NEWS

Kinondena ni Defense Secretary Gilbert Teodoro ang social media post ng China Daily na nagpakita sa mga Pilipino bilang mga unggoy habang kinukuwestyon ang 2016 Arbitral Ruling na pumabor sa Pilipinas sa usapin ng West Philippine Sea.

Ayon kay Secretary Teodoro, ipinakikita ng naturang propaganda video ang pagtingin ng China sa mga Pilipino at nilalait nito ang Arbitral Award habang isinusulong ang karahasan laban sa mga Pilipino.

Iginiit din ng kalihim na tama lamang ang polisiya ng Pilipinas na iwasan ang ministerial at defense engagements sa Chinese Communist Party at mga ahensya nito.

Samantala, inihayag ni Philippine Coast Guard Spokesperson for West Philippine Sea Concerns Rear Admiral Jay Tarriela na walang puwang ang pagiging rasist sa kasalukuyang panahon at mariing kinondena ang anumang pagtatangkang maliitin ang mga pilipino.

Inilabas ang nasabing kontrobersyal na post nitong July 10, ilang araw bago ang ika-sampung anibersaryo ng 2016 Arbitral Ruling na kumilala sa exclusive economic zone ng Pilipinas sa West Philippine Sea. | mula sa panulat ni Jordan Gutierrez

Nanawagan ang mga eksperto, mambabatas, at youth leaders kay Pangulong Ferdinand Marcos Junior na gawing prayoridad ang kalusugan ng kabataan sa nalalapit na state of the nation address sa pamamagitan ng pagpapataas ng sin taxes sa sigarilyo at iba pang hindi masustansyang produkto.

Sa isang pulong-balitaan sa Quezon City, iginiit ni Professor Cielo Magno na dapat taasan ang umiiral na sin taxes upang madagdagan ang pondo ng philhealth at higit na mahikayat ang publiko, lalo na ang kabataan, na umiwas sa paggamit ng sigarilyo.

Ayon kay Professor Magno, humina na ang epekto ng kasalukuyang sin tax dahil sa patuloy na pagtaas ng paggamit ng tobacco at alak kasabay ng inflation.

Binigyang-diin ng propesor na kailangan nang iakma ang mga buwis upang manatiling epektibo ang mga ito sa pagpigil sa bisyo at pagsuporta sa mga programang pangkalusugan. | mula sa panulat ni Jordan Gutierrez

Posibleng umabot hanggang unang quarter ng 2027 ang impeachment trial ni Vice President Sara Duterte kung hindi mababawasan ang bilang ng mga testigong ihaharap ng prosekusyon at depensa.

Ayon kay Senate Impeachment Court Spokesperson Atty. Reginald Tongol, bagaman nakasaad sa pre-trial order ang 90 trial days, maaari pa itong humaba habang dinidinig ang iba’t ibang usapin, kabilang ang pagpapalabas ng mga subpoena.

Nasa magkabilang panig anya ang pagpapasya kung magbabawas sila ng mga testigo at hindi ito maaaring idikta ng korte.

Samantala, inihayag ni Senate President Sherwin Gatchalian na batay sa kanyang pagtataya, maaaring umabot sa 102 hearing days ang buong paglilitis.

Sa panig naman ng prosekusyon, sinabi ni House Lead Prosecutor Gerville Luistro na hangad nilang matapos ang impeachment trial bago sumapit ang pasko.

Gayunman, aminado ang prosekusyon na patuloy pa rin nilang nirerepaso ang listahan ng mga testigo at maaari pa anyang mabawasan o madagdagan depende sa magiging takbo ng paglilitis. | mula sa panulat ni Jordan Gutierrez

Mas simple at mas mababa ang gastos sa paghahanda ng KAMARA para sa SONA o State of the Nation Address ni Pangulong Ferdinand Marcos Junior sa Hulyo a-bente syete.

