Iginiit ni Bicol Saro Party-list Rep. Terry Ridon na may mga accountability measures na ipinatutupad ang Kamara kahit nananatiling nasa labas ng bansa si Ako Bicol Party-list Rep. Elizaldy Co.
Ito’y kaugnay ng mga alegasyong ibinabato laban sa kongresista sa maanomalyang flood control projects.
Ayon kay Ridon, kabilang dito ang pagbawi ni House Speaker Faustino Dy III sa travel clearance ni Co, kung saan dalawa na lamang ang natitirang araw mula sa 10-day period para makabalik siya sa bansa.
Dagdag pa rito ang ethics complaint na isinampa ni Navotas Rep. Toby Tiangco laban sa mambabatas.
Nang tanungin naman hinggil sa posibleng extradition kay Co, nilinaw ni Ridon na nasa hurisdiksyon na ng ehekutibo ang naturang hakbang.
Nabatid na sinuspinde ng House Infra-Com ang imbestigasyon upang bigyang-daan ang isinasagawang inquiry ng Independent Committee for Infrastructure.
—sa panulat ni John Riz Calata
