Mariing iginiit ng House Prosecution Panel na dapat magpatuloy ang impeachment trial laban kay Vice President Sara Duterte matapos umanong mabigo ang kampo nito na sagutin ang mga ebidensyang nakapaloob sa Articles of Impeachment.
Ayon kay Trial Spokesman at Lanao del Sur Rep. Zia Alonto Adiong, nakatuon lamang ang sagot ng depensa sa mga usaping procedural, teknikal, at konstitusyonal na layon lamang ibasura ang kaso sa halip na sagutin ang mga alegasyon.
Sinabi ni Adiong na hindi na kailangan pang magsumite ng karagdagang pleading ang prosekusyon dahil matagal nang kinukuwestiyon ng depensa ang proseso at legalidad ng impeachment.
Dagdag pa niya, inaasahan nilang magiging sentro ng depensa ang paghahain ng iba’t ibang technical objections at motions kapag nagsimula na ang aktwal na paglilitis.
Sa ngayon, naghahanda na ang House Prosecution Panel para sa nakatakdang pre-trial conference kung saan ilalatag ang mga panuntunan sa paglilitis, kabilang ang pagsusumite ng mga dokumento, ebidensya, at listahan ng mga testigo.
Iginiit ni Adiong na mahalagang hakbang ang pre-trial upang malinaw na maipakita sa publiko kung paano isasagawa ang impeachment trial sa Senado.—sa panulat ni Anjo Riñon