Ayon kay House Sergeant-at-Arms Ferdinand Melchor Dela Cruz, binawasan na nila ang mga paghahanda at gastusin kumpara sa mga nakaraang taon bilang bahagi ng pagtitipid sa gitna ng kasalukuyang krisis.

Nilinaw naman ni House Secretary General Cheloy Garafil na nagkaisa ang kamara at malacañang na gawing simple ngunit marangal ang sona, alinsunod sa direktiba ni House Speaker Faustino “Bojie” Dy III.

Wala rin anyang ilalatag na red carpet ngayong taon, habang hinikayat din ang mga babaeng mambabatas at panauhin na magsuot lamang ng simpleng filipiniana sa halip na mga  magarbong kasuotan.  | mula sa panulat ni Jordan Gutierrez

Ganap na bagyo na ang isang low pressure area na binabantayan sa labas ng Philippine Area of Responsibility.

Ayon sa PAGASA, hindi pa inaasahang makaaapekto ang naturang sama ng panahon sa bansa sa loob ng susunod na dalawa hanggang tatlong araw.

Batay sa pinakahuling monitoring ng PAGASA, namataan ang bagyo sa layong dalawang libo siyam na raan walompung kilometro silangan ng Southeastern Mindanao.

Taglay nito ang lakas na apatnapu’t-limang kilometro kada oras, at pagbugsong dalawampung kilometro kada oras.

Kumikilos ito pa-kanluran hilagang kanluran sa bilis na dalawampung kilometro kada oras.   | mula sa panulat ni Reianne Antiquina

Tiniyak ng Philippine National Police na patuloy nitong paiigtingin ang seguridad ng mga motorcycle taxi rider kasunod ng ilang insidente ng karahasan.

Ayon sa PNP Nahuli na ang mga suspek sa mga insidente sa pamamagitan ng mabilis aksyon ng otoridad.

Bukod dito, nakikipag-ugnayan na rin ang PNP Sa mga motorcycle ride-hailing companies, lokal na pamahalaan, at iba pang kaukulang ahensya upang mapalakas ang mga hakbang para matiyak ang kaligtasan ng mga rider, pasahero, at publiko.

Hinimok din ng ahensya ang publiko na agad i-ulat sa mga otoridad ang anumang kahina-hinalang indibidwal o aktibidad.   | mula sa panulat ni Reianne Antiquina

Iginiit ng Korte Suprema na mas mabigat ang parusa na maaaring ipataw sa sinumang gumawa ng psychological violence gamit ang social media at iba pang uri ng information and communications technology.

Binigyang-diin ng hukuman sa ilalim ng section six ng Republic Act number 10175 o Cybercrime Prevention Act of 2012, mas mataas ng isang degree ang inirerekomendang hatol ng Revised Penal Code.

Dagdag pa ng Korte Suprema, hindi hadlang ang paggamit ng social media upang makaiwas sa pananagutan.   | mula sa panulat ni Reianne Antiquina

Binura na ng Jinan University ang kontrobersiyal na pag-aaral na nagsasabing bahagi ng China ang Batanes.

Ayon sa Maritime Monitoring Group na SeaLight, binura ng unibersidad ang naturang report nang walang paliwanag o pagwawasto sa pahayag.

Gayunman, available pa rin anya ang nasabing artikulo sa ilang chinese-linked platforms tulad ng National Institute for South China Sea Studies.

Iginiit din ng SeaLight na hindi kinontra o inendorso ng Beijing ang mga naging konklusyon ng mga iskolar na nagpapahiwatig umano na maaaring nais ng China na panatilihin ang umiiral na naratibo habang iniiwasang gumawa ng opisyal na pag-aangkin sa teritoryo.

Naniniwala rin ang grupo na layon ng symposium report na bigyang-katwiran ang pagpapatrol ng tsina sa silangang bahagi ng Batanes na nagsimula noong Hunyo a-uno.  | mula sa panulat ni Reianne Antiquina