NATIONAL NEWS

Malapit nang makamit ng bansa ang universal healthcare, ayon kay Pangulong Ferdinand Marcos Jr. Ito ang pahayag ng Pangulo sa pagbisita sa Bataan General Hospital upang inspeksyunin ang pagpapatupad ng zero balance billing program.

Ayon kay Marcos, nasa 80% na ang implementasyon ng universal healthcare at malaking tulong dito ang zero balance billing na ipinatutupad na sa 78 pampublikong ospital. Sa Bataan General Hospital pa lamang, halos tatlong libong pasyente na ang natulungan.

Ipinagmalaki rin ng Pangulo ang pagbubukas ng mga bagong Urgent Care and Ambulatory Service Centers o BUCAS centers sa iba’t ibang lugar. Dagdag pa niya, patuloy na palalakasin ng pamahalaan ang health system at ekonomiya upang matiyak ang kumpletong pagpapatupad ng universal healthcare para sa lahat.

Target ni Public Works and Highways Secretary Vince Dizon na tapusin sa loob ng animnapung-araw ang kanyang unang misyon sa Department of Public Works and Highways.

Ito ay kaugnay sa internal cleansing o paglilinis sa hanay ng mga opisyal, kung saan ay pinagsusumite niya ng courtesy resignation ang mga undersecretaries, assistant secretaries, regional directors hanggang sa mga district engineers.

Aminado naman ang bagong-talagáng kalihim na hindi madali ang gagawing internal cleansing pero ito aniya ay kinakailangan niyang gawin matapos na ipag-utos ni Pangulong Ferdinand Marcos Jr. na isailalim sa cleansing ang ahensya.

Gayunman ay naniniwala si Sec. Dizon na marami ang magagaling, matitino at masisipag ang mga manggagawa sa DPWH pero hindi talaga maiiwasan sa isang organisasyon na mayroong ilang tiwali na kailangang sibakin sa trabaho.

Humingi ng pasensya si House Deputy Speaker at Antipolo 1st District Rep. Ronaldo Puno sa pag-uugnay kay dating Senator at Finance Committee Chairperson Grace Poe sa naging final draft ng 2025 national budget.

Ito’y matapos malaman ni Puno, na hindi pinayagan si Poe na lumahok sa mga deliberasyon ng bicameral conference committee.

Gayunpaman, iginiit ng House leader na dapat magpatuloy ang proseso ng pagtukoy sa pananagutan hinggil sa iregularidad sa National Expenditure Program o NEP.

Palaisipan para sa mambabatas ang mga pagbabagong nangyari sa pagitan ng mga budget bills na inaprubahan ng dalawang kapulungan ng Kongreso at ang ipinadala sa Palasyo para pirmahan ni Pangulong Ferdinand Marcos Jr.

Matatandaang noong 19th Congress, inalis si Ako Bicol Party-list Rep. Elizaldy Co, mula sa pagiging chairperson ng House Committee on Appropriations dahil sa isyu ng insertions sa 2025 national budget.

Isa sa bawat tatlong mag-aaral sa grades one hanggang three o nasa halos 4.5-milyong estudyante ang hindi pa umaabot sa batayang pamantayan sa pagbasa.

Ito batay sa pinakahuling ulat ng Second Congressional Commission on Education, kung saan ang Comprehensive Rapid Literacy Assessment para sa school year 2025–2026 ay nagpakita ng resultang 33.42% para sa mga “low-emerging readers,” habang 30.87% ang “transitioning readers,” at 12.39% ang “developing readers.”

Samantala, 14.47% lamang ang nakababasa sa tamang antas na naaayon sa kanilang baitang.

Ayon kay Second Congressional Commission on Education Executive Director Karol Mark Yee, kinakikitaan ang resulta ng mahinang pundasyon ng mga batang Pilipino lalo na sa pagbabasa.

Lumabas din sa datos na karamihan sa mga nasa grade 3 ay dalawa hanggang tatlong taon nang nahuhuli sa numeracy kumpara sa kanilang kurikulum.

