Mataas na presyo ng mga pangunahing bilihin, paglaban sa korapsyon, at pagtaas ng sahod ng mga manggagawa ang nangungunang mga isyung dapat tutukan ng pamahalaan,
Batay ito sa pinakabagong survey ng Pulse Asia na isinagawa mula June 28 hanggang July 3,
Ayon sa survey, limampu’t pitong porsiyento ng mga respondent ang nagsabing pinakamahalagang mabawasan ang pagtaas ng presyo ng mga pangunahing bilihin.
Sumunod ang paglaban sa korapsyon at panagutin ang mga tiwaling opisyal ng pamahalaan na nakakuha ng apatnapung porsiyento, habang tatlumpu’t anim na porsiyento naman ang nagsabing dapat maitaas ang sahod ng mga manggagawa.
Nanatili rin ang tatlong isyung ito bilang mga pangunahing alalahanin ng mga Pilipino, katulad ng resulta ng survey noong Marso.
Kabilang pa sa mga isyung binigyang-halaga ng mga respondent ang pagbabawas ng kahirapan, paglaban sa kriminal, pagpigil sa ilegal na droga, paglikha ng mas maraming trabaho, pagpapababa ng presyo ng langis, pagpapanatili ng kapayapaan, pagtugon sa gutom, at pantay na pagpapatupad ng batas. | mula sa panulat ni Jenn Patrolla
