NATIONAL NEWS

Nananatiling mataas ang moral ng leadership matapos ang kumpirmasyon ng pagbibitiw sa posisyon ni House Speaker Martin Romualdez.

Ito ang sinabi ni House Deputy Speaker at Zambales Rep. Jhay Khonghun, sa ambush interview ng mga media personnel na buo ang suporta ni Speaker Romualdez kay incoming House Speaker at Isabela 6th District Rep. Faustino “Bojie” Dy.

Ayon kay Khonghun, mananatili at hindi titigil ang adhikain ng leadership maging ang institusyon na tulungan ang pamahalaan partikular si Pangulong Ferdinand Marcos Jr.

Tiwala ang kongresista sa kakayahan ni Cong. Dy para pamunuan ang mababang kapulungan.

Nilinaw ng kongresista na ginawa ni Speaker Romualdez ang desisyon dahil mahal nito ang institusyon at administrasyon at para mahinto na ang mga akusasyon at patuloy na paninira sa mababang kapulungan.

Tiniyak naman ni Khonghun na tuloy-tuloy ang trabaho ng mga mambabatas sa Kamara lalo sa pagbuo ng mga panukalang batas at sa pagtupad sa kanilang tungkulin.

Kinumpirma ni House Deputy Speaker at Antipolo Rep. Ronaldo Puno na magreresign ngayong araw si House Speaker Martin Romualdez.

Sa isang panayam, sinabi ni Puno na ipinatawag sila kahapon ni Speaker Romualdez para sabihin ang planong pagbibitiw bilang lider ng Kamara ngayong araw.

Sinabi ni Puno na matagal nang plano ni Romualdez ang magresign sa tuwing magkikita-kita ang mga party leaders dahil sa mga kontrobersiya at mga paratang na ibinabato laban sa kaniya.

Nasisira na aniya ang reputasyon ng Mababang Kapulungan at marami nang kongresista ang nadadamay.

Aniya, sinubukan na nilang pigilan ang plano ng lider ng Kamara na huwag magbitiw sa posisyon.

Nagbigay rin sila ng suhestiyon na mag-leave of absence na lang si Speaker pero buo na aniya ang desisyon nito.

Iginiit ni Puno na posibleng si Deputy Speaker at Isabela 6th District Rep. Faustino “Bojie” Dy ang papalit sa maiiwang posisyon dahil na rin sa desisyon at rekomendasyon ni Speaker Romualdez.

Hiniling ni Romualdez sa mga mambabatas na suportahan si Cong. Dy na layong maging epektibo ang pamamahala sa institusyon.

Sinabi ni Puno na magkakaroon ng party meetings ngayong araw para pag-usapan ang pagbibitiw sa puwesto ni Speaker Romualdez.

Mag-i-inhibit si Commission on Elections Chairman George Erwin Garcia sa kaso laban kay Senador Francis “Chiz” Escudero.

Nabatid na ang kaso laban kay Sen. Escudero ay may kinalaman sa alegasyon na tumanggap siya ng donasyon mula kay Centerways Construction and Development Corporation President Lawrence Lubiano noong 2022 elections.

Ipinaliwanag ni Chairman Garcia na dati siyang nagsilbing abogado ng naturang senador, kaya iiwasan niya ang anumang conflict of interest.

Sinabi rin ng pinuno ng komisyon na maaaring may iba pang kandidato ang nakatanggap ng donasyon mula sa mga government contractor.

Samantala, sinabi naman ng Comelec Political Finance and Affairs Division na sisimulan na nilang hingin ang paliwanag ni Sen. Escudero oras na padalhan nila ito ng summons.

Target naman ng Comelec na tapusin ang imbestigasyon bago matapos ang buwan ng Setyembre.—Sa panulat ni Anjo Riñon

Isinusulong sa Mababang Kapulungan ng Kongreso ni House Majority Leader Sandro Marcos ang panukalang batas na naglalayong ipagbawal ang mga kamag-anak ng mga opisyal ng pamahalaan hanggang sa ika-apat na antas ng consanguinity o affinity na makapasok o makakuha ng kontrata sa gobyerno.

Sa explanatory note ng House Bill 3661, iginiit ng mambabatas ang public office at public trust alinsunod sa prinsipyo ng 1987 Constitution.

Nakasaad dito na ang isang public official ay tumutukoy sa heads of agency, heads ng procuring entity, governing board members at mga public officer na may policy-determining, supervisory o managerial functions.

