NATIONAL NEWS

 Tumaas ng 19 percent ang daily average COVID-19 cases sa National Capital Region (NCR) sa nakalipas na pitong araw.

Batay sa report ng independent monitoring group na OCTA Research, mula may 13 hanggang 19 ay tumaas sa 71 ang mga kaso kumpara sa 59 noong May 6 hanggang 12.

Tumaas rin sa 0.90 ang reproduction number ng rehiyon, na ikinukunsiderang ”moderate”.

Nananatili naman sa 1.2% ang positivity rate at nasa 22% ang hospital care utilization rate sa NCR.

Tumaas rin ang one-week average daily attack rate sa 0.50 mula sa dating 0.42

Sa kabila nito, nananatiling low risk sa COVID-19 ang NCR.

Gumaling at nakauwi na sa kani-kanilang bansa ang 11 dayuhang turista matapos tamaan ng  Omicron subvariant na BA.2.12.1.

Ayon kay Dr. Dean Palanca, pinuno ng Incident Management team sa Puerto Princesa, umalis na ng bansa ang nasabing foreign travelers noon pang unang linggo ng Mayo.

Nakaranas lamang aniya ang mga ito ng mild symptoms ng nasabing sakit.

Lahat din ng close contacts ng mga pasyente ay nag-negatibo sa COVID-19.

Aabot sa halos apat na libong indibidwal na ang nasakote ng mga awtoridad mula nang ilunsad nito ang mas pinaigting na kampanya laban sa illegal gambling sa Central Luzon.

Ayon sa Police Regional Office–Central Luzon (PRO-3), nasa 886 na ang mga anti-illegal gambling operations na kanilang naikasa mula noong Enero 1.

Nasa 3,878 individuals ang kabuuang bilang ng mga nahuli habang aabot naman sa 1.35 million pesos ang cash bets na nakumpiska ng mga awtoridad.

Kaugnay nito, sinabi ni PRO-3 Regional Director Brig. Gen. Matthew Baccay na inatasan na niya ang lahat ng station commanders sa rehiyon na paigtingin pa ang kampanya laban sa iligal na sugal at hulihin ang lahat ng mga sangkot dito. - sa ulat ni Gilbert Perdez (Patrol 13)

Nasa 50 mga bata sa Negros Oriental ang isinugod sa Bayawan District Hospital noong Huwebes ng gabi, Mayo 19, matapos maiulat na uminom ng kontaminadong gatas.

Nabatid na nangyari ito sa gitna ng pagpapatuloy ng in-person classes sa iba’t-ibang paaralan sa lalawigan.

Ayon kay Ruben Muñez Jr., nars sa nasabing ospital, nagpakita ng sintomas ng gastrointestinal illness ang mga pasyente.

Sa ngayon ay hinihintay pa ng local health officials ang resulta ng laboratory tests.

Inamin ni Pangulong Rodrigo Duterte na kabilang pa rin siya sa analog generation.

 Sa kanyang pagdalo sa inilunsad na Digital Innovation and Modernization ng Philippine Postal Corporation sa Manila Central Post Office kahapon, ibinahagi ng punong ehekutibo na hindi niya pa rin gamay ang smartphone kahit tinuruan na siya ng kanyang anak.

Gayunman, nagpapasalamat pa rin ang pangulo na inabot niya ang panahon ng modernong teknolohiya.

 Gayong halos anim na linggo na lamang ang natitira sa kanyang administrasyon, nagbiro rin si Pangulong Duterte na ang trabaho na lamang niya ay tumingin sa magagandang babae.

 Gagamit ng body cameras ang mga pulis na ide-deploy para sa gaganaping special elections sa labindalawang barangay sa Tubaran, Lanao del Sur sa Mayo 24.

 Ayon kay PNP Director for Operations Police Maj. Gen. Valeriano de Leon, nais nilang matiyak na maido-dokumento ang lahat ng galaw o operasyon ng mga alagad ng batas sa pagtugon at pagpapanatili ng kapayapaan at kredibilidad ng eleksiyon.

