NATIONAL NEWS

Namemeligro na namang magkaroon ng dagdag-singil sa kuryente ng mga consumer ngayong buwan.

Bunsod ito nang pagtaas ng presyo ng kuryente sa Wholesale Electricity Spot Market o WESM noong Agosto dahil sa mas mataas na demand at outages ng ilang planta.

Ayon sa Independent Electricity Market Operator of the Philippines, tumaas ng 15.3 percent sa 4 pesos 59 centavos per kilowatt-hour ang spot prices noong isang buwan mula sa 3 pesos 99 centavos noong Hulyo.

Simula naman July 26 hanggang August 25, bumaba sa zero point 7 percent month on month ang available supply sa 20,611 megawatts gayong tumaas ang demand sa 1.7 percent sa 14,052 megawatts.

Inaasahang mararamdaman ang WESM prices para sa August supply ng mga consumers ngayong buwan.

Kinumpirma ng Bureau of Customs na nasa kustodiya na nila ang dalawampu’t walong luxury cars na pagmamay-ari ng pamilya Discaya.

Ayon sa BOC, isinuko ng mga Discaya ang labing-anim na sasakyan… na bukod pa sa labindalawang sasakyan na kanilang nakumpiska sa ikinasang search operations sa St. Gerrard Construction General Contractor & Development Corp. compound sa Pasig City.

Sa ngayon, bantay-sarado ng mga tauhan ng BOC ang mga sasakyan at sumasailalim ito sa sealing and documentation, verification ng importation records, at assessment ng duties and taxes.

Makikipag-ugnayan din ang ahensya sa Land Transportation Office, para sa masusing imbestigasyon.

Ibinunyag ng Malacañang na hindi natapos sa tamang oras at may mga seryosong depekto ang Philippine Film Heritage Building sa Intramuros na sinasabing kontrata ng pamilya Discaya.

Ayon kay palace press officer at communications Usec. Claire Castro… kahapon, Setyembre a-kwatro, ang deadline ng Great Pacific Builders and Gen. Contractor Inc., na pagma-may-ari ng pamilya Discaya, para sa konstruksyon ng 107 million pesos na gusali.

Pinondohan ang nasabing proyekto sa ilalim ng 2023 General Appropriations Act at inaprubahan noong December 20, 2024.

Lumabas sa inspeksiyon na hindi pa tapos ang ilang bahagi ng gusali, kabilang ang mga silid na walang tiles, bagsak na kalidad ng elevator, tagas at baradong palikuran, palpak na alulod, at hindi pa natatapos na theater facility.

Dahil dito, tiniyak ng Malacañang na hindi palalampasin ang kapabayaan ng contractor at sisiguruhing maisasaayos ang gusali para magamit nang tama ang pondong inilalaan para rito.

Isinusulong ni senador Ronald “Bato” Dela Rosa ang parusang kamatayan para sa mga opisyal ng pamahalaan na mapatutunayang sangkot sa kasong plunder o pandarambong.

Sa ilalim ng kanyang Senate Bill No. 1343, iminungkahi ni Sen. Dela Rosa na amyendahan ang Republic Act No. 9346, o ang batas na nag-alis ng death penalty sa bansa, upang ipataw ang parusang bitay laban sa mga sangkot sa pandarambong.

Sa nasabing panukala, lethal injection ang iminungkahing paraan ng senador sa pagbitay.

Binigyang-diin ng mambabatas na ang pagkakasangkot ng mga tiwaling opisyal sa mga maanumalyang flood control projects na ibinunyag mismo ni Pangulong Ferdinand Marcos Jr. ay malinaw na ebidensya ng malawakang korapsyon sa pamahalaan.

Dagdag pa ni Sen. Dela Rosa, hindi sapat na pagkakakulong lamang ang parusa sa mga ganitong uri ng krimen na pumipigil sa mga mamamayan na magkaroon ng maayos na pamumuhay.

Nilinaw ni trade secretary Maria Cristina Roque na hindi pa lusot ang mga nagbitiw at magbibitiw na opisyal ng Philippine Contractors Accreditation Board sa imbestigasyon kaugnay sa sinasabing maanumalyang flood control projects sa bansa.

Ito’y kasunod ng pagbibitiw sa pwesto ni PCAB executive director, Atty. Herbert Matienzo at dalawang iba pang miyembro nito.

