NATIONAL NEWS

Tiwala si Senate President Vicente “Tito” Sotto na malaki ang magagawa ng mga pinangalanang miyembro ng Independent Commission for Infrastructure na sina dating Public Works and Highways Secretary Rogelio Singson at Certified Public Accountant Rossana Fajardo, gayundin ang tatayong special adviser na si Baguio City Mayor Benjamin Magalong.

Ayon kay Senate President Sotto, kung anumang kapangyarihang ibinigay ng executive order sa mga miyembro ng ICI para sa mas matibay na imbestigasyon sa ma-anomalyang flood control projects, tiyak na mas lalakas pa at makukumpleto pa anya ito sa oras na maisabatas ang binubuong Independent People’s Commission ng Senado.

Anya, magiging prayoridad at inaasahang maisasabatas ngayong taon ang naturang panukala na magbibigay ng dagdag ngipin sa binuong commission.

Seryoso sa pagsisiyasat ang House tri-committee sa isinasagawang pagdinig sa ma-anomalyang flood control projects.

Ayon kay House Committee on Infrastructure Co-Chairman, Cong. Terry Ridon, magkakambal na layunin ng imbestigasyon, na mapanagot at makulong ang mga personalidad na nasa likod ng kaso, at aktwal na maka-paglatag ng reporma para tiyakin na naipatutupad ng tama ang lahat ng proyekto ng gobyerno.

Sa pagpapatuloy ng pagdinig, binigyang-halaga ng kongresista ang mga susunod na hakbang, partikular ang tungkol sa mga nadawit na pangalan ng mga senador sa ma-anomalyang proyekto.

Gayunman, nilinaw ng kongresista na hindi kailangang pwersahin ang mga nabanggit na senador na pumunta sa pagdinig, ngunit mananatili anyang bukas ang Kongreso sakaling gustong magbigay ng sariling pahayag sa komite ang mga nasasangkot na senador.

Tinawag ni Senate President Pro Tempore Panfilo “Ping” Lacson na “faky breaky news” o fake news ang isang “breaking news” post na sinasabing may nagaganap na panibagong hakbang para sa pagbabago ng liderato sa Senado.

Ayon sa senador, layunin ng social media post na linlangin at guluhin ang publiko.

Minamaliit anya ang talino ng mga bagong Senate majority bloc.

Binigyang-diin ni Senator Lacson na may tamang proseso kung nais baguhin ang liderato sa Senado kung saan dapat pirmado ng hindi bababa ng labing tatlong senador ang resolusyon.

Matatandaang nagkaroon na ng pagbabago sa liderato ng Senado, kung saan nahalal si dating Senate minority leader Vicente Sotto III bilang bagong Senate President.

Habang si Senator Lacson naman ay nahalal bilang Senate President Pro Tempore at chairman ng Senate Blue Ribbon Committee.

Napag-alaman na ang nasabing post ay mula sa “OneTV Philippines,” isang “digital news network globally-based” sa Davao City at Pagadian City.

Patuloy na nagiging biktima ang mga Pilipino ng mga scam hub sa buong Southeast Asia.

Sa ulat ng Department of Migrant Workers sa pagdinig ng badyet ng House Committee on Appropriations, na hindi bababa sa 1,434 na Pilipino ang na-recruit para magtrabaho bilang mga scammer.

Sa nasabing bilang, nailigtas at naibalik na ang 332 Filipino mula sa Cambodia, 387 mula sa Laos, at 715 mula sa Myanmar.

Samantala, sa kabila ng pagpataw ng Pilipinas ng alert level 4, na nagbabawal sa deployment ng mga manggagawang Pilipino sa Myanmar, naitala pa rin sa bansa ang pinakamataas na bilang ng mga Pilipinong iligal na na-recruit.

Binigyang-diin naman ni Migrant Workers Secretary Hans Leo Cacdac na ipinasara na ng ahensya ang mga recruitment company na nag-deploy ng mga manggagawa sa mga nasabing bansa at nakikipag-ugnayan na ito sa Department of Justice para tugunan ang mga indibidwal na iligal na nagre-recruit ng mga Pilipino online.

Tinuligsa ng isang abogado ang paggiit ng kampo ni dating Pangulong Rodrigo Duterte na ito ay may deteriorating cognitive condition upang makuha ang panandaliang paglaya sa International Criminal Court (ICC).

Iginiit ni Joel Butuyan, pangulo ng Center for International Law, na walang basehan ang nasabing dahilan dahil mismong mga anak ni Duterte ang nagsabing maayos ang kalagayan nito. Aniya, ito ang malakas na ebidensya kontra sa pangangatwiran ng depensa.

Binigyang-diin din ng prosecutor na kung papayagan ang hiling ng kampo ng Duterte, magiging mas maluwag ang access ni dating Pangulong Duterte sa mga taong sumusubok na humadlang sa mga pagdinig ng ICC.

Binigyang-linaw ng Department of Justice na hindi sila pabor na maging state witness ang mag-asawang Curlee at Sarah Discaya sa kasalukuyang imbestigasyon sa flood control projects.

Ayon kay Justice Secretary Jesus Crispin Remulla, kailangan munang ilahad ng mag-asawa ang buong katotohanan at hindi pwedeng mamili lamang ng nais nilang ikwento.

Dahil dito, sinabihan anya ni Justice Secretary Remulla si Senate President Tito Sotto na kung siya ang magdedesisyon ay hindi niya ibibigay ang state witness status sa mga Discaya.

Dagdag pa ng kalihim, susuriin din ng pamahalaan ang kwalipikasyon ng iba pang tao gaya ng mga batang engineers na sangkot sa kontrobersya bago pagdesisyunan kung kwalipikado ang mga itong maging testigo.

“Dapat may pangil ang mga itinalagang Independent Commission for Infrastructure.”

Ito ang iginiit ni Kabataan Partylist Representative Renee Co matapos pangalanan ng Malacañang ang ilang miyembro ng independent commission para imbestigahan ang mga iregularidad at korapsyon sa flood control at iba pang infrastructure projects ng pamahalaan sa nakalipas na taon.

Ayon sa kongresista, nangangamba ang kanilang grupo dahil sa posibilidad na selective justice kaya’t mahigpit nila itong imomonitor upang matiyak na walang magiging favoritism sa pagresolba o pag-iimbestiga sa naturang kaso.

Ibinabala pa ng kongresista na maaaring magpalala ng tensyon at magbunsod ng malawakang protesta ang kawalan ng patas sa imbestigasyon sa katiwalian ng flood control projects.

Pinangalanan na ng Malacañang ang mga magiging miyembro ng Independent Commission for Infrastructure o I-C-I.

Kabilang sa mga itinalagang commissioners sina dating Department of Public Works and Highways Secretary Rogelio Singson at Certified Public Accountant at Country Managing Partner mula sa SGV and Co na si Rosanna Fajardo.

Maliban sa mga ito, itinalaga rin bilang special adviser ng komisyon si Baguio City Mayor Benjamin Magalong.

Ayon kay Palace Press Officer Undersecretary Claire Castro, kusang-loob na tinanggap ng mga napiling miyembro ang kanilang tungkulin.

Binigyang-diin pa ni Usec. Castro na walang sinuman sa mga miyembro ng I-C-I ang konektado sa mga ahensyang kasalukuyang iniimbestigahan ukol sa maanomalyang flood control projects sa bansa.

Samantala, nakatakda namang ianunsiyo ni Pangulong Ferdinand Marcos Jr. kung sino ang magiging chairman ng naturang komisyon sa mga susunod na araw.