Itinalaga bilang Special Board of Inspectors ang mga pulis upang matiyak ang seguridad sa mga presinto at maharang ang posibleng pagkakaroon ng vote-buying at flying voters.

 Sinabi ni de Leon na malaki ang maitutulong ng mga body-worn camera para masiguro ang transparency sa panig ng mga awtoridad at magamit laban sa mga magtatangkang manabotahe sa botohan.

 Nabatid na ang mga gagamiting body cam para sa special elections ay kabilang  sa mahigit tatlong libong body-worn camera na binili ng pambansang pulisya noong nakaraang taon. - sa ulat ni Gilbert Perdez (Patrol 13)

Nagpasalamat si Pangulong Rodrigo Duterte sa mga taong tumulong at sumuporta sa kanyang administrasyon.

 Ayon sa punong ehekutibo, nasa huling yugto na siya ng kanyang panunungkulan sa bansa kaya’t pinasasalamatan niya ang mga taong nagtiwala sa kanya.

 Maging ang mga nagluklok sa kanya sa pwesto at umunawa sa kanyang hangarin ay kanyang pinasalamatan.

 Mababatid na sa Hunyo 30 nakatakdang bumaba sa pwesto si Pangulong Duterte.

Welcome sa Philippine National Police (PNP) ang pagsasampa ng Department of Justice (DOJ) ng kaso laban sa apat na pulis at tatlong tauhan ng Philippine Drug Enforcement Agency (PDEA) kaugnay ng tinaguriang “Commonwealth Misencounter”.

Sinabi ni PNP Public Information Office Chief Pbgen. Roderick Augustus Alba na ang hakbang ay magbibigay ng pagkakataon sa mga nasasakdal na ipagtanggol ang kanilang sarili sa korte.

 Ipauubaya na aniya ng PNP ang kapalaran ng mga akusado sa korte, bilang bahagi ng due process.

 Magugunitang nagsagawa ng magkahiwalay na operasyon ang mga pulis ng Quezon City Police District (QCPD) at PDEA sa isang mall sa Commonwealth Avenue, nang mangyari ang misencounter noong Pebrero ng nakaraang taon, na nagresulta sa pagkamatay ng apat na tao.

 Ang mga ahente ng PDEA na sina Khee Maricar Rodas, Jeffrey Baguidudol at Jelou Santiniaman ay kakasuhan ng homicide sa pagkamatay ni PCPL Eric Garado.

 Habang ang mga pulis ng QCPD na sina PCPL Paul Christian Gandeza, PLT. Honey Besas, PMAJ. Sandie Caparroso at P/Smsg. Melvin Merida ay kakasuhan ng direct assault dahil sa pananakit umano sa PDEA agents. - sa ulat ni Gilbert Perdez (Patrol 13)

Aprubado na kay Pangulong Rodrigo Duterte ang promosyon ng mga kawani at opisyal ng Philippine Postal Corporation (PhilPost).

 Ayon sa punong ehekutibo, inatasan na niya sina Postmaster General Norman Fulgencio at Civil Service Commission (CSC) Chairman Karlo Nograles na madaliin ang proseso ng mga dokumento lalo’t kaunting panahon na lamang ang natitira sa kanyang administrasyon.

 Nabatid na bago ang talumpati ng pangulo ay nakausap sila nina Nograles at Fulgencio kaugnay sa nasabing promosyon.

 Nananatiling maluwag ang mga ospital kahit nakapagtala ang ilang pagamutan ng mangilan-ngilang pasyente na may COVID-19.

 Sa panayam ng DWIZ, sinabi ni Dr. Maricar Limpin, presidente ng Philippine College of Physicians, na nakahanda na rin sila sakaling tumaas ang kaso ng nakahahawang sakit.

 Sinabi pa ni Limpin na hindi pa nakakabahala sa ngayon ang naitalang mga kaso ng subvariant ng Omicron na BA.2.12.1 sa bansa.

Sa kabila nito, patuloy na nananawagan si Limpin sa mga hindi pa nababakunahan na magpaturok na ng COVID-19 vaccine bilang karagdagang proteksyon.