NATIONAL NEWS

Ikinakasa na ng Commission on Elections ang criminal complaints laban sa mga kandidatong tumanggap ng campaign donations mula sa mga government contractor.

Ito ang kinumpirma ni Comelec Chairman George Erwin Garcia matapos aminin ni Centerways Construction President Lawrence Lubiano na nagbigay siya ng 30 million peso campaign donation kay Senate President Francis Escudero noong 2022 elections.

Gayunman, nilinaw ng poll body chief na nakikipag-ugnayan pa sila sa Department of Public Works and Highways upang mabatid kung ang mga kontratistang nadadawit sa maanomalyang flood control projects ay may kaugnayan din sa pamimigay ng donasyon sa mga kumandidato noong mga nakaraang halalan.

Tiniyak naman ni Chairman Garcia na hindi lamang limitado sa mga nanalong senador o kongresista hanggang sa pinaka-mababang halal na posisyon ang ikinakasa nilang kaso lalo’t saklaw din ng Omnibus Election Code maging ang mga natalo sa mga nadaang eleksyon.

 Handa ang liderato ng Kamara na makipagtulungan sa nagbabalik na Senate President na si Sen. Vicente Sotto the Third para sa pagsusulong ng mga reporma at programa ng administrasyon ni Pangulong Ferdinand Marcos Jr.

Ito ang tiniyak ni House Speaker Martin Romualdez kasabay ng pagpapabot ng pagbati kay Senate President Sotto.

Ayon kay Speaker Romualdez, ang maraming taong serbisyo, karanasan, at matatag na pamumuno ni Sotto sa Senado ay tiyak na makapagbibigay ng gabay sa mataas na kapulungan sa mapanghamong panahon, partikular na sa mga mambabatas.

Binigyang-diin ng lider ng Kamara na sa ngayon, higit na kailangan ang pagkakaisa ng Senado at Kamara para maihatid ang ginhawa sa taumbayan.

Tiwala si Speaker Romualdez sa liderato ni S.P. Sotto at inaasahan niyang magiging malakas na katuwang ni Pangulong Marcos ang Kongreso para pagsusulong ng Bagong Pilipinas.

Kinumpirma ni Justice Secretary Jesus Crispin Remulla na posibleng tumestigo o maging state witness si dating PCSO General Manager at retired police colonel Royina Garma laban kay dating Pangulong Rodrigo Duterte na nahaharap sa kasong crimes against humanity.

Ayon kay Sec. Remulla, pumayag si Garma na tumestigo sa confirmation of charges ng International Criminal Court sa darating na Setyembre a-bente tres.

Ito aniya ang dahilan kung bakit nagtungo si Garma sa Malaysia para makipagpulong sa mga kinatawan ng ICC.

Dagdag pa ng kalihim, si dating Senador Antonio Trillanes the Fourth ang kanilang nakausap kaugnay sa pagiging state witness ni Garma.

Nabatid nitong nakaraang Sabado ay dumating sa Pilipinas si Garma mula sa Los Angeles, California.

Maghahain din ng kaso sa Korte Suprema ang Lawyers for Commuters Safety and Protection laban sa mga sangkot na kontraktor sa flood control projects.

Kasunod ito ng insidente ng paglubog sa pagbaha ang Metro Manila na nagdulot perwisyo sa mga motorista at pasahero.

Ayon kay Atty. Ariel Inton, LSCP president, kabilang sa mga sasampahan nila sa Korte Suprema ay sina dating DPWH Secretary Manuel Bonoan at Quezon City congressman na mapapatunayang may pagkukulang o inirereklamo ng mga complainants.

Kung ginampanan lang aniya sana ng mga legislators ang kanilang mga tungkulin ay walang mapeperwisyo sa malawakang pagbaha.

Kabilang sa mga complainants ay ang mga residente ng Quezon City na lubhang naapektuhan ng baha.

Una nang naghain ang Commission on Audit (COA) at ang DPWH ng limang fraud audit reports sa Office of the Ombudsman.

Nilinaw ng contractor na Curlee Discaya na wala siyang direktang ugnayan kay House Speaker Martin Romualdez at Ako Bicol Partylist Rep. Elizaldy Co.

