NATIONAL NEWS

Binigyang-diin ng isang psychologist na malaki ang epekto sa tiwala ng mamamayan ang mga isyung may kinalaman sa katiwalian, lalo na kung ito ay kinasasangkutan ng mga lokal na lider.

Ayon kay Dra. Camille Garcia, bagama’t nagiging mas mapanuri ang mga Pilipino, madali pa rin silang magpatawad at makalimot, dahilan para magpatuloy ang cycle ng korapsyon sa bansa.

Dagdag pa niya, ang nepotismo, patronage politics, at kultura ng utang na loob ay patuloy ding nakakaapekto sa pagpili ng mga botante, kaya’t nananatiling hamon ang pagkakaroon ng tunay na pananagutan sa gobyerno.

Naniniwala ang law professor at 1Sambayan convenor na si Atty. Howard Calleja na mas naging maganda ang tyasang magpatuloy ang impeachment laban kay Vice President Sara Duterte.

Ito’y kasunod ng pagpapalit ng liderato sa Senado, kung saan si Senador Vicente Sotto III ang naging bagong Senate President, na nanggaling sa minorya.

Gayunman, iginiit ni Atty. Calleja na dapat pa ring hintayin ang desisyon ng Korte Suprema sa nakabitin na motion for reconsideration kaugnay sa impeachment case ni V.P. Sara.

Sinabi naman ni Atty. Calleja na sakaling matuloy ang impeachment ay maaari pa ring maging senator-judge ang ilang senador na nadadawit sa sinasabing maanomalyang flood control projects.

Umabot na sa 20.68 million pesos ang nagastos ng Office of the Vice President sa mga pagbiyahe ni VP Sara Duterte sa loob at labas ng bansa mula nitong Enero hanggang Hulyo.

Ayon kay OVP Budget Division Chief Atty. Kelvin Gerone Tenido, 13.2 million pesos ang nagastos para sa local travels ng bise presidente o 40% ng kabuuang alokasyon; habang 7.4 million pesos naman sa mga foreign travels o 25% ng kabuuang alokasyon.

Nilinaw ni Atty. Tenido na personal na binabayaran ni VP Sara ang kanyang mga pansariling gastusin at ang inilalabas na pera ng OVP ay para sa mga security personnel at civilian personnel.

Sinabi rin ng OVP official na mayroon pang 41.61 million pesos na natitirang travel fund ang tanggapan sa ilalim ng 2025 budget.

Welcome para kay House Infrastructure Committee Co-Chairman at Bicol Saro Partylist Rep. Terry Ridon, na itigil ang isinasagawang pagdinig hinggil sa isyu ng flood control projects.

Ito’y para bigyang daan ang pagsisimula ng trabaho ng Independent Commission for Infrastructure o ICI matapos lagdaan ni Pangulong Ferdinand Marcos Jr. ang Executive Order No. 94 para sa pagbuo ng komisyon.

Ang ICI ang siyang tututok sa imbestigasyon ng anomalya sa flood control projects at iba pang infrastructure projects ng gobyerno kung saan, prayoridad nito ang mga proyekto sa nakalipas na sampung taon.

Ayon kay Cong. Ridon, bukas din ang komite na makipagtulungan sa ICI upang matukoy ang mga sangkot sa katiwalian sa proyekto ng gobyerno.

Umaasa si Ridon na makakapag-usap sa susunod na linggo ang liderato ng Kamara at ang mataas na kapulungan na magkaroon ng joint resolution para isuspinde ang proceedings ng Infra-Comm at suportahan ang gagawing hakbang ng independent body.

Handa ang House Infrastructure Committee na anyayahan sa pagdinig ang mga mambabatas na masasangkot sa isyu ng flood control projects kung mayroong legal na basehan ang mga kritikong nagdadawit dito.

Kasunod ito ng panawagan ni Cavite 4th District Rep. Kiko Barzaga na maimbestigahan si House Speaker Martin Romualdez kaugnay sa isyu ng maanomalyang flood control projects dahil imposible ayon kay Barzaga na wala itong alam sa kontrobersiya.

Iginiit ni Cong. Ridon, na katulad ng umiiral na protocols at bilang bahagi ng imbestigasyon ng komite… tutugon sila sa nais ng kapwa kongresista basta’t makapagbigay ito ng kumpletong detalye na may kinalaman ang lider ng Kamara sa isyu ng flood control.

Aniya, bago pag-aralan ng Infra-Comm ang mga pahayag ni Barzaga, kailangan munang maglatag ng tamang alegasyon ang kapwa kongresista.

Nasawi ang isang 22-anyos na motorcycle rider, matapos masangkot sa aksidente ang minamaneho nitong motorsiklo at mabangga ng isang van sa Antipolo City, Rizal.

Batay sa imbestigasyon, habang binabagtas ng biktima ang kahabaan ng Marcos Highway, bigla umanong sumabit sa gulong ng motorsiklo ang laylayan ng kaniyang kapote.

Dahil dito, nagpagewang-gewang ang rider matapos mawalan ng kontrol, hanggang sa mapunta ito sa kabilang linya, kung saan nabangga ito ng kasalubong na van.

Matapos ang aksidente, isinugod pa sa ospital ang biktima subalit idineklarang dead on arrival dahil sa tindi ng pinsalang tinamo sa kaniyang ulo.

Samantala, nasa kustodiya na ng mga awtoridad ang driver ng van at nahaharap sa kaukulang kaso.

Isang “Pandora’s box” ang nabuksan sa isinasagawang imbestigasyon sa maanomalyang flood control projects ng Department of Public Works and Highways.

Ayon kay UST professor at political analyst, Dr. Froilan Calilung, magandang pagbubukas sa kaso nang ilantad ng mga testigo at resource person ang mga malalaking pangalan na sangkot sa kaso upang mabantayan kung sino-sino ang talagang dapat imbestigahan at tutukan.

Dagdag pa ni Dr. Calilung, aasahang mas marami pang matutuklasang anomalya sa mga proyekto ng gobyerno lalo’t isang proyekto mula sa isang kagawaran pa lamang ang sumasalang sa malalim na imbestigasyon.

Samantala, binigyang-diin din ng propesor ang mahalagang papel ng taong bayan bilang katuwang ng pamahalaan sa pagsugpo ng pinakamalaking kaso na kinahaharap ng bansa upang mapanagot ang mga opisyal na nagbubulsa sa kaban ng bayan.

Mas mabigat ang kaso ng maanomalyang flood control projects kumpara sa PDAF scam o pork barrel scam na kinasasangkutan ni Janet Lim Napoles.

Ayon kay Bicol Saro Party-list Representative Terry Ridon, umabot lamang sa milyon ang napag-usapan sa kaso ni Napoles habang inaabot na sa bilyon-bilyon ang sinasabing maanomalyang proyekto.

Dahil dito, binalaan ng kongresista ang mga matataas na opisyal na mag-ingat sa paglaglag sa kanilang mga tauhan lalo’t sa kaso ni Napoles, hamak na tauhan lang din ang nagturo at nagpangalan sa mga opisyal sa likod ng PDAF scam.

Binigyang-diin din ng kongresista ang malaking papel ng publiko sa kontrobersyal na flood control lalo’t nagsisimula nang kumanta ang tulad ng mga batang engineers na sina JP Mendoza at Brice Hernandez.