Nakarating na sa bansa ang 135,618 metrikong tonelada ng asukal mula sa 150,000 metric tons ng imported sugar allocation.
Ayon kay Sugar Regulatory Administration (SRA) Board Member at Planters Rep. Pablo Luis Azcona, sa ilalim ng Sugar Order no. 2, ilalaan sa industrial users ang nasa 75,000 metric tons ng imported sugar na ginagamit ng mga softdrinks manufacturers.
Ang natitira naman na 75,000 metric tons din ng asukal ay para naman sa sweetener na mapupunta sa mga wet market.
Sinabi ng SRA na papayagan nila ang 70,717 metric tons ng asukal na nakatakdang ilaan para sa mga mamimili habang nasa 64,901.7 metric tons naman ang ilalaan para sa industrial use.
Layunin nito na masiguro ang matatag na suplay ng asukal sa domestic market at masiguro ang mababang presyo nito sa merkado.
Batay sa monitoring ng Department of Agriculture (DA), ang retail price ng refined sugar ay naglalaro sa P95 hanggang P105 kada kilo; washed sugar na nasa P80 hanggang P95 kada kilo; habang ang brown sugar naman ay nagkakahalaga ng P80 hanggang P90 kada kilo.