NATIONAL NEWS

Bumagsak pa sa 2,139 ang aktibong kaso ng COVID-19 sa bansa na pinakamababa simula noong March 31, 2020.

Ito’y sa gitna ng bahagyang pagtaas ng daily COVID cases sa 195 na naitala ng Department of Health (DOH), kahapon.

Gayunman, ito na ang ika-4 na sunod na araw na mas mababa sa 200 ang naitatalang additional COVID-19 cases.

Maliban dito ay ilang araw na rin na walang naitatalang nasawi habang nadagdagan ng 297 ang bilang ng gumaling dahilan upang umabot na sa 3,625,704 ang recoveries.

Mas hihigpitan pa ng Philippine National Police (PNP) ang seguridad para sa magaganap na special election sa labing dalawang lugar sa bayan ng Tubaran, Lanao del Sur.

Bantay-sarado ng mga tauhan ng PNP ang mga lugar kung saan, isasagawa ang special elections matapos maitala ang unang failure of elections bunsod ng kaguluhan sa nasabing lalawigan noong Mayo a-nueve.

Ayon kay PNP Spokesperson Col. Jean Fajardo, nasa walong daang mga personnel ang itinalaga mula sa pinagsanib-puwersang tauhan ng PNP at Armed Forces of the Philippines.

Sa ngayon, wala pang namo-monitor na kahit anong banta ng seguridad at panggugulo sa Lanao del Sur.

Samantala, hinihintay parin ng PNP ang abiso mula sa Comelec kung kailan naman isasagawa ang special elections sa dalawa pang mga barangay sa mga bayan ng Binidayan at Butig.

Hinamon ng Malacañang ang 12 mga bagong upong senador na magkaroon ng maayos na hakbang partikular na ang mga ibabalangkas na batas para sa ikabubuti ng mga mamamayang pilipino.

Ayon kay acting Presidential Spokesperson at communication Secretary Martin Andanar, panahon na para magbigay ng serbisyo at mag-trabaho nang maigi ang naturang mga senador para mapabilis ang pagbangon ng ekonomiya ng Pilipinas.

Sinabi ni Andanar na dapat magampanan ng mga new elected senators ang kani-kanilang mga mandato at tungkulin sa bansa dahil mayroong “sense of hope at optimism” sa mga bagong halal na senador.

Tiniyak Senator-elect Raffy Tulfo na kanilang tatapusin ang mga nakabinbing batas ng 18th Congress dahil marami pa umanong magagandang panukala ang dapat maipatupad at umusad sa Kongreso.

Sinabi ni Tulfo na karamihan sa mga panukala ay kinakailangan na lamang dumaan sa Bicam dahil nakalusot na ang mga ito sa ikatlong pagbasa.

Dagdag pa ng bagong senador na kaniyang isusulong na i-preserba ang mga ito o kaya nama’y gawing basehan ng 19th Congress.

Ayon pa kay Tulfo na nais niyang maging bahagi ng supermajority sa senado upang mas mapadali ang pagsasabatas ng mga isusulong niyang panukala.

Umaasa si Tulfo na ang itatalagang senate president ay magiging pantay sa bawat isa, walang pino-protektahang interes at mga negosyo sa bansa.

Binigyan ng mahalagang posisyon sa Philippine National Police ang 13 senior officials.

Itinalaga ni Philippine National Police Officer-In-Charge,  Lieutenant General Vicente D. Danao Jr. ang 13 pulis kabilang na sina:

