NATIONAL NEWS

Naniniwala ang political analyst na si Dr. Dennis Coronacion na may posibilidad na muling mabuhay ang impeachment case ni Vice President Sara Duterte matapos ang biglaang pagpapalit ng liderato sa Senado.

Ipinunto ni Coronacion, mula sa UST Political Science Department, na ang malaking pagbabago sa hanay ng mga senador mula sa mayorya at minorya ay posibleng magbigay-daan para isulong muli ang impeachment.

Sa ngayon, ang malinaw aniya ay hawak ng bagong liderato ng nagbabalik na si Senate President Tito Sotto ang numero upang itulak ang pagpapatalsik sa Pangalawang Pangulo na ilang buwang naunsyami sa panahon ni dating Senate President Chiz Escudero.

Posibleng dumaan sa butas ng karayom ang sinumang magtatangkang magpalsik kay Martin Romualdez bilang House Speaker.

Tugon ito ni Dr. Dennis Coronacion ng UST Political Science Department sa tanong kung posible rin bang mangyari sa Mababang Kapulungan ang nangyaring kudeta sa Senado matapos ang biglaang pagpalit ni Senador Tito Sotto kay dating Senate President Chiz Escudero.

Sa gitna ito ng magkahiwalay na imbestigasyon ng dalawang kapulungan sa sinasabing maanomalyang flood control projects.

Bagaman mas madali aniyang ilunsad ang kudeta sa Senado, habang mahirap namang tibagin ang liderato ni Speaker Romualdez sa Kamara, hindi malayong mangyari rin ang kaparehong senaryo sakaling dumami ang madismaya sa pamumuno ng pinsan ni Pangulong Marcos.

Ikinabahala ni House Infrastructure Committee co-chairman at Bicol Saro Party-list Rep. Terry Ridon ang biglaang paglipat kay DPWH-Bulacan 1st District Assistant Engineer Brice Ericson Hernandez sa Pasay City Jail mula sa Philippine National Police custodial center.

Binigyang-diin ni Cong. Ridon na hindi pa akusado si Hernandez at nananatili pa rin itong resource person ng komite.

Anila, bagama’t iginagalang nila ang pasya ng Senado… sa laki ng mga rebelasyong isiniwalat ni Hernandez sa pagdinig ng infra-comm, dapat ay irekonsidera ng mataas na kapulungan ng Kongreso ang pagpapanatili sa dating assistant district engineer sa PNP custodial center.

Matatandaang ibinunyag ni Hernandez ang mga sinasabing matataas na opisyal na sangkot sa katiwalian sa flood control projects sa Bulacan.

Sinabi ni Rep. Ridon na pag-aaralan nila ang susunod na hakbang hinggil sa usapin, kung saan isa sa maaaring gawin ay mabigyan ito ng sariling lugar sa nasabing kulungan at ihiwalay sa iba pang detainees; o kaya’y dalhin ito sa neutral location para matiyak ang kaligtasan gaya ng PNP custodial center o sa mismong Senado.

Nilinaw naman ni Rep. Ridon na wala pa siyang impormasyon kung nagkausap na sina Senate President Vicente Sotto III at House Speaker Martin Romualdez kaugnay rito.

Hindi umubra ang mga palusot ng kontratistang si Curlee Discaya na kaya lang sila napilitang magbigay ng lagay sa mga politiko ay dahil sa takot na mawalan ng hanapbuhay.

Sa magkakahiwalay na interpelasyon nina Batangas Rep. Gerville Luistro, Sagip Party-list Rep. Henry Marculeta at Bicol Saro Party-list Rep. Terry Ridon, ang co-chairman ng infra-comm, natanong si Discaya kung kailan nagsimula at kanino sila nagbigay ng lagay para sa mga proyekto.

