NATIONAL NEWS

Kinumpirma ni Vice President Sara Duterte na nasa maayos na kalagayan ang kaniyang amang si dating Pangulong Rodrigo Duterte.

Sa ambush interview, kinumusta ng mga media personnel ang kalagayan ng dating pangulo na kasalukuyang naka-detine sa The Hague, Netherlands.

Bilang tugon, sinabi ng Bise Presidente na nasa maayos na kalagayan ang kaniyang ama at nagkakausap aniya sila.

Dagdag ni VP Sara, updated sa mga kaganapan sa bansa ang dating pangulo, kung saan kabilang sa kanilang napag-usapan ay ang isyu sa politika, flood control projects, at love life.

Nang tanungin naman kung ano ang opinyon ng kaniyang ama sa flood control issue, sinabi ng Pangalawang Pangulo na bawal aniyang ibahagi ang kanilang napag-usapan.

Ang pahayag ng Bise Presidente ay taliwas sa naging pahayag ng abogado ni dating Pangulong Duterte na si Nicholas Kaufman, na hindi kayang humarap ni Duterte sa trial o paglilitis dahil sa health problem kaya na-defer o ipinagpaliban muna ang kaniyang confirmation of charges.

Iginiit ni VP Sara na mas mainam kung hintayin na lamang ang desisyon ng mga eksperto sa International Criminal Court (ICC).

Nakikipagtulungan na ang Bureau of Internal Revenue sa Anti-Money Laundering Council upang imbestigahan ang mga kontratista, opisyal ng pamahalaan, at pribadong indibidwal na sangkot sa maanomalyang flood control projects.

Ayon kay BIR Commissioner Romeo Lumagui Jr., magsasagawa ang dalawang ahensya ng tax fraud audit at money laundering probe gamit ang datos mula sa bank transactions at tax records.

Bukod sa AMLC, nakikipag-ugnayan din ang BIR sa Department of Public Works and Highways, Commission on Audit, LRA, LTO at iba pang ahensya, at nakahandang makipagtulungan sa Independent Commission for Infrastructure, Senado, at Kamara.

Dagdag pa ng BIR official, lahat ng tauhan ng ahensya ay ide-deploy para sa imbestigasyon.

Nabatid na nagsasagawa na rin ang BIR ng parallel investigation simula nang pangalanan ni Pangulong Ferdinand Marcos Jr. ang top 15 flood control contractors.

Lumawak pa aniya ang imbestigasyon matapos lumabas sa mga pagdinig ng Senado at Kamara ang isyu ng ghost projects. —ulat mula kay Jenn Patrolla (Patrol 38) —sa panulat ni Jasper Barleta

Naninindigan si House Deputy Minority Leader at Mamamayang Liberal Party-list Rep. Leila De Lima na dapat gawing batas ang pagbubuo ng isang Independent Commission tungkol sa mga infrastructure projects.

Nabatid na sinabi ni Rep. Leila De Lima ang pahayag sa gitna ng pagtatag ng Malacañang ng isang Independent Commission for Infrastructure bilang tugon sa mga ma-anomalyang flood control projects.

Sa panayam ng DWIZ, iginiit ni Rep. De Lima na nabuo lang ang Independent Commission dahil sa bisa ng executive order ni Pangulong Ferdinand Marcos Jr.; at ang inihahain sa parehong kapulungan ng Kongreso ay isang komisyon na hiwalay kahit sa ehekutibong sangay ng pamahalaan.

Nais ni House Deputy Minority Leader at Mamamayang Liberal Party-list Rep. Leila De Lima na maging matapang ang Korte Suprema sa pag-amin na baka nagkamali ito sa kanilang desisyon na ituring na “unconstitutional” ang hakbang ng Kamara sa pag-impeach kay Vice President Sara Duterte.

Ito’y sa gitna ng mga spekulasyon na maaaring muling gumulong ang impeachment trial ng pangalawang pangulo matapos mag-balasan sa Senado.

Sa panayam ng DWIZ, hiniling ni Rep. De Lima na aksyunan ang mga motions for reconsideration na isinumite tungkol sa desisyon nito tungkol sa impeachment ni VP Sara.