Binigyang-diin ng mga mambabatas na kailangan ng agarang hakbang para mapatibay ang literacy at numeracy programs upang hindi na maipasa ang mahinang resulta hanggang kolehiyo at trabaho.

Kinuwestyon ng Malacañang ang plano ni Sen. Imee Marcos na harangin ang aplikasyon ni Department of Justice Secretary Jesus Crispin Remulla bilang susunod na Ombudsman.

Sinabi ni Palace Press Officer at Communications Usec. Claire Castro na tila nagpapahiwatig ang mambabatas na mas matimbang para sa kanya ang paghahatid ng hustisya sa mga kaibigan, imbis na sa taumbayan.

Iginiit ni Usec. Castro na isang independent body ang Ombudsman, na nag-iimbestiga at naghahain ng kaso laban sa mga opisyal na mapatutunayang sangkot sa katiwalian bagay na hindi naman aniya dapat katakutan ng mga Duterte kung wala namang kasalanan ang mga ito.

Dagdag pa ng PCO official, may kakayahan naman ang mga Duterte na ipagtanggol ang sarili, kaya walang dahilan ang senador para harangin ang aplikasyon ni Sec. Remulla.

Nabatid na sinabi ni Sen. Marcos na ang pag-apply ni Sec. Remulla bilang Ombudsman ay bahagi ng planong ipakulong si Vice Pres. Sara Duterte bago mag-2028 elections.

Tinawag ni Senate Minority Leader Tito Sotto na “injurious phenomena” o banta sa ekonomiya ng bansa ang mga anomalya sa flood control projects.

Ito ay matapos ihayag ni Finance Secretary Ralph Recto na aabot sa 118.5 billion pesos ang nawalang pondo ng pamahalaan, simula noong 2023 hanggang 2025, dahil sa mga maanomalyang flood control projects.

Ayon kay Sen. Sotto, dapat lang magalit ang publiko sa mga opisyal ng pamahalaan, politiko, at kontratista na sangkot sa pagnanakaw ng pondo ng bayan… dahil nagtatrabaho aniya nang maayos ang mga Pilipino at nagbabayad ng tamang buwis habang ginagasta lamang ng mga tiwali ang kaban ng bayan.

Nabatid na ilang showbiz personalities na ang nadismaya at nagalit sa nabubulgar na mga katiwalian sa flood control projects.

Nagkaisa ang mga kongresista na ibalik sa Department of Budget and Management ang 2026 National Expenditure Program.

Ito, ayon kay House Deputy Speaker Ronaldo “Ronnie” Puno, ay bunsod ng missing, emerging, at double appropriations na nagpapagulo sa kamara at hindi alam kung papaano ito aayusin.

Binigyang diin ni Rep. Puno na hindi muna gagawa ng anumang hearing ang kamara hanggat hindi naaayos ang pagpupundo para sa susunod na taon.

Umaasa ang kongresista na ibibigay ng pamahalaan ang budget nang maayos at pinag-isipan na.

Kinuwestyon ni Bukluran ng Manggagawang Pilipino president, Atty. Luke Espiritu, ang naging takbo ng imbestigasyon ng senate blue ribbon committee kaugnay sa maanomalya umanong flood control projects.

Ayon kay Atty. Espiritu, tila nagiging “scripted” na ang tanungan ng mga senador dahil sumentro lang ang pagdinig sa karangyaan ng buhay ng mga kontratista, partikular ni Sara Discaya, may-ari ng Alpha and Omega Gen. Contractor & Development Corporation.

Hindi rin anya umabot ang pagtatanong sa pagkakasangkot umano ng mga senador at kongresista sa congressional insertions na pinaghugutan ng pondo para sa mga flood control project.

Naniniwala si Espiritu na ginamit lamang na “platform” ng ilang mambabatas ang naturang pagdinig para maghugas kamay o linisin ang kanilang sarili sa pagkakasangkot sa naturang anomalya.