Kinumpirma ng Cybercrime Investigation and Coordinating Center na may mga local groomer na nag-o-operate sa Pilipinas para sa violent extremist group na 764 Network.
Ayon kay CICC Executive Director Undersecretary Renato “Aboy” Paraiso, ginagamit ng mga groomer ang mga mararahas na online game upang makahanap ng mga batang madaling maimpluwensiyahan bago ilipat sa messaging platforms para sa radicalization at indoctrination.
Lumabas ang pahayag kasunod ng mga ulat na posibleng naimpluwensiyahan ng mga adult groomer na konektado sa 7-6-4 Network ang dalawang menor de edad na sangkot sa pamamaril sa isang paaralan sa Tacloban City.
Inihayag ni Usec. Paraiso na maaaring kasuhan ng murder bilang co-principal ang mga groomer, bukod pa sa mga paglabag sa Anti-Child Abuse Law at Cybercrime Prevention Act of 2012.—sa panulat ni Jordan Gutierrez
