Hiniling ng House Prosecution Panel sa Senate Impeachment Court na payagan ang mga private prosecutors na magkaroon ng option na mag-cross-examine sa mga testigong ihaharap sa impeachment trial ni Vice President Sara Duterte.
Ayon kay House trial spokesman Zia Alonto Adiong, ang kahilingan ay nakabatay sa naging proseso sa mga naunang impeachment trial sa bansa.
Tinukoy ni Cong. Adiong ang impeachment proceedings laban kina dating Pangulong Joseph Estrada at dating Chief Justice Renato Corona, kung saan naging aktibo ang partisipasyon ng mga private prosecutor sa paglilitis.
Iginiit ng mambabatas na ang ganitong kaayusan ay magbibigay ng higit na kalayaan at kakayahan sa prosecution panel sa maayos na presentasyon ng ebidensiya at pagdinig ng mga testigo sa impeachment trial.—sa panulat ni Jordan Gutierrez
