NEWS

Muling magbabahagi ang pamahalaan ng cash assistance para sa mahigit pitong milyong kabahayan bilang pagtugon sa pagtaas ng presyo ng langis dulot ng tensyon sa gitnang silangan.

Ito ang kinumpirma ni Pangulong Ferdinand Marcos Junior sa paglulunsad ng Uplift Assistance Program kung saan nasa tatlompu’t-pitong milyong pilipino ang inaasahang makikinabang sa ayuda.

Sa ilalim ng naturang programa, mahigit isang milyong low-income earner na verified ng SSS o Social Security System ang makatatanggap ng dalawang libong piso kada buwan mula Hulyo hanggang Disyembre o kabuuang labingdalawang libong piso sa loob ng anim na buwan.

Samantala, mahigit tatlong milyong beneficiary naman ng 4-Ps o Pantawid Pamilyang Pilipino Program at Walang Gutom Program ang makatatanggap ng dalawang libong pisong one-time cash grant.

Pangungunahan ng DSWD o Department of Social Welfare and Development ang pamamahagi ng ayuda sa pamamagitan ng digital banks.   | mula sa panulat ni Reianne Antiquina

Target ng House Prosecution Panel na tapusin ang impeachment trial laban kay Vice President Sara Duterte bago sumapit ang pasko.

Ito ayon kay House Lead Prosecutor Gerville Luistro matapos bawasan ng prosekusyon ang mga testigong ihaharap sana para sa Article Four o grave threats.

Aniya, pag-aaralan na lamang nila ang pagdagdag ng testigo kung kinakailangan batay sa magiging testimonya ng mga susunod na witness.

Gayunman, ayon kay House Prosecutor Lorenz Defensor, posibleng umabot sa Valentine’s Day ang paglilitis kung patuloy na hahabaan ng kampo ng Bise Presidente ang proseso sa pamamagitan ng teknikalidad.  | mula sa panulat ni Reianne Antiquina

Kinumpirma ni NBI Director Melvin Matibag na hindi na siya dadalo sa Regional Summit sa Bangkok, Thailand para tumestigo sa impeachment trial laban kay Vice President Sara Duterte sa Martes, Hulyo a-bente-uno.

Nakatakda sanang lumipad patungong Thailand si Dir. Matibag sa Lunes, Hulyo a-bente para sa dalawang araw na Transnational Crime Summit na pinamumunuan ng Federal Bureau of Investigation o FBI at ng Royal Thai Police.

Sa halip, magpapadala na lamang ng kinatawan ang NBI para dumalo sa naturang pagpupulong.

Una rito, kinumpirma ng House Prosecution na si Dir. Matibag ang huling testigo na ihaharap nila kaugnay ng Article 4 ng impeachment complaint kung saan inaasahan na ilalatag nito ang kabuuang detalye ng imbestigasyon sa pagbabanta ng Bise Presidente laban sa first family.  | mula sa panulat ni Reianne Antiquina

Namumuro nanaman ang malakihang dagdag-presyo sa produktong petrolyo sa susunod na linggo.

Batay sa tatlong araw na pagtataya sa Mean of Platts Singapore o MOPS, inaasahang sisirit sa siyam hanggang sampung piso ang kada litro ng diesel, habang mahigit onse pesos trenta sentimos naman sa kerosene o gaas.

Nagbabadya ring tumaas ng tres pesos, singkwenta sentimos hanggang kwatro pesos, singkwenta sentimos ang kada litro ng gasolina.

Ayon kay Jetti Petroleum President Leo Bellas, dulot ito ng panibagong gulo sa gitnang silangan.

Samantala, ayon kay Department Of Energy – Oil Industry Management Bureau Director Rino Abad, nakatakda silang magpulong ngayong araw para talakayin ang pagpapatupad ng mas mahigpit na fuel pricing measures. | mula sa panulat ni Reianne Antiquina

Bahagyang tataas ang transmission charge sa electricity bills ngayong hulyo para sa mga consumer sa Luzon, Visayas, at Mindanao.

Ayon sa National Grid Corporation of the Philippines, umakyat ng 0.77 percent ang average transmission rate sa 1 peso 46 centavos kada kilowatt-hour mula sa 1 peso 44 centavos nitong Hunyo.

Ang pagtaas anila ng ancillary service rates o bayad sa mga power generator na tumutulong sa pagpapanatili ng balanse ng suplay at demand ng kuryente ang dahilan ng pagtaas ng transmission charge ngayong july billing.

Nilinaw naman ng NGCP na wala silang kinikita mula sa ancillary service charges dahil ang mga ito ay direktang ibinabayad sa mga power generator at sa Independent Electricity Market Operator of the Philippines.

Samantala, bumaba naman ang transmission wheeling rate o bayad sa paghahatid ng kuryente sa transmission grid noong Hunyo.

Rerepasuhin na ng Department of Energy at Energy Regulatory Commission ang mga polisiya ng distribution utilities kasunod ng dumaraming reklamo sa mataas na singil sa kuryente.

Ito’y kasabay ng planong imbestigasyon ng senado sa isyu ng “Bill shock” at umano’y hindi malinaw na sistema ng paniningil.

Ayon kay Energy Secretary Sharon Garin, suportado ng DOE ang isasagawang legislative inquiry upang matukoy ang ugat ng patuloy na pagtaas ng singil sa kuryente.

Kabilang sa sisiyasatin ang mga reklamo laban sa Meralco hinggil sa umano’y hindi malinaw na billing at maling meter reading.

Pinag-aaralan na rin ng DOE at ERC ang pagrepaso sa umiiral na regulatory framework upang mapabuti ang serbisyo at mas maprotektahan ang kapakanan ng mga consumer ng kuryente.

Bumuo na ang National Bureau of Investigation ng isang special task force upang imbestigahan ang umano’y mga iregularidad sa ilang infrastructure projects at transaksyon kaugnay sa 2019 Southeast Asian Games.

Ayon kay NBI Director Melvin Matibag, hawak na nila ang sapat na dokumento para sa pormal na imbestigasyon, partikular sa Philippine Southeast Asian Games organizing committee na dating pinamunuan ni Senador Alan Peter Cayetano.

Kabilang sa sisilipin ng NBI ang sinasabing kawalan ng public bidding sa ilang proyekto, hindi pa nali-liquidate na pondo, at ang kontrobersyal noon na 50-million pesos 2019 Sea Games Cauldron Project.

Tiniyak ni Director Matibag na makikipag-ugnayan ang kanilang task force sa Commission on Audit, Securities and Exchange Commission, at Bases Conversion and Development Authority para sa masusing imbestigasyon.

Nilinaw ni Matibag na wala pang pormal na respondents sa kaso, pero nagsimula na ang pagtukoy sa mga posibleng personalidad na may kaugnayan sa sinasabing iregulidad sa 2019 Sea Games.