NATIONAL NEWS

Inimbitahan ni Singaporean President Halimah Yacob si presumptive president Ferdinand “Bongbong” Marcos Junior na magsagawa ng state visit upang mapalakas pa ang ugnayan ng Pilipinas at Singapore.

Ipinahatid ang imbitasyon kay Marcos sa pamamagitan ng isang sulat na ipinost sa website ng foreign ministry ng Singapore.

Nagpaabot din ng pagbati si Yacob sa pagka-panalo nito sa halalan noong Mayo 9.

Setyembre 2019 nang magsagawa ng state visit sa Pilipinas ang Singaporean Leader.

Una nang nagpaabot ng pagbati kay BBM si Singaporean Prime Minister Lee Hsien Loong kung saan inihayag nitong suportado ng mga mamamayan ang liderato at vision ni Marcos para sa Pilipinas.

Pinapurihan ng ilang transport groups sina Pangulong Rodrigo Duterte at Transportation Secretary Arthur Tugade sa pagpapatupad ng Public Utility Modernization Program at Libreng Sakay Program.

Pinangunahan ni Atty. Vigor Mendoza, Chairman at Pangulo ng 1-United Transport Alliance Koalisyon (1-UTAK) at fleet operator ng beep jeep ang paglagda ng mga grupo ng transportasyon sa isang liham ng pagsasalamat sa administrasyon.

Kumbinsido ang halos 50 Metro Manila Transport Group Leaders na ang matatag na political will ng pangulo at ng DOTr ang naging susi sa matagumpay na Modernization at Libreng Sakay.

Dahil anila sa mga programang ito ay napaganda ang kanilang serbisyo sa mga pasahero, partikular ang pagtiyak na air conditioned ang mga sasakyan at mas disiplinadong driver.

Umaasa naman ang transport groups na ipagpapatuloy ng susunod na administrasyon ang PUJ Modernization at Libreng Sakay dahil marami pang dapat ayusin upang mahikayat pa ang publiko na tangkilikin ang mga programa.

Tinatayang 600 toneladang campaign materials na ang nahakot ng MMDA, 11 araw matapos ang eleksyon.

Ayon kay DILG Spokesman, Undersecretary Jonathan Malaya, nagsanib-pwersa na sa “Operation Baklas” ang mga tauhan ng MMDA, PNP at mga local government unit.

Sa ngayon ay hinihintay pa ng DILG ang report hinggil sa pagtatanggal ng mga campaign material sa mga lalawigan.

Halos lahat anya ng mga lokal na pamahalaan ay nagsasagawa ng Oplan Baklas matapos ang ibinigay na palugit ng ahensya upang mahakot ang lahat ng mga campaign paraphernalia.

Ang mga mabibigong tapusin ang pagbabaklas sa loob ng isang linggo ay pagpapaliwanagin ng DILG.

Samantala, pinayuhan naman ni Malaya ang COMELEC na hikayatin ang mga kumandidato na alisin ang kani-kanilang campaign materials ngayong tapos na ang halalan.

Bumagsak pa sa 2,139 ang aktibong kaso ng COVID-19 sa bansa na pinakamababa simula noong March 31, 2020.

Ito’y sa gitna ng bahagyang pagtaas ng daily COVID cases sa 195 na naitala ng Department of Health (DOH), kahapon.

Gayunman, ito na ang ika-4 na sunod na araw na mas mababa sa 200 ang naitatalang additional COVID-19 cases.

Maliban dito ay ilang araw na rin na walang naitatalang nasawi habang nadagdagan ng 297 ang bilang ng gumaling dahilan upang umabot na sa 3,625,704 ang recoveries.

Mas hihigpitan pa ng Philippine National Police (PNP) ang seguridad para sa magaganap na special election sa labing dalawang lugar sa bayan ng Tubaran, Lanao del Sur.

Bantay-sarado ng mga tauhan ng PNP ang mga lugar kung saan, isasagawa ang special elections matapos maitala ang unang failure of elections bunsod ng kaguluhan sa nasabing lalawigan noong Mayo a-nueve.

Ayon kay PNP Spokesperson Col. Jean Fajardo, nasa walong daang mga personnel ang itinalaga mula sa pinagsanib-puwersang tauhan ng PNP at Armed Forces of the Philippines.

Sa ngayon, wala pang namo-monitor na kahit anong banta ng seguridad at panggugulo sa Lanao del Sur.

Samantala, hinihintay parin ng PNP ang abiso mula sa Comelec kung kailan naman isasagawa ang special elections sa dalawa pang mga barangay sa mga bayan ng Binidayan at Butig.

Hinamon ng Malacañang ang 12 mga bagong upong senador na magkaroon ng maayos na hakbang partikular na ang mga ibabalangkas na batas para sa ikabubuti ng mga mamamayang pilipino.

Ayon kay acting Presidential Spokesperson at communication Secretary Martin Andanar, panahon na para magbigay ng serbisyo at mag-trabaho nang maigi ang naturang mga senador para mapabilis ang pagbangon ng ekonomiya ng Pilipinas.

Sinabi ni Andanar na dapat magampanan ng mga new elected senators ang kani-kanilang mga mandato at tungkulin sa bansa dahil mayroong “sense of hope at optimism” sa mga bagong halal na senador.