NATIONAL NEWS

Nasa walong bilyong pisong pondo ang matitipid ng pamahalaan sakaling hindi matuloy ang Barangay Election sa December 2022.

Ito ang sinabi ni House Majority Leader Ferdinand Martin Romualdez kung saan ang nabanggit na halalan ang unang tatalakayin sa pagbubukas ng 19th congress.

Sa ngayon, mayroong mga sumusuportang chairman na isuspindi ang barangay election upang mailaan ang pondo sa COVID-19 repsonse.

Matatandaan na inihain sa kamara noong nakaraang taon ang isang panukala na nagsusulong sa pagpapaliban ng naturang botohan sa Disyembre.

Inaasahan ng Philippine General Hospital (PGH) na karamihan sa kanilang “skilled” healthcare professional ay aalis para magtrabaho bilang Overseas Filipino Workers (OFWs).

Ayon kay PGH Spokesperson Dr. Jose del Rosario, ito’y dahil nagbukas ang maraming bansa ng oportunidad para sa healthworkers.

Giit pa ni del Rosario na marami siyang nakikitang resignation at karamihan dito ay mga “skilled.”

Patuloy namang nagre-recruit ang mga state-owned hospital gayundin ang kagustuhan nito na makapagsanay ng mga nurse na may kaunti o walang propesyonal na karanasan.

Tanging “first priority” ang mga benepisyaryo ng Pantawid Pamilyang Pilipino Program (4Ps) sakaling ang NFA rice na state-subsidy ay muling magamit sa merkado.

Ayon kay Department of Agriculture Secretary William Dar, kung mayroon pang sapat na suplay ay maisasama rin sa mga prayoridad ang mga indigent individual dahil dedepende sa subsidiya na ibibigay ng gobyerno sa National Food Authority (NFA).

Nabatid na mula noong 2019 ay hindi na available sa market ang NFA rice.

Nagtayo na ang Philippine Coast Guard (PCG) ng mga command observation posts sa tatlong isla malapit sa West Philippine Sea (WPS).

Partikular ito sa Likas Island, Lawak Island at Parola Island.

Ayon kay PCG Commandant Artemio Abu, mapapalakas ng mga outpost na ito ang pagsusulong ng maritime safety, maritime search and rescue at marine environmental protection.

Samantala, nagtatag rin ang task force kaligtasan sa karagatan ng pcg ng smart houses at naglagay din ng radio communication sa nasabing isla. –  sa ulat ni Aya Yupangco (Patrol 5)

Nasa 300 dignitaries sa aviation at transportation mula sa 45 bansa ang lumahok sa kauna-unahang Changi Aviation Summit (CAS) sa Singapore ngayong taon.

Ayon sa Civil Aviation Authority of the Philippines (CAAP), kabilang dito ang ministers, civil aviation regulators, chief executive ng mga airline at iba pang captain mula sa Civil Aviation Industry.

Pinangunahan ng Transport Ministry at Civil Aviation Auhtority of Singapore (CAAS) bilang host ang nasabing aktibidad na may temang “Readying for Take-Off: a Brighter and Cleaner Tomorrow.”

Samantala, ang CAS ay isang high-level conference para pag-usapan ang mga isyu sa Global Aviation Industry.

Pinaalalahanan ng Department of Energy (DOE) ang publiko na magtipid ng kuryente kahit tag-ulan na.

Ayon kay DOE Director Patrick Aquino, ito ay dahil inaasahan nila na makatitipid sa pagkonsumo ng kuryente ang sambahayan dahil mababawasan ang paggamit ng ilang appliances tulad ng aircon at electric fan.

Patunay din aniya ito na malaki ang naitulong ng publiko nitong tag-init dahil sa wais na paggamit ng enerhiya.

Samantala, ilan sa tips na ibinahagi ni Aquino ay ang parating paglilinis ng aircon at electric fan at pagtanggal nito sa saksakan kung hindi naman gagamitin.

Mahigit isandaang (106) karagdagang ruta ang binuksan ng Land Transportation Franchising and Regulatory Board (LTRFB) para sa programang libreng sakay sa Metro Manila at Rizal.

Kabilang dito ang mga ruta para sa Public Utility Vehicles (PUV) sa Caloocan, Mandaluyong, Makati, Manila, Malabon, Marikina, Muntinlupa, Navotas, Quezon City, Taguig, Pasay, Pasig at Cainta, Rizal.

Kasama rin sa libreng sakay ang mga ruta mula sa North Luzon Express Terminal (NLET) at Parañaque Integrated Terminal Exchange (PITX).

Samantala, nasa mahigit 49 million na pasahero na ang nakinabang sa libreng sakay ng pamahalaan mula April 11.

Muling pinaalalahanan ng Commission on Elections (COMELEC) ang mga kandidato sa nagdaang halalan 2022 na magsumite ng Statements of Contributions and Expenditures (SOCE) hanggang June 8.

Ayon kay COMELEC acting Spokesperson John Rex Laudiangco, dapat mag-submit ang mga kandidato at political parties ng kanilang mga nagastos gayundin ang kontribusyon na natanggap sa campaign period.

Paliwanag niya na ang mga nanalo sa nagdaang botohan na hindi nagpasa ng SOCE ay pinagbabawalang umako ng kanilang mga pwesto hanggang sa maghain ng nasabing statement.

Samantala, binalaan ni Laudiangco ang mga kandidatong lumampas sa kanilang campaign spending limits na posible itong maharap sa mga election offense.

Mahigit 10 milyong pisong halaga ng learning equipment ang ipinagkaloob ng US Agency for International Development (USAID) sa Department of Education (DEPED).

Ang isa 100 school-in-a-bag kits ay naglalaman ng laptop computer, 10 tablets na mayroong tig-isang terabyte ng memory at pocket Wi-Fi na preloaded ng 500 pisong halaga ng internet access.

Ipapamahagi ng DEPED ang nasabing kits sa piling mga paaralan sa Bicol, Western Visayas, Maguindanao, Cotabato at mga paaralan na may kaugnayan sa remote learning study ng USAID.

Layon ng nasabing hakbang na isulong ang digital literacy sa gitna ng COVID-19 pandemic, lalo na sa mga malalayong lugar na walang access sa teknolohiya.

 Tumaas ng 19 percent ang daily average COVID-19 cases sa National Capital Region (NCR) sa nakalipas na pitong araw.

Batay sa report ng independent monitoring group na OCTA Research, mula may 13 hanggang 19 ay tumaas sa 71 ang mga kaso kumpara sa 59 noong May 6 hanggang 12.

Tumaas rin sa 0.90 ang reproduction number ng rehiyon, na ikinukunsiderang ”moderate”.

Nananatili naman sa 1.2% ang positivity rate at nasa 22% ang hospital care utilization rate sa NCR.

Tumaas rin ang one-week average daily attack rate sa 0.50 mula sa dating 0.42

Sa kabila nito, nananatiling low risk sa COVID-19 ang NCR.