Mariing itinanggi ni Executive Secretary Lucas Bersamin ang pagkakadawit ng kanyang tanggapan sa usapin ng kickback sa mga flood control project.
Iginiit ni Bersamin na hindi kasama ang Office of the Executive Secretary sa anumang proseso ng budgetary allocations na may kaugnayan sa Department of Public Works and Highways.
Wala rin aniyang anumang pakikipag-ugnayan ang O.E.S. kay dating DPWH Undersecretary Roberto Bernardo o kay DepEd Usec. Trygve Olaivar, na kapwa itinanggi rin ang alegasyon ng dating opisyal.
Nanindigan si Bersamin na nananatiling malinis ang kanyang record bilang public servant — mula sa pagiging judicial officer hanggang sa kanyang kasalukuyang tungkulin.
Nabatid na sa sinumpaang salaysay ni Bernardo sa Senate Blue Ribbon Committee, mayroong 15 percent na commitment na sinasabing nakalaan para sa tanggapan ng Executive Secretary noong 2024.
—sa panulat ni John Riz Calata
