Asahan na ngayong Day 8, ang pormal na pagdalo ng susunod na testigo sa impeachment trial laban kay Vice President Sara Duterte.
Ayon kay House Lead Prosecutor at Batangas Rep. Gerville Luistro, kabilang sa mga inaabangang dadalo ngayong araw ay si National Bureau of Investigation o NBI Dir. Melvin Matibag.
Ito’y para magbigay ng testimonya at patotohanan ang mga naunang pahayag ng dalawang NBI official na sina NBI Senior Agent John Mark Calilung at NBI Regional Dir. Atty. Jeremy Lotoc.
Si Matibag ang huling testigo ng House Prosecution Panel para sa Article 4 o grave threats ng impeachment complaint na tumatalakay sa umano’y pagbabanta ni VP Sara laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Umaasa ang House Prosecution Team na sa pagdalo ni Matibag ngayong araw ay ihihiwalay ng senator-judges ang iba pang isyu na ibinabato laban sa kaniya.
Ayon kay Luistro, magkaibang usapin at malayo sa impeachment trial ang mga tanong kay Matibag at walang kaugnayan sa kaniyang magiging paksa o testimonya sa kaso laban sa Bise Presidente.
Samantala, kabilang naman sa nakatakdang iharap bukas para sa Day 9 ng paglilitis para talakayin ang Article 1 o misuse of confidential funds ay si House of Representatives Legislative Archives and Museum Management Service Director Marivic Pareja at ang dalawa pang empleyado ng Land Bank of the Philippines na sina Violeta Constantino at Nenita Campossano.
Asahan na tatalakayin ang isyu ng maling paggamit ng confidential at intelligence fund ni VP Sara. | via Geli Mendez/DWIZ Patrol
