NEWS

Handa si dating House Speaker at ngayo’y Leyte 1st District Rep. Martin Romualdez na harapin ang paunang imbestigasyon ng Office of the Ombudsman kaugnay sa maanomalyang flood control projects.

Ayon kay Congressman Romualdez, sasagutin niya ang lahat ng alegasyon laban sa kanya kasabay ng paggigiit na dapat patas at naaayon sa due process ang imbestigasyon.

Samantala, kinuwestyon din ng dating House Speaker ang patuloy na paggamit ng Ombudsman sa mga testigong nahaharap  na sa mga kasong cyberlibel at perjury kaugnay sa imbestigasyon sa flood control scandal.

Iginiit ng mambabatas na hindi makatarungan ang paggamit sa labing-walong maleta boys bilang testigo dahil na-discredit na anya ang mga ito sa publiko at nasampahan pa ng kaso ng Department of Justice noong nakaraang linggo. l mula sa panulat ni Jordan Gutierrez

Nakumpiska ang isang caliber thirty-eight revolver mula sa isang estudyante sa isinagawang routine inspection sa Pulang Bato Elementary School sa Biliran, Leyte.

Ibinigay ang estudyante sa kanyang mga magulang upang sumailalim sa diversion proceedings alinsunod sa Juvenile Justice and Welfare Act matapos ang isinagawang interbensiyon ng Municipal Social Welfare and Development Office ng Almeria.

Sa ngayon, iniimbestigahan pa ng mga otoridad kung paano nakuha ng menor de edad ang baril.

Isinailalim naman sa kustodiya ang isa pang estudyante matapos mahuling nagpupuslit ng baril sa isang paaralan sa Isabela City, Basilan.

Nagsagawa ng safety protocols ang mga otoridad matapos magbanta umano ang kinse anyos na nakatatandang kapatid ng nahuling estudyante sa principal at mga guro ng paaralan.

Batay sa imbestigasyon ng pulisya, iniulat ng rehistradong may-ari ng baril na ito ay ninakaw matapos niyang iwan ang kanyang sasakyan sa isang car wash station.  l mula sa panulat ni Reianne Antiquina

Tatalakayin pa ng senado sa darating na Miyerkules ang hirit nina Senators Rodante Marcoleta at Jinggoy Estrada na makalahok sa Impeachment Trial ni Vice President Sara Duterte.

Ayon kay Senador Erwin Tulfo, wala siyang nakikitang dahilan kung bakit hindi papayagang makalahok sa paglilitis ang mga kapwa senador dahil hindi pa naman napatutunayang may kasalanan ang mga ito.

Gayunman, nilinaw ng mambabatas na desisyon pa rin ng korte ang kung padadaluhin ang dalawang senador.

Binigyang-diin ni Senador Tulfo na kailangang magkaroon ng pagkakaisa ang mayorya at minorya ng senado bago magpasya sa usapin.   l mula sa panulat ni Reianne Antiquina

Arestado ang isang High-Value Individual (HVI) na kinikilalang alyas “Riyo,” matapos makumpiska ng mga awtoridad ang tinatayang ₱3.4 milyong halaga ng hinihinalang shabu sa isinagawang buy-bust operation sa Cagayan de Oro City noong gabi ng Hulyo 27, 2026.

Isinagawa ang operasyon sa pangunguna ng Regional Police Drug Enforcement Unit (RPDEU) Team 2, katuwang ang Police Station 2 ng Cagayan de Oro City Police Office, Regional Anti-Illegal Drugs Unit 10, City Mobile Force Company, Philippine Drug Enforcement Group Special Operations Unit 10, at Regional Intelligence Unit 10.

Bukod sa pagkakaaresto ng suspek, nakatakas naman ang isa pa nitong kasamahan na patuloy na pinaghahanap ng mga awtoridad.

Patuloy na iniimbestigahan ng pulisya ang insidente upang matukoy ang pinagmulan ng mga nakumpiskang ilegal na droga at matunton ang iba pang posibleng sangkot sa operasyon ng ipinagbabawal na gamot sa lugar.

Naghain ng ethics complaint ang mga grupong Every Woman at Tindig Pilipinas laban kay Senador Pia Cayetano kaugnay ng “Spliced” video ni House Prosecutor Chel Diokno hinggil sa financial records ni Vice President Sara Duterte.

Naniniwala ang Tindig Pilipinas na dapat imbestigahan at patawan ng disciplinary sanctions si Senador Cayetano dahil sa paglabag sa Code of Professional Responsibility and Accountability.

Dagdag pa ni Joanna Caumerman ng Every Woman, hindi angkop ang naging aksyon ng mambabatas lalo’t tumatayo ito bilang senator-judge ng impeachment court.  l mula sa panulat ni Reianne Antiquina

Pinabulaanan ni Vice President Sara Duterte ang kumakalat na balitang palalayain na sa susunod na linggo ang kanyang ama na si Dating Pangulong Rodrigo Duterte.

Ayon kay VP Sara, nananatili ang dating pangulo sa kustodiya ng International Criminal Court sa The Hague, The Netherlands.

Samantala, nakatakdang simulan ang paglilitis kay Dating Pangulong Duterte sa Nobyembre a-trenta para sa kasong Crimes Against Humanity.  l mula sa panulat ni Reianne Antiquina

Arestado ang isang Grade 12 student ng San Felipe Integrated School sa Llanera, Nueva Ecija matapos umano itong mag-post ng bomb threat sa kaniyang Facebook account noong umaga ng Hulyo 27, 2026.

Kasalukuyang nakapiit ang estudyante sa Llanera Police Station at nahaharap sa kasong paglabag sa Presidential Decree No. 1727 o Malicious Dissemination of False Information kaugnay ng Republic Act No. 10175, o ang Cybercrime Prevention Act of 2012.

Sa imbestigasyon, inamin ng estudyante na biro lamang ang naturang post at ginawa niya ito sa layuning makansela ang klase.

Ayon kay PCOL Ritchie R. Claravall, Provincial Director ng Nueva Ecija Police Provincial Office, agad namang umaksyon ang Llanera Municipal Police Station  matapos makatanggap ng ulat hinggil sa social media post na may kaugnayan sa umano’y banta ng pagpapasabog upang masiguro ang kaligtasan.  | mula sa panulat ni LJ Torrefiel