Ibinabala ni Senate Minority Leader Alan Peter Cayetano na maaaring magkaroon ng ligal na kalituhan sa impeachment trial ni Vice President Sara Duterte kung hindi agad lilinawin ng Korte Suprema ang kahulugan ng “majority” sa Senado kaugnay ng impeachment proceedings.
Kaugnay ito ng manifestation na inihain sa Supreme Court na kumukuwestyon sa bisa ng sesyon ng Senado noong Hunyo a-tres na tinawag ng mga petitioner na isang “rump session.”
Ayon kay Senador Cayetano, mahalagang linawin ang usapin dahil ang Konstitusyon ay nag-aatas ng two-third votes o labing anim na boto ng senador upang mahatulan ang isang opisyal sa impeachment.
Lumitaw ang mga pangamba na maaaring maapektuhan ang kinakailangang bilang ng boto kung magkakaroon ng pagbabago sa komposisyon o bilang ng mga aktibong senador.
Kasunod na rin ito ng pagkakakulong ni Senador Jinggoy Estrada at ang posibleng ligal na proseso laban kay Senador Rodante Marcoleta.—sa panulat ni Jordan Gutierrez