• Brigadier General Emmanuel B. Peralta, bilang acting Director for Information and Communication Technology Management (DICTM)
• BGen Jon A. Arnaldo, bilang acting Director of National Police Training Institute (NPTI)
• BGen Lawrence B. Coop, bilang Chief of Supervisory Office for Security and Investigative Agencies (SOSIA)
• BGen Samuel C. Nacion, bilang Director ng Integrity Monitoring and Enforcement Group (IMEG)
• BGen Robert T. Rodriguez, bilang Acting Director for Personnel and Records Management (DPRM)
• BGen Constancio T. Chinayog Jr., bilang Deputy Director for Personnel and Records Management
• BGen Sidney N. Villaflor, bilang Deputy Director for Logistics
• BGen Jonnel C. Estomo, bilang Acting Deputy Commander, Area Police Command- Southern Luzon
• BGen Oliver A. Enmodias, bilang Acting Deputy Commander, Area Police Command- Eastern Mindanao
• BGen Bowenn Joey Masauding, bilang Direktor ng Anti-Cybercrime Group
• Wilson C. Asueta, OIC ng Office of the Senior Executive Assistant to the Chief PNP
• Christopher C. Birung,bilang Acting Chief of Staff, PNPA at
• Si Joseph R. Arguellesnaman sa DPRM.

Ayon kay Danao, ang paglalagay sa mahahalagang puwesto ng 13 senior officials ay base narin sa rekomendasyon ng senior officers’ placement and promotion board at base narin sa kanilang performance sa PNP.

Nagpaabot ng pagbati si presumptive president Ferdinand “Bongbong” Marcos Jr. sa 12 nanalong senador sa katatapos lang na 2022 national election.

Sa social media post, naniniwala si Marcos na maibibigay ng mga nanalong senador ang kanilang buong serbisyo at karunungan sa taumbayan.

Kabilang sa mga senador na naiproklama noong Mayo a-18 sa Philippine International Convention Center ay sina:

• Actor Robin Padilla
• Antique Representative Loren Legarda
• Broadcaster Raffy Tulfo
• Senador Sherwin Gatchalian
• Sorsogon Governor Chiz Escudero
• Dating Public Works Chief Mark Villar
• Taguig-Pateros Representative Alan Peter Cayetano
• Senador Juan Miguel Zubiri
• Senador Joel Villanueva
• Dating Senador JV Ejercito
• Senador Risa Hontiveros at
• Dating senator Jinggoy Estrada.

Layunin ng bagong uupong administrasyon ang patuloy na pagbangon ng ekonomiya at pag-unlad ng bansa sa gitna ng Covid-19 pandemic.

Limang miyembro ng New Peoples Army (NPA) ang nagbalik-loob sa pamahalaan sa Maguindanao kamakailan.

Ang naturang mga NPA ay sinasabing kaanib umano ng Far South Mindanao Region na kusang sumuko sa mga militar dahil sa kawalan ng pag-asa sa kanilang ipinaglalaban sa pamahalaan.

Ayon sa 57th infantry battalion ng Philippine Army, kasabay ng pagsuko ng mga npa ang pagturn-over ng mga armas na kinabibilangan ng isang sniper rifle, isang garand rifle, at isang 12-gauge shotgun.

Bukod pa dito, isinuplong din ng 5 rebelde ang pinagtataguan nila ng iba pang mga armas, katulad ng isang M60 machine gun at 3 M16 rifles sa isang liblib na lugar sa bayan ng Lebak, Kalinga.

Nangako naman ang militar na kanilang tutulungan ang mga ito upang muling makapagbagong-buhay kapiling ang kani-kanilang pamilya.

Aabot sa P10.4 milyong halaga ng marijuana ang sinunog ng mga otoridad sa Tinglayan, Kalinga.

Nabatid na sinalakay kahapon, Mayo a-19 ng mga tauhan ng Philippine National Police (PNP-Drug Enforcement Group sa Cordillera Administrative Region) ang apat na plantasyon sa barangay Loccong at Brgy. Ngibat ng nabanggit na lugar.

Aabot sa 15,000 piraso ng full-grown marijuana plants ang nabunot sa isang plantasyon; 7,500 na piraso naman ang nakuha sa ikalawang plantasyon; 27,500 piraso naman sa ikatlo; habang 200 piraso naman sa ika-apat na plantasyon.

Patuloy pang nagsasagawa ng imbestigasyon ang mga pulis upang matukoy at mapanagot ang may-ari ng apat na plantation sites.