NATIONAL NEWS

Welcome sa Philippine National Police (PNP) ang pagsasampa ng Department of Justice (DOJ) ng kaso laban sa apat na pulis at tatlong tauhan ng Philippine Drug Enforcement Agency (PDEA) kaugnay ng tinaguriang “Commonwealth Misencounter”.

Sinabi ni PNP Public Information Office Chief Pbgen. Roderick Augustus Alba na ang hakbang ay magbibigay ng pagkakataon sa mga nasasakdal na ipagtanggol ang kanilang sarili sa korte.

 Ipauubaya na aniya ng PNP ang kapalaran ng mga akusado sa korte, bilang bahagi ng due process.

 Magugunitang nagsagawa ng magkahiwalay na operasyon ang mga pulis ng Quezon City Police District (QCPD) at PDEA sa isang mall sa Commonwealth Avenue, nang mangyari ang misencounter noong Pebrero ng nakaraang taon, na nagresulta sa pagkamatay ng apat na tao.

 Ang mga ahente ng PDEA na sina Khee Maricar Rodas, Jeffrey Baguidudol at Jelou Santiniaman ay kakasuhan ng homicide sa pagkamatay ni PCPL Eric Garado.

 Habang ang mga pulis ng QCPD na sina PCPL Paul Christian Gandeza, PLT. Honey Besas, PMAJ. Sandie Caparroso at P/Smsg. Melvin Merida ay kakasuhan ng direct assault dahil sa pananakit umano sa PDEA agents. - sa ulat ni Gilbert Perdez (Patrol 13)

Aprubado na kay Pangulong Rodrigo Duterte ang promosyon ng mga kawani at opisyal ng Philippine Postal Corporation (PhilPost).

 Ayon sa punong ehekutibo, inatasan na niya sina Postmaster General Norman Fulgencio at Civil Service Commission (CSC) Chairman Karlo Nograles na madaliin ang proseso ng mga dokumento lalo’t kaunting panahon na lamang ang natitira sa kanyang administrasyon.

 Nabatid na bago ang talumpati ng pangulo ay nakausap sila nina Nograles at Fulgencio kaugnay sa nasabing promosyon.

 Nananatiling maluwag ang mga ospital kahit nakapagtala ang ilang pagamutan ng mangilan-ngilang pasyente na may COVID-19.

 Sa panayam ng DWIZ, sinabi ni Dr. Maricar Limpin, presidente ng Philippine College of Physicians, na nakahanda na rin sila sakaling tumaas ang kaso ng nakahahawang sakit.

 Sinabi pa ni Limpin na hindi pa nakakabahala sa ngayon ang naitalang mga kaso ng subvariant ng Omicron na BA.2.12.1 sa bansa.

Sa kabila nito, patuloy na nananawagan si Limpin sa mga hindi pa nababakunahan na magpaturok na ng COVID-19 vaccine bilang karagdagang proteksyon.

Itinaas ng Bangko Sentral ng Pilipinas (BSP) ang benchmark rate nito sa maraming uri ng financial transactions.

 25 basis points ang ipatutupad na pagtataas ng interest rate para sa ilang transaksyon ng mga bangko sa BSP.

 Epektibo ito simula ngayong araw kung saan kabilang din dito ang mga lending facilities o mga pautang.

 Layon nito na masolusyunan ang mabilis na ‘inflation rate’ sa bansa dahil sa paghina ng ekonomiya dulot ng COVID-19 pandemic.

 Nabatid na ito ang kauna-unahang pagkakataon na nagtaas ng rate ang BSP sa loob ng tatlong taon o simula 2018.

 4.6% ang inflation forecast ng BSP ngayong taon na mas mataas sa target na 4.3%.

Isusumite na ni outgoing Energy Regulatory Commission (ERC) Chairperson Agnes Devanadera ang mga proposal sa incoming administration na mapababa ang power rates.

 Ayon kay Devanadera, kabilang sa panukala ang  suspensyon ng excise tax on coal at petroleum at pagtanggal sa double vat imposition sa pass-on costs sa gitna ng walang prenong oil price increase.

 Ito’y anya, ang pinaka-epektibong paraan upang mapababa ang singil sa kuryente dahil mararamdaman agad ito ng consumers at may maliit na epekto naman sa stakeholders.

 Ipinunto ni Devanadera na kung pansamantalang sususpendihin ang excise tax sa ilalim ng train law, maaaring bumaba sa zero point 101 peso per kilowat hour ang rate reduction.

