Umabot na nga sa sukdulan ang galit ng taumbayan at nagsimula nang dalhin sa lansangan ang panawagan na panagutin ang mga umano’y sangkot sa mga isinagawang ghost o substandard flood control projects gamit ang pera ng mga Pilipino.
Matatandaan na may iilan nang naunang nagprotesta sa labas mismo ng isa sa mga pag-aari ng mag-asawang Sarah at Curlee Discaya na St. Gerrard Construction, kung saan binato ng putik ang gate nito at pinintahan ng salitang ‘magnanakaw.’
Kamakailan lang, pati ang DPWH Bulacan First District Engineering Office, University of the Philippines Manila and Diliman campuses, at Senate sa Pasay City ay pinuntahan na rin ng mga nagsagawa ng kilos protesta para ipahayag ang saloobin nila sa ilang linggo nang pinag-uusapang isyu na bilyon-bilyon ang halaga.
Bagama’t ikinakabahala ng ilan ang mga rally, sinabi ni University of Makati School of Law Associate Dean Atty. Cecilio Duka sa opisyal na panayam ng DWIZ na karapatan ng mga myembro ng isang democratic country na ipahayag at gamitin ang kanilang freedom of expression.
Pero take note, bago bumuo ng grupo at magkilos protesta, alamin muna ang limitasyon at restrictions na dapat sundin dahil ayon kay Atty. Duka, mayroong mga lugar na kinakailangan ng permit bago magsagawa ng rally.
Gaya nga ng sinabi ko, mayroong limitasyon ang karapatan na ito at isa na riyan ay ang pagiging bayolente. Ayon kay Atty. Duka, maaaring bigyan ng karampatang parusa ang mga nagra-rally na nauuwi sa karahasan, kabilang na ang organizer nito.
Dagdag pa niya, sapat na ang panawagan na hingin ang pananagutan ng mga taong sangkot sa flood control issue, pero kapag umabot sa punto ng panghihikayat na pabagsakin ang gobyerno, maaari na itong magresulta sa pagsasampa ng kasong sedition.
