NATIONAL NEWS

Asahan na madaragdagan pa ang bilang ng mga ihahain na reklamo laban sa mga sangkot na opisyal ng Department of Public Works and Highways at kontraktor ng flood control projects.

Kasunod ito ng paghahain ng Commission of Audit at DPWH ng limang (5) fraud audit reports sa Office of the Ombudsman.

Paliwanag ni DPWH Secretary Vince Dizon, na kada proyekto ng mga kontraktor at sangkot ang isasampa nilang kaso.

Kaya’y asahan na halos araw-araw anya sila maghahain ng kaso sa Ombudsman.

Kabilang sa mga sinampahan ng kagawaran sina District Engineer Henry C. Alcantara, Assistant District Engineer Brice Ericson D. Hernandez, Project Engineer Paul Jayson F. Duya, Construction Section Chief Jaypee D. Mendoza at iba pa.

Sinisiguro ng kalihim na hindi niya titigilan ang mga sangkot sa maanomalyang flood control projects kasunod ng direktiba ni Pangulong Ferdinand Marcos Junior.

Nilinaw naman ni Secretary Dizon na ang Ombudsman mismo ang maghahain ng kaso laban sa mga sangkot pero maghahain sila ng mga may kaso na anti-graft and corruption practices, malversation, at falsification.

Idinepensa ni Pangulong Ferdinand Marcos Jr. kung bakit kinailangang bawiin o ipawalang-bisa ang permit to operate ng power supplier sa Siquijor.

Sa kanyang pagbisita sa Siquijor, ipinaliwanag ng Pangulo na kinailangang i-take over ng gobyerno ang operasyon ng Siquijor Island Power Corporation (SIPCOR) dahil walang nakitang improvement sa serbisyo nito o sa pagsusupply ng kuryente sa isla.

Matatandaan na noong isang buwan, binawi ng Energy Regulatory Commission ang permit to operate ng SIPCOR dahil sa umano’y paglabag nito sa compliance requirements.

Ayon sa Department of Energy, ilan lamang sa mga paglabag ng SIPCOR ay ang kawalan ng valid certificate of compliance ng generating units nito. Hindi rin otorisado ang paggamit ng mga nirentahang generator sets, at lumabag din ito sa inaprubahang power supply agreement dahil wala itong kakayahang makapagsupply ng sapat na kuryente sa isla.

Dahil dito, sinabi ng Pangulo na ang Provincial of Siquijor Electric Cooperative (PROSIELCO) na ang binigyan ng awtorisasyon na magpatakbo nito.

—sa panulat ni Jasper Barleta

Kasunod ng kontrobersya sa mga maanomalyang flood control projects, hihigpitan na rin ng Department of Finance ang proseso sa pag-apruba sa proposal ng mga bagong flood control projects.

Ayon kay Palace Press Officer at Communications Usec. Claire Castro, may basbas ng Economy and Development Council Investment Coordination Committee ang pagpapatupad ng DOF ng mas istriktong approval process sa mga nasabing proyekto.

Sa ilalim ng kasalukuyang pamantayan, hindi dumadaan sa evaluation ng Investment Coordination Committee ang karamihan sa mga proyekto, dahil tanging mga flood control projects na lampas sa 2.5 bilyong pisong halaga ang required dumaan sa evaluation.

Ayon kay Usec. Castro, sa pamamagitan ng bagong patakaran, dadaan na sa masusi at komprehensibong review ng komite ang mga bagong flood control projects bago pa ipatupad, para masiguro ang sustainability at kalidad.

Alinsunod umano ang bagong patakaran ng DOF sa direktiba ni Pangulong Ferdinand Marcos Jr. na wakasan ang mga tiwaling gawain sa pagpapatayo ng flood control projects, matapos madiskubre ang ilang substandard at ghost projects.

—sa panulat ni Jasper Barleta

Hindi umaasa si Oiffce of the Solicitor General (OSG) Atty. Darlene Marie Berberabe na magbabago pa ang desisyon ng Korte Suprema kaugnay sa ginawang pagbasura sa impeachment complaint laban kay Vice President Sara Duterte.

