NEWS

Inilarawan ng Senado na maayos at organisado ang naging takbo ng unang anim na araw ng impeachment trial ni vice president sara duterte dahil sa koordinasyon at pagsunod ng lahat ng panig sa itinakdang proseso.

Ayon kay Senate President Sherwin Gatchalian, naging maayos ang pag-usad ng paglilitis sa kabila ng mga legal arguments at debate dahil sa kooperasyon ng prosecution at defense panels.

Naging mahalaga rin anya ang masusing paghahanda ng Senado, pakikiisa ng mga Senator-judges, aktibong presensya ng Senate Sergeant-at-Arms sa pagpapanatili ng kaayusan at seguridad sa paglilitis.

Binigyang-diin ni Senate President Gatchalian na nananatiling prayoridad ng Senado ang maayos na pagsasagawa ng impeachment trial dahil isang mataas na opisyal ng pamahalaan ang kasalukuyang nililitis, kaya mahalagang matiyak ang ligtas na mga pagdinig. | mula sa panulat ni Jordan Gutierrez

Nilinaw ng Senate Impeachment Court na walang katiyakan na bibilis o iikli ang impeachment trial ni Vice President Sara Duterte kahit binawasan ng prosekusyon ang bilang ng kanilang mga testigo para sa Article 4 ng impeachment complaint.

Ayon kay Impeachment Court Spokesperson Atty. Reginald Tongol, ang oras na matitipid sa mas maikling presentasyon ng mga testigo ay maaari namang ilaan sa pagtalakay ng iba pang reklamo laban bise presidente.

Karaniwan anyang legal strategy ng magkabilang panig ang pagbabawas ng mga testigo kapag naniniwala silang sapat na ang kanilang naiprisintang ebidensya.

Nauna nang kinumpirma ng prosekusyon na si NBI Director Melvin Matibag ang magiging huling testigo para sa Article 4 na may kaugnayan sa umano’y grave threats laban kay Pangulong Ferdinand Marcos Junior.

Matatandaang humiling ang prosekusyon ng kabuuang 62 trial days para iharap ang kanilang kaso, habang 30 trial days naman ang hiniling ng depensa, kaya inaasahang tatagal ng anim na buwan ang paggulong ng paglilitis.  | mula sa panulat ni Jordan Gutierrez

Hindi kumbinsido si House Assistant Minority Leader at Gabriela Women’s Party Rep. Sarah Elago sa desisyon ng Energy Regulatory Commission na palawigin ang “no disconnection policy” para sa mga customer ng Meralco.

Itinuturing ni Congw. Elago na “band-aide solution” ang hindi pagtugon ng Meralco sa ugat ng problema partikular ang umano’y sobrang singil sa kuryente at maling meter reading na siyang pangunahing reklamo ng maraming consumer.

Iginiit ng Kongresista na hindi sapat ang pansamantalang power disconnections kung hindi naman naaayos ang maling singil sa mga consumer.

Binigyang-diin ni Congw. Elago na ang tunay na proteksyon sa publiko ay ang pagpigil sa labis na singil at pagtiyak na hindi ipinapasa sa mga ordinaryong mamamayan ang tubo ng malalaking pribadong kumpanya ng kuryente. | mula sa panulat ni Jordan Gutierrez

Rerepasuhin na ng Metropolitan Manila Development Authority ang patakaran nito sa pagpo-post sa social media ng mga operasyon laban sa mga lumalabag sa batas-trapiko.

Ayon kay MMDA Chairman Don Artes, may magkakaibang pananaw ang publiko sa naturang polisiya kaya magsasagawa sila ng konsultasyon, kasama ang data privacy commission.

Gayunman, iginiit ni artes na wala siyang nakikitang mali sa pagpo-post ng mga nahuhuling motorista, pero kailangan anilang tiyakin kung may nalalabag na data privacy act o iba pang karapatang pantao.

Ipinunto ng MMDA na nakatutulong ang mga video upang ipakita sa publiko ang trabaho ng ahensya at magsilbing babala sa mga lumalabag sa batas-trapiko at road safety.

Naging usapin ang isyu matapos mag-viral ang video ng isang gurong nahuling walang helmet habang nagmo-motorsiklo sa isinagawang operasyon ni MMDA Special Operations Group–Task Force for Road Clearing Head Gabriel Go.

Dahil sa mga reklamong isinampa, pansamantalang hindi muna isasama sa mga operasyon si Go habang isinasagawa ang imbestigasyon. | mula sa panulat ni Jordan Gutierrez

Posibleng ipatawag ng National Bureau of Investigation si Public Works Secretary Vince Dizon para magbigay-linaw sa imbestigasyon ng umano’y mga iregularidad sa 2019 Southeast Asian Games.

Ayon kay NBI Director Melvin Matibag, makatutulong ang kalihim sa pagpapaliwanag ng mga usapin kaugnay ng pagtatayo ng New Clark City Sports Complex dahil dati itong pangulo at CEO ng Bases Conversion and Development Authority.

Gayunman, nilinaw ng hepe ng NBI Na hindi pa niya masasabi kung cleared na si Secretary Dizon, kahit natanggap na ng ahensya ang resolusyon ng Ombudsman na nagbasura sa naunang mga reklamong graft at malversation laban sa kalihim.

Nakatuon anya ang imbestigasyon sa umano’y hindi na-liquidate na pondo ng 2019 SEA Games sa ilalim ng Philippine Southeast Asian Games Organizing Committee, na pinamunuan noon ni Senador Alan Peter Cayetano.

Kabilang din sa sinisilip ng NBI ang kontrobersyal na pagkain para sa mga atleta, ang 50 milyong cauldron, umano’y hindi nabayarang travel agencies, at pamamahagi ng uniform at allowances sa mga atleta. | mula sa panulat ni Jordan Gutierrez