauhan at kagamitan para matiyak ang kaayusan at kaligtasan ng lahat ng lalahok sa nasabing pagkilos, kasabay na rin ng kanilang pakikipag-ugnayan sa mga local government unit.
Dagdag pa ni Lt. Gen. Nartatez, naglagay na sila ng checkpoints, rapid response teams, at mas pinaigting din ang koordinasyon kasama ang emergency services.
Kabilang sa mga inaasahang banta sa naturang malawakang kilos-protesta ay ang siksikan ng mga tao, aksidente sa kalsada, at ilang insidente ng paglabag sa batas, tulad ng karahasan na naganap sa Ayala Bridge noong Setyembre a-bente uno.