Kasabay nito, binigyang-diin ni secretary Roque na bagaman kailangang suspendihin at tanggalan ng lisensya ang mga kumpanyang sangkot sa anomaliya, hindi dapat maapektuhan ang mga lehitimong construction firm na nagsisilbing haligi ng industriya at ekonomiya.

Kaugnay nito, pinawi ng kalihim ang pangamba ng publiko at mga negosyante na magkaroon ng negatibong epekto sa business sector ang kontrobersya.

Malamig si dating public works secretary Rogelio Babes Singson sa posibleng pagsali sa independent commission na mag-iimbestiga sa mga sinasabing anomaliya sa flood control project.

Iginiit ni Singson na dapat ay walang koneksyon sa ilang ahensya ng pamahalaan ang mga ipapasok na miyembro sa bubuuing independent commission ng administrasyon.

Bagamat, hindi partikular na tinukoy ng dating kalihim ng DPWH, sinabi nito na dapat ‘babaeng matatapang’ ang mapabilang sa nasabing komisyon.

Gayunman, bukas si Singson na magbigay ng saloobin sa kung papaano mareresolba ang naturang isyu.

Pumwesto sa 114 na ranggo mula sa isandaan at walumpung bansa ang Pilipinas sa 2024 Corruption Perceptions Index ng international social group na Transparency International.

Itinatala ng CPI ang mga bansa at teritoryo base sa perceived levels of public sector corruption, kung saan zero ang pinaka-corrupt at isandaan naman ang pinakamalinis mula sa katiwalian.

Sa nasabing index nakakuha ang Pilipinas ng 33 out of 100, na bahagyang mas mababa kumpara sa 34 noong 2023.

Batay sa record ng CPI, mula noong 2012, naitala ang pinakamataas na puntos ng Pilipinas noong 2014, matapos makakuha ng 38.

Sa pinakahuling index, kapantay ng Pilipinas sa 114th rank ang Belarus, Bosnia and Herzegovina, Laos, Mongolia, Panama, at Sierra Leone.

 Pormal nang inilipat ni Public Works Secretary Vince Dizon ang tungkulin bilang Acting Transportation Secretary kay Giovanni Lopez.

Tiniyak ni Lopez na ipagpapatuloy niya ang sinimulan ni Dizon na pakikinig at pagtutok sa kapakanan ng mga commuter. Kabilang sa kanyang mga prayoridad ang pagsasaayos ng mga isyung pang-transportasyon, alinsunod sa direktiba ni Pangulong Marcos na gawing commuter-centric ang transport system ng bansa.

Dagdag pa ni Lopez, pananagutin ng DOTr ang mga barumbadong motorista at palalakasin ang accountability sa kalsada para masiguro ang kaligtasan ng lahat ng biyahero.

Matapos ang halos dalawang taong pagkaantala, sinimulan na ang pagtatayo ng Ortigas Station ng Metro Manila Subway Project sa Pasig City, malapit sa Meralco Avenue.

Kasama ni Acting Transportation Secretary Giovanni “Banoy” Lopez si Pasig City Mayor Vico Sotto sa inspeksiyon ng lugar, kung saan nagsimula na ang demolisyon ng ilang establisimyento at nakaantabay na ang mga equipment.

Ayon kay Lopez, dapat noong Oktubre 2022 pa nagsimula ang proyekto pero naantala dahil sa usapin sa right-of-way. Target matapos ang istasyon sa loob ng tatlong taon at maging operational sa loob ng limang taon.

Tiniyak ng DOTr na 95% ng right-of-way issues ay nalutas na. Ang Metro Manila Subway ang kauna-unahang underground railway system ng bansa na sinimulan noong 2019.

Tiniyak ng Malacañang na agad kikilos si Pangulong Ferdinand Marcos Jr. sakaling maisumite na ng Judicial and Bar Council ang shortlist ng mga kandidato para sa posisyon ng Ombudsman.

Ayon kay Palace Press Officer Usec. Claire Castro, agad na pag-aaralan at aaksyunan ng Pangulo ang listahan. Giit pa niya, malinaw ang nais ni Marcos para sa susunod na Ombudsman: isang taong may mataas na integridad, hindi madaling diktahan, at walang kinakampihan.