Kabaligtaran ito ng sworn statement ni Discaya sa naging pagdinig kahapon sa Senate Blue Ribbon Committee na may mga kongresistang sangkot sa isyu ng flood control projects na aniya’y tumatanggap ng porsyento.

Ayon kay Discaya, hindi siya nagkaroon ng anumang klase ng transaksyon kina Speaker Romualdez at Rep. Co.

Aniya, kaya niya lang nabanggit sina Speaker Romualdez at Rep. Co ay dahil sila ang mga binabanggit ng mga kausap niyang politiko na kailangang ibigay na agad ang obligasyon dahil pinakukuha na aniya ito nina Romualdez at Co.

Naniniwala si Discaya na ginagamit lang ng mga politiko ang pangalan nila Speaker Romualdez at Co na may public interest.

Aniya, wala siyang kapasidad para masabing kina Speaker Romualdez at Rep. Co napupunta ang mga porsyento sa implementasyon ng proyekto ng gobyerno.

Pasig City Mayor Vico Sotto, nakarating na sa People’s Center ng Batasang Pambansa para dumalo sa ikalawang pagdinig ng House Infrastructure Committee ngayong araw.

Haharap sa komite si Sotto na binubuo ng Committee on Public Accounts; Public Works and Highways; at Good Government and Public Accountability na nag-iimbestiga sa palpak at maanomalyang flood control projects ng DPWH.

Ayon kay Mayor Sotto, inimbitahan siya ng komite na dumalo para magbigay ng impormasyon sa kaniyang nalalaman hinggil sa isyu ng mga proyekto ng flood control.

Matatandaang sa ginanap na hearing kahapon ng Senate Blue Ribbon Committee, kasama sa listahan ng mga kongresista na naka-deal umano ng mag-asawang Pacifico at Sarah Discaya ang pangalan ni Pasig Rep. Roman Romulo na agad namang pinabulaanan ng kongresista.

Naniniwala ang kampo ni Romulo na bahagi ito ng pulitika dahil matatandaang naglaban sa mayoral race sa Pasig City sina Vico Sotto at Sarah Discaya.

Samantala, inaasahan ring makikiisa at magbibigay ng kani-kanilang statement ang mga kongresista na pinangalanan din ng mag-asawang Discaya sa Senate hearing.

Una nang pinadalhan ng subpoena ng Infra-Comm ang mga Discaya dahil sa no show o hindi pagsipot sa nakalipas na pagdinig.

Tinawag na “hypocritical” ng Alliance of Concerned Teachers ang panawagan ni Vice President Sara Duterte sa mga guro na palakasin ang critical thinking ng mga estudyante.

Ayon kay ACT Chair Vladimer Quetua, walang “moral right” ang pangalawang pangulo na magsalita tungkol sa critical thinking lalo’t napuno mismo ng kontrobersya ang panunungkulan niya bilang kalihim ng Department of Education.

Kabilang sa mga kontrobersyang kinaharap ng DepEd sa pamumuno ng bise presidente ang confidential funds, pagtutulak ng mandatory ROTC, red-tagging laban sa mga guro, at ang sinasabing militarisasyon ng kagawaran.

Maliban dito, nananatiling malubha rin ang mga problema sa edukasyon noong dalawang taon na nasa DepEd ang VP, kabilang ang kakulangan ng silid-aralan, libro at iba pang learning materials, hindi nababayarang benepisyo ng mga guro, at malawakang mismanagement ng budget.

Tiniyak ni Public Works Secretary Vince Dizon si Manila 2nd District Representative Rolando Valeriano na magiging available ang flood control master plan para sa National Capital Region sa susunod na taon.

Sa deliberation ng proposed 881 billion pesos 2026 DPWH budget, inihayag ni Sec. Dizon na manggagaling ang pondo ng naturang master plan mula sa Asian Development Bank.

Ipinaliwanag din ng kalihim na habang tinatrabaho ng ADB ang pondo, magsasagawa pansamantala ang DPWH ng mabilisang solusyon para linisin ang mga waterways at estero sa Metro.

Dagdag pa ni Sec. Dizon, posibleng abutin ng ilang taon para makabuo ng mas detalyadong engineering plans at para sa roll out nito.