NATIONAL NEWS

Posibleng ikasa bukas sa pagbubukas ng sesyon ng mababang kapulungan ang pagpapalit ng liderato.

Kasunod ito ng balitang papalit bilang House Speaker si Deputy Speaker at Isabela 6th District Rep. Faustino “Bojie” Dy dahil na rin sa nakatakdang paghahain ng leave of absence ni House Speaker Martin Romualdez.

Nabatid na maagang natapos ang sesyon ngayong araw at agad na nagtungo sa Malacañang sina Speaker Romualdez kasama si House Majority Leader Sandro Marcos pero walang malinaw na dahilan ng pagpunta ng lider ng Kamara.

Una nang lumutang ang mga pangalan nina Deputy Speaker at Antipolo 1st District Rep. Ronaldo Puno; Cebu 5th District Rep. Duke Frasco; Navotas Lone District Rep. Toby Tiangco; at Bacolod Lone District Rep. Alfredo “Albee” Benitez para sa nasabing posisyon.

Sa naging ambush interview ng mga mamamahayag, sinabi ni Cong. Tiangco na hindi magandang tignan para sa publiko ang pagliban ni Speaker Romualdez sa kaniyang trabaho.

Para kay Tiangco, kung totoong magkakaroon ng leave of absence ang House Chief, kailangang magbotohan ang mga Deputy Speaker kung sino ang ipapalit sa posisyon ni Romualdez o magkakaroon ng draw lots.

Sa ngayon, patuloy pang inaabangan ng mga mambabatas kung magkakaroon ba ng pagpapalit sa liderato ng Kamara.

Tiniyak ng Malacañang na magiging patas ang imbestigasyon ng Independent Commission for Infrastructure sa mga isyung lumalabas kaugnay ng mga dating opisyal ng pamahalaan, at hindi ligtas sa pagsisiyasat ang lahat ng pangalan, opisyal man o dating opisyal.

Ayon kay Palace Press Officer at Presidential Communications Office Usec. Claire Castro, walang kaibigan, walang kaalyado, at walang kamag-anak ang kukunsintihin ukol sa maanomalyang flood control projects sa bansa.

Una nang nabanggit ni Senador Panfilo “Ping” Lacson ang pangalan ni dating Public Works and Highways Secretary Manuel Bonoan matapos itong maiugnay sa isang kontratista mula sa Bulacan.

Dagdag pa ni Usec. Castro, nakarating na rin sa kaalaman ni Pangulong Ferdinand Marcos Junior ang usapin matapos itong iulat ng kasalukuyang DPWH Secretary na si Vince Dizon.

Dagdag pa ng opisyal ng PCO, mananatiling bukas ang pamahalaan sa lahat ng imbestigasyon.

Tinitiyak ng Philippine National Police na hindi matutulad ang bansa sa mga nangyayaring kaguluhan sa Nepal at Indonesia.

Ito ang iginiit ni PNP National Capital Region Police Office Spokesperson Major Hazel Asilo sa gitna ng mga kinakakasang kilos-protesta sa mga susunod na araw.

Sa panayam ng DWIZ, sinabi ni Major Asilo na bagama’t wala pa silang nababalitaang banta sa seguridad, patuloy nilang babantayan ang sitwasyon at makikipag-ugnayan sa mga lokal na pamahalaan at maging sa Armed Forces of the Philippines, lalo na sa malawakang protesta sa darating na Setyembre a-bente-uno.

Dagdag pa ni Major Asilo, kakausapin din nila ang mga grupong magpo-protesta tungkol sa plano nilang pakulo na magsuot ng maskara.

Habambuhay nang blacklisted sa lahat ng proyekto sa pamahalaan ang mga contractor na dawit sa maanomalya umanong flood control projects.

Ayon kay Public Works and Highways Secretary Vince Dizon, ang naturang hakbang ay preparasyon para sa ikalawang bugso ng mga kasong kanilang isasampa laban sa tiwaling kawani ng kagawaran.

Tiniyak din ni Secretary Dizon na hindi makalulusot ang mga kontratista kahit na magpalit pa sila ng pangalan.

Pursigido ang Department of Public Works and Highways na bawiin ang pondong ibinulsa umano ng mga opisyal ng kagawaran na sangkot sa sinasabing anomalya sa flood control projects.

Ito ang iginiit ni DPWH Secretary Vince Dizon sa gitna ng isinasagawang pagdinig ng Senado at Kamara bukod sa ilalargang imbestigasyon ng Independent Commission for Infrastructure sa naturang kontrobersya.

Ayon kay Secretary Dizon, nakikipag-ugnayan na sila sa Anti-Money Laundering Council upang hilingin na i-freeze ang asset ng mga DPWH official na sangkot sa flood control anomaly.

Hindi rin aniya sapat na kasuhan at sibakin sa pwesto o trabaho ang mga nasabing opisyal dahil ang pinakamahalaga ay maibalik nila ang pera ng taumbayan at ang paghahabol sa mga kamag-anak ng mga tiwaling DPWH officials, kabilang na ang sinasabing asawa ng sinibak na Bulacan Assistant District Engineer Brice Hernandez.

