NEWS

Sinimulan na ng House Committee on Ways and Means ang pagtalakay sa mga panukalang batas na naglalayong itaas ang halaga ng taunang suweldo na hindi na papatawan ng income tax.

Ayon kay House Committee on Ways and Means Chairperson at Marikina Rep. Miro Quimbo, ito’y bilang suporta sa panawagan ni Pangulong Ferdinand Marcos Jr. sa kanyang SONA na itaas sa P350,000 ang tax-exemption ng annual taxable income.

Sinabi ni Quimbo na batay sa datos ng Labor Force Survey, tinatayang 4.2 million manggagawang Pilipino ang direktang makikinabang sa panukala dahil hindi na sila papatawan ng buwis sa kanilang suweldo sa ilalim ng bagong threshold.

Binigyang-diin ng mambabatas na nararapat lamang na mapagaan ang pasanin ng mga lower at middle-income workers na patuloy na naaapektuhan ng pagtaas ng presyo ng mga bilihin.

Aniya, ang mga manggagawang ito ang sandigan ng ating ekonomiya dahil sa tapat na pagbabayad ng buwis mula sa kanilang kinikita, ngunit madalas ay hindi sila ang pangunahing nakikinabang sa mga umiiral na programa at polisiya ng pamahalaan. | mula sa panulat ni Geli Mendez

Magsusumite ang Land Transportation Franchising and Regulatory Board ng rekomendasyon sa Department of Transportation para sa pansamantalang dagdag-pasahe sa lahat ng public utility vehicles habang nagpapatuloy ang pagdinig sa mga petisyon para sa fare hike.

Ayon kay L.T.F.R.B. Chairman Vigor Mendoza, kasalukuyang bine-verify ng ahensya ang datos na iniharap ng mga transport group para matukoy ang nararapat na provisional fare increase batay sa bilang ng mga pasahero at aktuwal na kita ng mga driver.

Isinumite na rin aniya ng L.T.F.R.B. sa Malacañang ang panukalang 20-pesos kada litrong fuel subsidy para sa lahat ng mga P.U.V. sa loob ng isang buwan, na mangangailangan ng nasa 4.5 billion pesos na pondo.

Nilinaw din ni Chairman Mendoza na pitong porsyento na lamang ng kasalukuyang pondo para sa 10-pesos kada litrong fuel subsidy ang natitira at inaasahang tatagal lamang hanggang Agosto a-kinse, kaya inaasahan ang agarang desisyon ng pamahalaan ngayong linggo. | mula sa panulat ni Jordan Gutierrez

Inihayag ni House Speaker Faustino Dy III na ang participatory governance model ng Isabela ang nagsilbing inspirasyon sa paglulunsad ng pambansang programang LegisHear ng Kamara.

Ayon kay Speaker Dy, bilang isang dating gobernador ng Isabela napatunayan niya na mas nagiging epektibo ang pamamahala kapag direktang napakikinggan ang boses ng mamamayan.

Ibinahagi niya na ang matagumpay na Farmers’ Congress sa lalawigan, kung saan regular na nililibot ng mga opisyal ang 36 na bayan at mga barangay upang pakinggan ang mga magsasaka at komunidad, na nagpakita sa kaniya kung gaano kahalaga ang grassroots engagement.

Ayon kay Dy, dahil sa positibong resulta ng programa, minabuti ng pamunuan ng Kamara na gawing pormal at regular na mekanismo ang pagsasagawa ng mga pambansang konsultasyon.

Binigyang-diin pa ng lider ng Kamara na layunin ng LegisHear na matiyak na ang mga batas na binabalangkas at ipinapasa ng Kongreso ay nakabatay sa tunay na pangangailangan ng mamamayan at makatutulong sa pag-angat ng kabuhayan ng bawat pamilyang Pilipino. | mula sa panulat ni Geli Mendez

Tanging si Vice President Sara Duterte lamang ang nag-iisang bise presidente at kalihim ng Department of Education na nagkaroon ng confidential funds.

Ito ang isiniwalat ni dating Commission on Audit Intelligence and Confidential Funds Audit Office State Auditor Roderick Wamil sa paglilitis ng Senate Impeachment Court kahapon.

Dagdag pa ni Wamil, sa kanyang panunungkulan sa ICFAO mula Setyembre 2014 hanggang Pebrero 2024, nakapagsagawa ng operasyon sina dating Bise Presidente Jejomar Binay at Leni Robredo nang walang confidential funds.

Anya, si V.P. Sara rin ang kauna-unahang DepEd secretary na nagkaroon ng confidential funds at iginiit na walang ganitong pondo ang mga naunang kalihim na sina Armin Luistro at Leonor Briones.

Batay sa ulat, umabot sa limangdaang milyong piso ang confidential funds ng Office of the Vice President mula sa ika-apat na quarter ng 2022 hanggang ikatlong quarter ng 2023, habang mahigit isandaan labindalawang milyong piso naman ang confidential funds ng DepEd sa unang tatlong quarters ng 2023. | mula sa panulat ni Reianne Antiquina