NATIONAL NEWS

Aminado ang Cybercrime Investigation and Coordinating Center (CICC) na hirap silang tugisin kung sino ang mga nasa likod ng deepfake videos, lalo na ang mga ginagamit sa pornography o kalaswaan.

Ayon kay CICC Acting Executive Director Aboy Paraiso, madalas ay nasa labas ng bansa ang mga salarin sa likod ng ipinapakalat na deepfake.

Anya, ibang kaso ito kumpara sa pagtunton ng fake news at illegal gambling activities, dahil mahirap ma-detect ang deepfake sa social media.

Gayunman, nagpapasalamat naman ang opisyal sa mga social media platforms gaya ng Meta, sa mabilisang pag-aksyon para i-take down ang deepfake materials.

Matatandaang kamakailan lang ay nabiktima rin ng isang malaswang deepfake ang aktres na si Angel Aquino; gayundin ang anak ng social media influencer na si Queen Hera, kung saan ginamit naman ang larawan ng kanyang anak sa dark web.

Kapwa nagpahayag ng pagkondena ang dalawa laban sa deepfake porn sa kanilang naging pagdinig sa Senate Committee na pinamunuan ni Senator Risa Hontiveros na nag-iimbestiga sa nakababahalang deepfake.

 Tinutugunan na ng Department of Education ang isyu ng mental health ng mga mag-aaral at guro sa mga pampublikong paaralan.

Sa kabila ng kakulangan ng guidance counselors at mataas ang requirement para sa posisyon, ayon kay Education Secretary Sonny Angara, magtatatag ang DepEd ng mas mababang antas na posisyon partikular ang guidance counselor associates upang hindi manatiling bakante ang libo-libong posisyon sa mga paaralan.

Magbibigay rin ang kagawaran ng karagdagang pagsasanay sa mga guro para sa pagtugon sa mga problemang emosyonal at sikolohikal ng mga mag-aaral.

Ibinalik ng Bureau of Customs ang patakaran na agad na nagsususpinde sa mga tiwaling importer at broker kahit sa unang paglabag pa lamang.

Sa ilalim ng muling pagpapatupad ng Customs Memorandum Order 12-2021, maaaring patawan ng hanggang siyamnapung araw na suspensyon ang sinumang mahuling nagpasok ng ipinagbabawal o restricted na produkto nang walang permit o clearance.

Kasabay nito, mawawalan na ng bisa ang Memorandum 06-2024 na pansamantalang nagpatigil sa otomatiko ng suspensyon hangga’t walang administratibong kaso.

Ang mga masasangkot ay iisyuhan din ng Warrant of Seizure and Detention para sa kanilang mga kargamento.

Layunin ng hakbang na palakasin muli ang kapangyarihan ng BOC laban sa mga paglabag sa accreditation habang tinitiyak na hindi maaapektuhan ang lehitimong kalakalan.

Binigyang-diin ni Senate Committee on Basic Education Chairman Bam Aquino ang koneksyon ng Department of Public Works and Highways sa kasalukuyang kakulangan ng classroom sa mga paaralan sa bansa.

Ayon kay Senador Aquino, taong 2018 lamang nagsimulang lumubo ang classroom shortage, kasabay ng panahong inilipat sa DPWH ang pamamahala sa pagpapatayo ng mga silid-aralan.

Dahil dito, inihain ng senador ang panukalang Classroom Acceleration Program kung saan tinatanggal sa Public Works Department ang paggawa ng mga classroom at direkta itong ipapasa sa mga local government unit at non-government agencies na may magagandang track record.

Iginiit din ni Senador Aquino na tapyasan at ilaan na lamang ang budget sa mga flood control project sa mga lugar na talagang may pagbaha at ilipat ang ibang bahagi ng budget para sa mga programa na makakatulong sa education sector.

Binigyang-diin ni dating Internal Revenue Commissioner, Atty. Kim Henares na mismong ang publiko ay maaaring dumulog at maghain ng reklamo sa pamahalaan kaugnay sa maanomalyang flood control projects.

Sa panayam ng DWIZ, ipinaliwanag ni Atty. Henares na bukod sa ahensyang may hawak ng proyekto, maaaring isampa ang reklamo sa Ombudsman o sa Commission on Audit para isagawa ang pagsisiyasat.

Dagdag pa ng dating opisyal na welcome din sa mga himpilan ang anonymous complaints, at sinabing dadaan din ito sa malalim na pagsusuri at pagberipika.

Tinukoy din ng dating BIR Chief na may kapangyarihan ang BIR na magsagawa ng motu proprio na imbestigasyon laban sa mga contractor o kumpanyang posibleng sangkot sa anomalya; maaari aniyang silipin kung tama ang kanilang pagbabayad ng buwis lalo na kung may mga indikasyong kumikita sila mula sa mga iregular na proyekto ng gobyerno.

Tinululan ng Teachers Dignity Coalition ang inihahaing panukala ni Senador Jinggoy Estrada na tuluyang tanggalin ang K to 12 program ng Department of Education.