Isang mahusay na desisyon ang pagbuo ni Pangulong Ferdinand Marcos Junior ng isang Independent Commission for Infrastructure na mag-iimbestiga sa mga maanomalya umanong government infrastructure projects, kabilang ang flood control projects.

Ito ang tugon ni Public Works and Highways Secretary Vince Dizon matapos pangalanan ng Palasyo ang bubuo sa komisyon.

Sang-ayon din si Secretary Dizon sa naturang hakbang na may layuning linisin sa katiwalian ang pamahalaan, partikular na sa kanyang kagawaran.

Tiniyak naman ng kalihim na handa ang DPWH na makipag-tulungan sa ICI sa oras na simulan na nito ang pagtatrabaho.

Samantala, bukod kay dating DPWH Secretary Rogelio “Babes” Singson, na kabilang sa ICI, nakipag-ugnayan na rin si Dizon kina Senador Mark Villar at Jose “Ping” De Jesus, na kapwa dati ring kalihim ng naturang kagawaran upang mabigyang-linaw ang mga isyu sa likod ng kontrobersya.

Naniniwala ang political analyst na si Dr. Froilan Calilung na mahalagang mabigyan ng buong suporta at malawak na kapangyarihan mula sa Malacañang ang bagong tatag na Independent Commission na inatasang mag-imbestiga sa umano’y iregularidad sa flood control projects.

Sa panayam ng DWIZ, sinabi ni UST Professor Calilung na ang mga kasapi ng komisyon, kabilang sina dating Public Works and Highways Secretary Rogelio ‘Babes’ Singson at Baguio City Mayor Benjamin Magalong; ay may sapat na kredibilidad, karanasan, at integridad upang pamunuan ang komite.

Anya, bukod sa kwalipikasyon, mahalaga rin na kilala ang mga miyembro ng komisyon sa kanilang moral values upang matiyak ang pagiging patas at ang tapat na proseso ng imbestigasyon.

Gayunman, binigyang-diin ni Dr. Calilung na dapat may malinaw na timeframe ang imbestigasyon upang maiwasan ang aniyang “investigation fatigue” o pagkasawa ng publiko sa paulit-ulit na mga hearing na walang nakikitang malinaw na resulta.

Handa si Senator Imee Marcos na dumulog sa Korte Suprema para maharang ang posibleng pagtatalaga kay Justice Sec. Jesus Crispin Remulla bilang Ombudsman.

Ayon kay Sen. Marcos, sa ngayon, ang panawagan niya ay mag-inhibit si Acting Ombudsman Dante Vargas at anim na iba pa sa Office of the Ombudsman; mula sa paghawak ng kanyang motion for reconsideration sa ginawang pag-iisyu ng clearance kay Sec. Remulla.

Matatandaang nagsampa ang senadora ng mga reklamong katiwalian, usurpation of authority at arbitrary detention laban kay Remulla at sa pamunuan ng Philippine National Police.

Sa kanyang urgent motion to inhibit, sinabi ni Sen. Marcos na dapat mag-inhibit si Acting Ombudsman Vargas dahil kaklase nito sa U.P. Law School ang asawa ni Sec. Remulla; kung saan hindi ito kusang inamin ni Vargas.

Aminado ang senadora na hinaharang niya na maging Ombudsman si Remulla dahil kapag nagkataon, isasakatuparan ang sinabi niyang ‘Plan C’ na pagsasampa ng kaso laban kay Vice President Sara Duterte para umano makakulong ito sa pagsapit ng 2028 presidential elections.

Naniniwala si Senate Committee on Finance Chairman Win Gatchalian na mas mapapabilis na ang imbestigasyon ng Senado kaugnay sa sinasabing katiwalian sa mga flood control projects sa bansa.

Ito ay matapos italaga bilang bagong chairman ng nasabing komite si Senate President Pro Tempore Panfilo “Ping” Lacson.

Sinabi sa DWIZ ni Senador Gatchalian, isandaang porsyento ang kanyang tiwala kay Senador Lacson na siya ring pinagmulan ng mga impormasyong ginamit sa mga nagdaang pagdinig ng Senado ukol sa naturang katiwalian.

Samantala, ipinabatid naman ni Senador Gatchalian na kailangan ng legal techniques sa pag-validate sa mga pahayag ng mga kontratistang sangkot sa nasabing anomalya.—sa panulat ni Daniela De Guzman

Nanawagan ang political analyst na si Professor Dennis Coronacion na isa-publiko ng binuong Independent Commission for Infrastructure ang kanilang mga pagdinig.

Sa gitna na rin ito nang nagpapatuloy na pagdinig ng dalawang kapulungan ng Kongreso na isinasapubliko.

Sa panayam ng DWIZ, iginiit ni Prof. Coronacion na marami pa ang dapat mapangalanan sa isyu ng mga maanomalyang flood control projects.

Umaasa rin si Prof. Coronacion na may mapapala sa imbestigasyon ng mga maanomalyang flood control projects.—sa panulat ni Anjo Riñon