Nanawagan si Pangulong Ferdinand Marcos Jr. na mabigyan ng mental health assessment at suporta ang mga estudyanteng naapektuhan ng magnitude 7.8 na lindol sa Mindanao.
Ayon kay Marcos, handang tumulong ang Department of Health (DOH) sa mga estudyanteng nangangailangan ng psychological support at counseling.
Dagdag pa ng Pangulo, sasailalim din sa espesyal na pagsasanay ang mga guro upang matukoy at matulungan ang mga mag-aaral na nakararanas ng stress at trauma dulot ng sakuna.
Mahigit 3.2 milyong estudyante ang naapektuhan ng lindol na tumama sa Maasim, Sarangani noong unang araw ng pasukan. Samantala, umabot na sa 53 ang naiulat na nasawi batay sa pinakahuling tala ng Bureau of Fire Protection.
“Yung kausap ko ‘yung mga teacher, at sinabi ko sa kanila, alalahanin nila na traumatizing itong experience para sa mga estudyante, para sa mga bata. So, bantayan din nila. Kasi kung minsan hindi nagsasabi ‘yung bata. Kailangan, sabi ko, bantayan ninyo nang mabuti. ‘Pag may nakita kayo na nangangailangan ng tulong, puwede naman kami tumulong sa DOH,” — PBBM
