Inalarma ng isang wildlife volunteer sa Cagayan ang mga awtoridad matapos matagpuan ang tuka at paa na lang ng isang northern rufous hornbill o kalaw sa isang gubat sa Lasam, Cagayan.
Ayon sa volunteer, binaril ang kalaw gamit ang airgun ng isang residente sa gubat sa Barangay Sicalao. Pinatay umano ang ibon malapit sa sapa at niluto para kainin.
Itinuturing na “endangered” ng DENR-Biodiversity Management Bureau ang northern rufous hornbill. Kilala ito sa malaking pulang tuka at casque (kask). Ang matatandang kalaw ay may matingkad na kulay, habang mas maitim ang beak o tuka ng mga mas bata.
Ipinagbabawal sa Wildlife Conservation Act o RA 9147 ang panghuhuli, pagpatay, o pagbebenta ng endangered species.
Hinimok ng mga awtoridad ang publiko na mag-report ng wildlife hunting para maprotektahan ang natitirang populasyon ng kalaw sa mga kagubatan ng Northern Luzon.
