Tinawag ni Senate President Pro Tempore Panfilo “Ping” Lacson na “faky breaky news” o fake news ang isang “breaking news” post na sinasabing may nagaganap na panibagong hakbang para sa pagbabago ng liderato sa Senado.
Ayon sa senador, layunin ng social media post na linlangin at guluhin ang publiko.
Minamaliit anya ang talino ng mga bagong Senate majority bloc.
Binigyang-diin ni Senator Lacson na may tamang proseso kung nais baguhin ang liderato sa Senado kung saan dapat pirmado ng hindi bababa ng labing tatlong senador ang resolusyon.
Matatandaang nagkaroon na ng pagbabago sa liderato ng Senado, kung saan nahalal si dating Senate minority leader Vicente Sotto III bilang bagong Senate President.
Habang si Senator Lacson naman ay nahalal bilang Senate President Pro Tempore at chairman ng Senate Blue Ribbon Committee.
Napag-alaman na ang nasabing post ay mula sa “OneTV Philippines,” isang “digital news network globally-based” sa Davao City at Pagadian City.
