NEWS

Tumaas ang bilang ng mga working children o batang nagtatrabaho sa edad na lima hanggang labing pitong gulang noong 2025.

Ayon sa Philippine Statistics Authority, umabot na sa 868,540 ang working children noong nakaraang taon, mas mataas kaysa 861,450 noong 2024, ngunit mas mababa pa rin sa mahigit isang milyon na naitala noong 2023.

Batay sa datos, 61.6 percent ng mga nagtatrabahong bata ay lalaki, habang 38.4 percent naman ay babae, na karamihan ay nasa service at agriculture sector.

Naitala rin ng PSA na 69.1 percent ng mga working children ay nagtatrabaho nang 20 hours kada linggo, habang 18.4 percent naman ang 21 hanggang 40 hours bawat linggo, mas mataas kumpara sa naitalang porsyento sa nakaraang dalawang taon.   | mula sa panulat ni Jordan Gutierrez

Itinaas na ng National Food Authority ang minimum buying price ng palay sa 21 pesos mula sa 17 pesos kada kilo, habang ipinatigil ang pagpasok ng imported rice sa Iloilo sa panahon ng anihan upang mapataas ang kita ng mga magsasaka.

Ayon kay Agriculture Secretary Francisco Tiu Laurel Jr., ipatutupad ang bagong buying price simula sa anihan sa setyembre bilang tugon sa pagtaas ng presyo ng abono at iba pang farm inputs.

Ihihinto rin muna ang pagpasok ng rice imports sa Iloilo mula kalagitnaan ng setyembre hanggang katapusan ng nobyembre upang hindi maapektuhan ang presyo ng lokal na ani.

Binuksan na rin ng Department of Agriculture ang nagkakahalaga ng 355 million pesos rice processing facility sa Dumangas, Iloilo na kayang mag-proseso ng halos limang libong sako ng palay kada araw.

Binigyang-diin ng kagawaran na bahagi ang mga naturang hakbang ng mas malawak na programa ng pamahalaan upang mabawasan ang post-harvest losses, mapataas ang kita ng mga magsasaka, at mapalakas ang food security sa bansa. | mula sa panulat ni Jordan Gutierrez

Pinalawig ng Energy Regulatory Commission ng tatlong buwan ang suspensyon ng power disconnections sa mga consumer na hindi makabayad ng kanilang electric bill, bilang bahagi ng mga hakbang sa ilalim ng State of National Energy Emergency.

Saklaw ng bagong kautusan ang mga bayarin mula Agosto hanggang Oktubre ng kasalukuyang taon.

Inatasan na din ng ERC ang mga distribution utilities na magpatupad ng utay-utay o installment payment scheme.

Kung saan ang mga consumer na gumagamit ng 200 kilowatt-hours kada buwan ay maaaring ipagpaliban ang pagbabayad at hulugan ito nang hindi bababa sa tatlong buwan.

Nilinaw naman ng ERC na maaaring magbayad nang buo ang mga consumer kung kaya ng bulsa.

Samantala, inatasan na din ang mga generation company, kabilang ang NGCP at iba pang power industry stakeholders na ipatupad ang kaparehong payment scheme para mabawasan ang pinansyal na pasanin ng mga consumer.  | mula sa panulat ni Jordan Gutierrez

Bahagyang umangat ang net satisfaction rating ni Vice President Sara Duterte sa +31 nitong Hunyo mula sa +29 noong Marso ng kasalukuyang taon.

Batay sa survey ng Social Weather Stations, 58 percent ang satisfied sa performance ng bise presidente, habang 26 percent ang hindi masaya at 16 percent naman ang undecided.

Sa datos, pinakamataas ang kanyang satisfaction rating sa Mindanao na +84, sinundan ng Visayas na +36, sa Luzon na +10, at Metro Manila na +3.

Sa parehong survey, tumaas din ang net satisfaction rating ni Pangulong Ferdinand Marcos Jr. Sa -7 mula -15 noong Marso.

Isinagawa ang survey sa isanlibo dalawandaang adult respondents sa buong bansa noong June 20 hanggang 29, bago ang pagsisimula ng impeachment trial ng pangalawang pangulo. | mula sa panulat ni Jordan Gutierrez

Itinalaga si dating Department of Health Spokesperson at Undersecretary Albert Domingo bilang bagong Executive Director ng National Nutrition Council Secretariat, kasunod ng kanyang bagong assignment na epektibo simula nitong Hulyo a-katorse.

Sa isang pahayag, sinabi ni bagong NNC Executive Director Domingo na inaasahan niyang makatrabaho ang iba’t ibang sektor sa pagsusulong ng mas maayos na nutrisyon para sa mga pilipino.

Samantala, nilinaw ng DOH Na wala pang opisyal na itinalagang kapalit ni domingo bilang tagapagsalita ng kagawaran.

Ang bagong posisyon ni Domingo ay kasunod ng pag-upo ni Health Secretary Jose Pujalte Jr. Bilang pinuno ng DOH matapos ang pagbibitiw ni dating kalihim na si Ted Herbosa. | mula sa panulat ni Jordan Gutierrez