NATIONAL NEWS

Itinanggi ni Pasig City Lone District Rep. Roman Romulo ang akusasyong tumanggap siya ng “kickback” mula sa mga government projects ng mag-asawang Pacifico at Sara Discaya.

Ayon kay Congressman Romulo, walang basehan ang mga alegasyon laban sa kanya, lalo’t inamin mismo ng mga Discaya sa Senate hearing na wala silang direktang komunikasyon sa kanya.

Iginiit ng kongresista na tsismis lamang ang pagkakasama ng kanyang pangalan sa sinasabing ledger ng mag-asawang Discaya.

Maaari anyang ganti ito sa kanya ng mga Discaya matapos matalo ng kanyang kapartidong si Pasig City Mayor Vico Sotto si Sara sa mayoralty race nitong nakaraang midterm elections.

Binigyang-diin pa ng kongresista na hindi siya kailanman nakialam sa bidding ng Department of Public Works and Highways at walang dahilan para siya’y madawit sa kontrobersya.

Nanindigan si Pasig City Mayor Vico Sotto na lantaran ang kasinungalingan ng mag-asawang sina Curlee at Sarah Discaya kaugnay sa isyu ng maanomalyang flood control projects.

Sa paginig ng House Infrastructure Committee, sarkastikong sinabi ni Mayor Vico Sotto kung paano na a-afford ng pamilyang Discaya ang mga sasakyan at ang hundred-million-peso jade display sa kanilang opisina, kung maliit na porsyento lamang ang kita nila sa mga proyekto ng pamahalaan.

Dagdag pa ng alkalde na “buti na lang ang isda ay nahuhuli sa sariling bibig,” dahil ang Discaya mismo ang nagpapahayag ng ebidensya laban sa kanilang sarili sa mga interviews nito noon.

Naniniwala si Mayor Sotto na hindi na bago sa mag-asawang Discaya ang pagsisinungaling, habang pinag-iingat naman ng alkalde ang publiko sa paglalaglagan ng mga senador, kongresista, contractor at DPWH officials na aniya ay tactics lang upang lituhin at guluhin ang katotohanan sa isyu ng flood control.

Mariing itinanggi ni Senador Jinggoy Estrada ang pambibintang ni dating DWPH-Bulacan assistant district engineer Brice Hernandez na siya ay tumanggap ng anumang halaga mula sa mga flood control projects.

Binigyang-diin ni Senador Estrada na tulad ng mga sinasabing guni-guning flood control projects, guni-guni rin ang 30 percent na umano’y commitment niya sa mga proyekto.

Ipinunto ng senador na ang mga binanggit na proyekto ni Hernandez sa pagdinig ng Kamara ay nakasaad sa 2025 General Appropriations Act, kaya kasinungalingan ang kanyang pagkakaugnay sa naturang isyu at plano lamang na siraan siya sa publiko.

Iginiit ni Sen. Estrada na hindi lamang niya hinahamon si Hernandez na sumailalim sila sa lie detector test, kundi patunayan din ang bawat alegasyon na binitawan nito sa Mababang Kapulungan ng Kongreso.

Epektibo na ngayong buwan ang bawas-singil sa kuryente ng Meralco ngayong buwan.

Batay sa anunsyo ng Meralco, baba sa 19 centavos sa kada kilowatt per hour.

Kaya’t nasa 13 pesos 08 centavos kada kilowatt per hour ang kabuuang rate para sa isang pangkaraniwang pamilya.

Ayon kay Meralco Vice President at Head ng Corporate Communications Joe Zaldarriaga, para sa mga tipikal na customer na kumokonsumo ng 200 kWh kada buwan, katumbas ito ng 37 pesos na bawas sa kanilang kabuuang bill.

Isa sa tinitignang dahilan ng bawas singil sa kuryente ay ang mas mababang generation charge mula sa mga Independent Power Producer (IPP) at mga Power Supply Agreement (PSA).

Pinatatanggal na rin sa serbisyo ang isa pang opisyal ng Department of Public Works and Highways dahil sa pagkakasangkot nito sa maanomalyang flood control projects.