Pinag-ko-komento ng korte suprema ang kampo ni presumptive president Ferdinand “Bongbong” Marcos Jr., Commission on Elections (COMELEC) maging ang senado at kamara sa iniakyat na disqualification case laban kay BBM.

 Ang nabanggit na petisyon ay isinumite ng grupo ni Christian Buenafe, noong Lunes.

 Alinsunod sa En banc Resolution kahapon, pinasasagot ang mga respondent sa loob ng 15 araw makaraang matanggap ang ‘notice’ hinggil sa mga alegasyon na hindi nabigyan ng tamang proseso ang petisyon na isinampa sa poll body laban kay Marcos.

 Kinuwestiyon ng grupo nina Buenafe ang mga resolusyon ng COMELEC na may petsang January 17, 2022 at May 10, 2022, na nagbabasura sa petisyon nila kontra sa dating senador.

 Nakasaad din sa petisyon na nararapat na tanggihan o kanselahin ng COMELEC ang inihaing ‘Certificate of Candidacy’ (COC) ng dating Ilocos Norte governor para sa posisyon ng pangulo ng bansa.

 Binigyang-diin ng grupo ni Buenafe na nakagawa ng krimen ukol sa ‘moral torpitude’ at perjury si Marcos dahil umano sa maling nakalahad sa kanyang COC sa kaniyang eligibility sa pagtakbo kaugnay sa kaso nang hindi pagbabayad ng buwis.  –  sa ulat ni Bert Mozo (Patrol 3)

Sinimulan na ng Metropolitan Manila Development Authority (MMDA) ang paglilinis ng mga estero, kasabay ng opisyal ng pagpasok ng tag-ulan.

Bahagi ng Clean Up Drive ang Dredging Operations sa mga waterways sa Metro Manila.

Ayon kay MMDA Chairman Romando Artes, kasabay ng operasyon ang pagbabaklas sa campaign materials na bumabara sa mga drainage; rehabilitation ng mga pumping station at konstruksyon ng mga bagong pumping station.

Tiniyak naman ni Artes na may sapat na power at fuel supply sila upang maiwasang pumalya ang mga nasa 30 pumping stations sa Metro Manila.

Bukod sa regular maintenance ng pumping stations, nagsagawa rin ng desilting at dredging sa mga ilog upang maiwasan ang pagbaha.

Samantala, umapela naman si Artes sa publiko na itapon nang maayos ang kanilang mga basura na kadalasang sanhi ng pagbaha.

Suportado ng Philippine National Police (PNP) ang batas na magtatakda ng “fixed term” na tatlong taon para sa PNP Chief.

Tugon ito ni PNP Spokesperson, Col. Jean Fajardo matapos aprubahan ni Pangulong Rodrigo Duterte ang Republic Act 11709 na nagtatakda ng tatlong taong termino para sa Armed Forces of the Philippines (AFP) Chief at ilan pang matataas na opisyal ng militar.

Ayon kay Fajardo, mayroon ding kahalintulad na hakbang para sa pambansang pulisya na nakabinbin sa kongreso na inaasahan nilang maipapasa rin.

Makabubuti anya para sa kanilang hanay na magkaroon ng mas mahabang termino ang PNP Chief upang mabago na ang “revolving door policy” ng pag-upo ng ilang buwan lang ng pinuno ng pambansang pulisya.

Aminado naman si Fajardo na iba ang impresyon ng publiko sa papapalit-palit ng hepe ng PNP at AFP.

Pinamamadali na ng Department of Health (DOH) ang pagbibigay ng sickness at death benefits sa mga “eligible” health workers at iba pa sa pampubliko at pribadong health facilities habang tumutugon sa COVID-19 pandemic.

Bahagi ito ng mahigit 1 billion pesos na pondong inilabas ng Department of Budget and Management (DBM) na sasaklaw simula January 1, 2022 hanggang matapos ang public health emergency.

Kabilang sa makikinabang ang mga tinamaan ng mild to moderate COVID-19 na tatanggap ng 15,000 pesos; severe to critical COVID-19, 100,000 at mga naulila ng mga namatay sa COVID-19, 1 million pesos.

Ito, ayon kay Health Secretary Francisco Duque, III, ay bilang pagtanaw ng utang na loob at suporta sa mga health care worker na nag-alay ng buhay sa bawat Pinoy sa gitna ng COVID-19 pandemic.

Sa ilalim ng Joint Circular 2022-0002 ng DOH, sasaklawin ang parehong medical at health allied personnel ng pagbibigay ng direktang healthcare sa pasyente at pwede rin ito sa mga technical, administrative at support staff sa health facilities.