Dagdag pa ng mambabatas, na dati nang naging senador, bagama’t maaaring hilahin mula sa pagkaka-archive ang impeachment trial ng bise presidente, mistulang natabunan na ito ng mga mas mabibigat at mas importanteng mga isyu, tulad ng pambansang budget at ang mga ma-anomalya at guni-guning flood control projects.

Ibinunyag ng Quezon City local government unit na dalawampu’t pitong flood control projects sa Quezon City ang hawak ng pamilya Discaya.

Ayon kay QC Mayor Joy Belmonte, aabot sa 1.52 billion pesos ang halaga ng kabuuang flood control projects sa lungsod.

Sa isinagawang imbestigasyon ng QC LGU, dalawampu’t pitong flood control projects ang kasalukuyang hawak ng pamilya Discaya.

Pero labindalawa lamang na proyekto ang kabilang sa 2022–2025 National Expenditure Program.

Dahil dito, iginiit ng pamahalaang lungsod na dapat ibalik ang certificate of acceptance at completion sa mga LGU, at hindi lamang sa district engineers, upang matiyak ang transparency at accountability sa mga proyekto sa iba’t ibang bansa.

Lumobo pa sa mahigit tatlundaang flood control projects ng Department of Public Works and Highways sa Quezon City ang nawawala, parehong-parehong contract cost, at mga proyektong itinayo sa mga lugar na hindi flood-prone mula noong 2022 hanggang ngayong 2025.

Ito mismo ang kinumpirma ni QC Mayor Joy Belmonte sa gitna ng ikinakasang imbestigasyon ng pamahalaan hinggil sa flood control projects ng DPWH.

Ayon sa alkalde, mula sa dating mahigit dalawandaan, umakyat pa sa 331 projects ng DPWH ang pinaniniwalaang iregularidad dahil dalawang proyekto lamang ang pinayagan ng lokal na pamahalaan.

Sa 331 na proyekto, nakakahalaga ito ng 17 billion pesos.

Gayunman, handa ang QC LGU na isumite sa Independent Commission for Infrastructure ang resulta ng fact-finding investigation at nakipagkasundo rin sila sa Philippine Institute of Civil Engineers – QC Chapter para sa third-party review kung may silbi ba ang mga nasabing proyekto alinsunod sa drainage master plan.

Maglalabas din ng cease-and-desist order ang QC sa mga ongoing projects na nakikitang nakakapagpalala ng baha sa lungsod.

Naniniwala ang political analyst na si Professor Dennis Coronacion na hindi solusyon ang parusang kamatayan upang panagutin ang mga nasasangkot sa mga anomalya at guni-guning flood control projects.

Iginiit ni Prof. Coronacion ang naturang pahayag dahil sa sinasabing kawalan ng tiwala ng publiko sa due process ng batas, lalo na’t mahirap patunayan at panagutin ang mga senador at kongresista na dawit sa katiwalian.

Sa panayam ng DWIZ, duda si Prof. Coronacion na magiging maayos na deterrent ang death penalty, lalo na sa mga seryosong krimen.

Dahil dito, mas mainam anya na pagtibayin na lamang ang mga kasalukuyang mekanismo sa pagpapanagot sa mga tiwaling lingkod-bayan kaysa pagkitil sa kanilang buhay bilang parusa.

Iginiit ni Retired Justice Alex Quiroz na mas unahin ng binuong Independent Commission for Infrastructure ni Pangulong Ferdinand Marcos Jr. ang kasalukuyang mga suliranin ng bansa kaysa balikan pa ang mga problema sa mga nagdaang taon.

Ito’y matapos mapag-alamang kabilang sa iimbestigahan ng Independent Commission ang mga naging korapsyon, irregularidad, at maling paggamit ng pondo ng mga government projects sa nagdaang sampung taon.

Ayon kay Justice Quiroz, kailangang magkaroon na ng maraming safeguards sa mga susunod na budget ng mga proyekto at ayusin ang implementasyon para maiwasan ang mga susunod pang ghost projects.

Maliban dito, kinuwestyon din ng retired justice kung paano babalikan ang mga mali noong nakaraan, habang ang mga problema sa kasalukuyang taon ay masyado nang mahirap masolusyunan.