Ayon kay TDC President Benjo Basas, hindi magiging solusyon ang naturang panukala at mas magiging komplikado lamang ang sistema ng edukasyon dahil dito.

Gayunman, aminado si Basas na kailangan pa ring suriin ng mga ahensya ng gobyerno at mga mambabatas kung saan sila nagkulang sa pagpapatupad ng programa dahil kapansin-pansin ang hindi maayos na implementasyon nito batay sa mga kinakaharap na suliraning pang-edukasyon.

Paliwanag ni Basas, nararapat din na mabigyan ng sapat na budget ang programa lalo’t nagpatong-patong na ang problema ng education sector sa loob ng tatlong administrasyon mula nang magsimula ang K to 12.

Iginiit ni House Appropriations Committee Chairman at Bicol Saro Partylist Rep. Terry Ridon na kailangang manatiling malinaw ang mekanismo ng pananagutan sa gitna ng kontrobersiyang kaugnay ng mga “ghost projects” sa flood control programs ng pamahalaan.

Ayon kay Rep. Ridon, nagsimula na ang kanilang komite sa Kongreso na ipatupad ang mga hakbang laban sa mga sangkot na opisyal.

Binigyang-diin din ni Ridon na bagama’t tinanggal na ng Korte Suprema ang pork barrel system, nananatili ang kapangyarihan ng Kongreso at Senado sa tinatawag na congressional initiatives o insertions, bilang bahagi ng “power of the purse” na nakasaad sa Konstitusyon.

Aniya, hindi lahat ng insertions ay masama, lalo na kung nakatuon sa mga pangangailangan ng publiko gaya ng pasilidad sa edukasyon at serbisyong panlipunan. Ngunit nagiging problema aniya ito kapag ginagamit sa substandard projects o ghost projects na pinakikinabangan lamang ng iilan imbes ng taumbayan.

Binasag na ni Ako Bicol Partylist Rep. Elizaldy Co ang mga alegasyong ibinabato laban sa kanya hinggil sa isyu ng insertions sa 2025 national budget at ang pagkakadawit ng kanyang pangalan sa maanomalyang flood control projects ng Sunwest Construction na nakakuha ng malalaking proyekto ng gobyerno.

Matatandaang sa Senate Blue Ribbon Committee hearing, idinawit nina Pacifico at Sarah Discaya ang pangalan ni Co na tumatanggap umano ng porsyento sa implementasyon ng kanilang kontrata.

Mariing itinanggi ni Co ang akusasyon at iginiit na walang basehan, iresponsable, tsismis at “politically motivated” ang alegasyong ibinabato laban sa kanya upang linlangin ang publiko at ilihis ang pananagutan.

Paliwanag ni Co, sinertipikahan ang 2025 General Appropriations Act ng dalawang kapulungan ng Kongreso at nilagdaan at pinagtibay ni Pangulong Ferdinand Marcos Jr., pero na-veto rin umano ang ilang probisyon at inipit ang paglalabas ng pondo para sa mga proyekto.

Ngunit ipinunto ng kongresista na ang validity ng 2025 GAA ay ang subject ng kaso sa Korte Suprema at Ombudsman na naging dahilan kaya hindi umano siya makapagkomento sa isyu, bilang paggiit sa karapatan na sumagot kapag inobliga na ng Korte Suprema.

Binanatan ni Executive Secretary Lucas Bersamin ang ilang mambabatas dahil sa sinasabing paninisi ng mga ito sa ehekutibo kaugnay sa umano’y korapsyon at pagkakamali sa budget process.

Sa pahayag na inilabas ni E.S. Bersamin, mariin nilang tinutulutan, kasama ang iba pang miyembro ng gabinete, ang aniya’y pambabaligtad ng Kamara sa sariling korapsyon at pagkakamali nito.

Aniya, hindi kukunsintihin ng mga miyembro ng gabinete ang pag-atake sa integridad at reputasyon ng ehekutibo; gayundin ang pagpapatigil sa proseso ng budget para sa aniya’y “political theatrics” o pampulitikang palabas.

Dagdag pa ni E.S. Bersamin, walang saysay ang imbestigasyon kaugnay sa mga anomalya sa pondo ng bansa kung mismong ang mga pasimuno sa korapsyon ay hindi iimbestigahan.

Dahil dito, mariing hinimok ng Palace official ang Mababang Kapulungan ng Kongreso na linisin ang kanilang institusyon.

Paspasan ang paghahain ng reklamo o kaso laban sa mga sangkot na opisyal ng Department of Public Works and Highways at mga kontraktor na sangkot sa maanomalyang flood control projects.

Ito ang mismo ang ibinilin ni Pangulong Ferdinand Marcos Junior kay DPWH Secretary Vince Dizon bago umalis patungong Cambodia.

Ayon kay Secretary Dizon, naiyak sa galit si PBBM matapos inspeksyunin ang mga flood control projects sa Bulacan at iba pang lugar.

Nakita rin anya ng Pangulo ang paulit-ulit na substandard project o ghost projects.

Gayunman, tiniyak ng DPWH na mapapanagot ang mga sala sa maanomalyang flood control projects.