Nagisa si Discaya nang tanungin ni Luistro kung bakit tila mga personalidad na nakaupuesto lamang noong 2022 ang kanyang mga pinangalanan na may awtomatikong porsyento sa mga proyekto, gayong 2016 pa lang ay kasama na sila sa may pinakamalalaking nakakukuha ng kontrata sa gobyerno.

Paliwanag ni Discaya, mayroon din namang nasasangkot na mga opisyal ng DPWH na pumipitik ng porsyento pero walang politiko.

Pero nang usisain ni co-chair Ridon si DPWH Usec. Ador Canlas kung kailan ipinatupad ang naturang polisiya, sinabi ng opisyal na noong 2003 pa ito ipinatupad habang taong 2013 naman nang maglabas ng department order.

Malinaw aniya, na sanay-na-sanay ang mag-asawang Discaya sa paggamit ng kasinungalingan na layong lituhin ang imbestigasyon.

Naglabas na ng subpoena ang Department of Justice laban sa businessman na si Atong Ang at aktres na si Gretchen Barretto hinggil sa kaso ng mga nawawalang sabungero.

Kabilang sa inisyuhan ng subpoena ay si dating National Capital Region Police Office General Jonnel Estomo at labing walong pulis pa.

Una nang itinanggi nina Ang, Barretto at Estomo ang mga alegasyon sa kanila.

Samantala, nakatakda ang pagdinig sa nasabing kaso sa ika-labing walo ng Setyembre.

Sumirit pa sa 2.59 milyong Pilipino ang bilang ng mga walang trabaho sa bansa sa pagtatapos ng buwan ng Hulyo ng kasalukuyang taon.

Ito ayon sa Philippine Statistics Authority, ay higit na mataas kumpara sa pinakahuling datos ng ahensya noong Hunyo, kung saan nasa 1.95 milyong Pilipino ang walang trabaho.

Ayon kay PSA chief at national statistician Claire Dennis Mapa; katumbas ito ng 5.3% unemployment rate mula sa kabuuang 48.64 milyong Pilipinong tumugon sa Labor Force Survey na aktibong naghahanap ng trabaho sa nasabing buwan.

Mas mataas ito kumpara sa 3.7% na naiulat noong nakaraang buwan.

Ibig sabihin, sa bawat isanlibong Pilipino, tinatayang limampu’t tatlo ang bilang ng walang trabaho.

—Sa panulat ni Jasper Barleta

Duda si Pangulong Ferdinand Marcos Jr. sa alegasyon ng mga Discaya na sangkot si Speaker Martin Romualdez sa anomalya sa flood control projects.

Ito, ayon kay Pangulong Marcos ay dahil marami ang nabibiktima ng name-dropping lalo na sa mga nasa matataas na posisyon sa gobyerno.

Ayon sa punong ehekutibo, dapat maging maingat ang mga tao at huwag masyadong gullible o madaling mapaniwala.

Gayunpaman, sinabi ng presidente na titingnan ang bagay na ito para malaman kung may sapat na basehan ang pagdadawit sa Speaker.

Dagdag pa ng Pangulo, bagama’t hindi krimen ang pagne-name-drop, krimen naman ang paggamit ng pangalan ng iba para magnakaw.

—Sa panulat ni Jasper Barleta

Kapwa pumayag sina dating Department of Public Works and Highways Bulacan district engineers Brice Hernandez at Henry Alcantara na isumite ang kanilang Statements of Assets, Liabilities, and Net Worth sa Kamara.

Kasabay nito, pumayag si Hernandez na isumite ang kanyang bank at phone records upang patunayan ang kanyang mga pahayag sa nakaraang pagdinig ng House Infra Committee.

Tumanggi naman si Alcantara na magbigay ng waiver para ma-access ang kanyang accounts at text messages.

Dahil dito, iginiit ni Akbayan Party-list Rep. Chel Diokno na mahalagang maisumite sa kanila ang mga dokumento at records para masuportahan ang alegasyon ng mga nabanggit na district engineers hinggil sa maanomalyang flood control projects.

—Sa panulat ni John Riz Calata