Ayon kay Public Works and Highways Secretary Vince Dizon, gumugulong na ang dismissal proceeding ni Project Engineer Paul Jayson Duya mula sa First District Office ng DPWH Bulacan.

Una nang pinasisibak ni Secretary Dizon sina District Engineer Henry Alcantara, habang gumugulong na rin ang dismissal kina Assistant District Engineer Brice Ericson Hernandez at Construction Section Chief Jaypee Mendoza.

Kaya naman, inaantabayanan sa mga susunod na araw ang mga papel o dokumento para sa dismissal ng mga nabanggit na opisyal ng kagawaran.

Posibleng dumaan na sa karagdagang driving lessons at pagsusulit ang mga nagnanais kumuha ng professional driver’s license.

Ito ay matapos inihain ng Land Transportation Office ang panukalang pagbabago sa proseso ng aplikasyon.

Sa isinagawang public consultation, sinabi ni LTO Chief Assistant Secretary Vigor Mendoza the Second na isusumite na sa Department of Transportation ang draft proposal.

Sa kasalukuyan, sapat nang makapasa sa theoretical driving exam ang mga aplikanteng kukuha ng professional license para sa light vehicles gaya ng motorsiklo, tricycle, kotse at van. Ngunit sa bagong panukala, kinakailangan munang sumailalim ang mga aplikante sa apat na oras na practical driving course na may kasamang lecture sa road safety at courtesy.

Bukod dito, kailangan ding pumasa ang aplikante sa practical driving test upang masuri ang kanilang aktwal na kakayahan sa pagmamaneho.

Saklaw ng sistema ang lahat ng uri ng sasakyan, kabilang ang motorsiklo, jeepney, bus, at van, upang masiguro ang mas mataas na antas ng kaligtasan sa kalsada.

Inatasan ng Department of Transportation ang Land Transportation Office na ipatawag ang dalawang engineer mula sa Department of Public Works and Highways matapos mabunyag sa imbestigasyon ng Senado hinggil sa flood control projects na gumamit ang mga ito ng pekeng driver’s license para makapasok sa mga casino.

Agad na iniutos ni Acting Transportation Secretary Giovanni Lopez sa LTO na beripikahin ang lisensyang iniharap sa naturang pagdinig.

Batay sa paunang imbestigasyon ng LTO, walang record ng driver’s license na nakapangalan kina Marvin Santos de Guzman at Joseph Castro Villegas, ang mga alyas na ginamit ng dalawang DPWH engineers na dumalo sa Senate hearing.

Inatasan din ang LTO na maglabas ng show cause order laban sa mga sangkot at magsumite ng ulat sa Senate Blue Ribbon Committee.

Binigyang-diin ng DOTr na nananatili itong nakatuon sa pagpapanatili ng integridad at pananagutan sa lahat ng attached agencies nito at handang makipagtulungan sa anumang imbestigasyon na kailanganin ang kanilang tulong.

Tinawag na garapalan ni Pangulong Ferdinand Marcos Junior ang korapsyon sa mga proyektong pang-imprastraktura ng gobyerno.

Ayon kay Pangulong Marcos, nababahala na siya sa lawak ng katiwalian dahil hindi na ito itinatago at tila normal na ang pagbubulsa ng pera ng bayan.

Dagdag pa niya, hindi naman daw basta lang lumitaw ang katiwalian kundi deka-dekada nang umuusbong ang ganitong problema, kaya kailangang gumawa ng mas matibay na mekanismo laban dito, kabilang na ang pagpasa ng bagong batas at pagbabago sa sistema ng pamahalaan para hindi na ito maulit.

Sa ngayon, patuloy ang pagbuo ng isang independent commission sa pamamagitan ng executive order para magsagawa ng imbestigasyon sa mga iregularidad sa Department of Public Works and Highways.

Tiniyak din ni Pangulong Marcos na kakasuhan ang lahat ng indibidwal at kumpanyang mapapatunayang sangkot sa mga maanomalyang proyekto.