Ayon kay SolGen. Berberabe, tila malabo nang ma-overturn ang pasya ng SC dahil sa labintatlong mahistrado ang bumoto para ideklarang unconstitutional ang articles of impeachment laban sa bise presidente habang dalawa ang nag-abstain.

Sa ginanap na 6th weekly membership meeting ng Rotary Club of Manila sa Manila Polo Club Makati, inihayag ni SolGen. Berberabe, na bilang abogado ng Kamara, hindi niya na inaasahang mapagbibigyan ang kanilang inihain na motion for reconsideration sa Korte Suprema.

Ipinangako naman ni Berberabe na hindi niya hahayaan na magamit sa anumang uri ng pamumulitika o pansariling interes ang kanyang pinamumunuang ahensya.

Sa ngayon, nakaantabay lamang aniya ang OSG sa magiging hatol ng SC sa kanilang isinumiteng motion for reconsideration.

—sa panulat ni Jasper Barleta

Isandaang porsyento nang nakapagsumite ng courtesy resignation ang lahat ng mga opisyal, mula sa central office hanggang sa district level ng Department of Public Works and Highways.

Ito ang kinumpirma mismo ni Public Works and Highways Secretary Vince Dizon, sa pagharap sa budget deliberation ng House Committee on Appropriations para sa 2026 budget ng ahensya.

Matatandaan nang maitalaga ni Pangulong Ferdinand Marcos Jr. si Dizon bilang kalihim ng DPWH, ay kaagad niyang ipinag-utos na magsumite ng courtesy resignation ang mga opisyal at kawani ng ahensya.

Saklaw ng naturang direktiba ang lahat ng undersecretaries, assistant secretaries, division heads, regional directors at district engineers sa buong bansa.

Batay sa datos, dalawanda’t limampung kawani ng DPWH ang maaapektuhan at karamihan sa kanila ay pinuno ng mga district engineering offices sa iba’t ibang bahagi ng bansa.

—sa panulat ni Jasper Barleta

Opisyal nang idideklara bilang isang santo ng Simbahang Katolika si Carlo Acutis ngayong araw, Setyembre a-siyete, sa pamamagitan ng canonization rites na pangungunahan ni Pope Leo the Fourteenth sa St. Peter’s Square.

Si Acutis ang kauna-unahang Italian millennial saint. Kilala siya bilang “cyber apostle” at “God’s influencer” dahil sa paggamit niya ng internet at computer skills upang ipalaganap ang pananampalataya, kabilang na ang paglikha ng online exhibition ng mga eucharistic miracles.

Kinilala ng Vatican ang dalawang milagro na iniuugnay sa kanyang intercession: ang pagsagip sa isang batang Brazilian mula sa rare pancreatic malformation at ang paggamut sa isang estudyante mula Costa Rica matapos ang malubhang head injury.

Una nang itinakda ang canonization ni Acutis noong April 27 ngunit naantala matapos pumanaw si Pope Francis noong April 21 ng kasalukuyang taon.

Ang pag-canonize kay Carlo Acutis ay itinuturing na makasaysayan dahil nagbibigay ito ng bagong mukha ng kabanalan sa makabagong henerasyon.

—sa panulat ni Jasper Barleta

Bumaba ang bilang ng mga pamilyang Pilipino na nagsasabi na nagugutom sila.

Ito’y matapos lumabas sa isang Social Weather Stations survey na bumaba ng 7-point-2 percent ang bilang ng mga tinutulungan ng “Walang Gutom Program” ng Department of Social Welfare and Development.

Ayon sa SWS, mula 48-point 7 percent noong Oktubre 2024, unti-unting bumaba ang hunger prevalence rate sa 41-point-5 percent noong Marso ngayong taon.

Pinakamalaki ang ibinaba ng regional rate ng Bangsamoro Autonomous Region in Muslim Mindanao, kung saan naitala ang isa sa bawat tatlong benepisyaryo ng naturang programa ng pamahalaan.