Sakop din nito ang career at non-career service, uniformed personnel at militar.

Kumpiyansa ang Ilocos Norte lawmaker na sa pamamagitan ng panukala, magiging tapat at patas ang procurement process at maiiwasan ang katiwalian sa mga proyekto ng pamahalaan.

Nabatid na isang kahalintulad na panukala na rin ang inihain sa Senado ni Sen. Francis “Chiz” Escudero kung saan, nakausap na rin ni Cong. Marcos ang senador at handa niyang itulak ang counterpart measure ng kanyang panukala sa Kamara. —Sa panulat ni Jasper Barleta

Sinimulan na ang operasyon ng Balikbayan Action Center na itinatag ng Bureau of Customs para protektahan ang mga padala ng overseas Filipino workers at tiyakin na maayos ang proseso ng balikbayan boxes.

Sinabi ni Customs Commissioner Ariel Nepomuceno na layunin nito na agad matugunan ang mga hinaing sa customs procedures, magpatupad ng mga reporma, at maghanap ng pinakamahusay na paraan para sa transparency at kahusayan.

Ipinaliwanag pa ni Comm. Nepomuceno na ito ay pagtupad sa kanyang pangako sa mga OFWs na ang bawat balikbayan box ay dadaan sa makatarungan at transparent na proseso bilang pagkilala sa kanilang sakripisyo para sa bayan.

Dagdag pa ni Comm. Nepomuceno, ipinapakita ng ahensya, sa pamamagitan ng BAC, ang mas malawak na adhikain nito na protektahan ang kalakalan, at pati na rin ang kapakanan ng mga OFWs. —Sa panulat ni Anjo Riñon

Isinusulong sa Kamara ni Quezon City 6th District Rep. Ma. Victoria Co-Pilar ang House Bill 4195 o ang panukalang “Metro Manila Flood Management Act.”

Layon nitong magkaroon ng batas para sa isang “master plan” na magbibigay-solusyon sa matagal nang problema sa baha sa buong Metro Manila.

Sa pagbuo ng “Metro Manila-wide blueprint” at “grand master plan,” matutukoy ang nararapat na aksyon o reporma laban sa baha, habang parurusahan naman ang mga nang-abuso sa mga proyekto.

Sakaling maging ganap na batas, bubuo ng isang Inter-Agency Task Force for Flood Management na tututok sa implementasyon ng magagawang master plan.

Ang kalihim ng Department of Economy, Planning and Development o DepDev ang mangunguna habang gagawing miyembro ang mga kalihim o pinuno mula sa ilang departamento kabilang na ang: Department of Public Works and Highways, Department of Environment and Natural Resources, Metropolitan Manila Development Authority, UP Diliman-National Institute for Geological Sciences, PAGASA, at ang mga alkalde ng mga lokal na pamahalaan sa Metro Manila. —Sa panulat ni Jasper Barleta

Naniniwala si Pangulong Ferdinand Marcos Jr. na hindi dapat idinadawit ang isyu ng politika sa usapin ng umano’y maanomalya na flood control projects.

Ito ang tugon ni Pangulong Marcos makaraang hingian ng reaksyon sa ibinulgar ng Ibon Foundation na bilyones ng pondo sa mga proyekto ang napupunta sa mga distritong miyembro ng ruling party at mga kaalyado nito.

Sa press conference sa Malacañang, sinabi ng pangulo na sadyang malaki ang mapupunta sa Lakas dahil ito ang majority party na may pinakamaraming miyembro sa Kamara.

Pero binigyang-diin ng punong ehekutibo na hindi naman halaga ng salapi ang pinag-uusapan sa anomalya kundi kung paanong ginastos ang pondo.

Katwiran ng presidente, kahit naman sa kanila napunta lahat, kung maganda ang patakbo at magaganda ang nagawang mga proyekto ay walang problema.

Iginiit ng pangulo na ang kailangang malaman sa imbestigasyon ay kung magkano ang ninakaw na pera at sino ang mga dapat managot. —Sa panulat ni Jasper Barleta

Hindi muna magbibigay ng komento ang Department of Justice hinggil sa kasong crimes against humanity na kinakaharap ni dating Pangulong Rodrigo Duterte sa International Criminal Court.

Ayon kay Justice Secretary Jesus Crispin Remulla, ayaw masangkot ng ahensya sa politika lalo pa at hindi na saklaw ng Pilipinas ang kaso ng dating pangulo, kaya dapat aniya na hayaan ang may hawak ng hurisdiksyon ang magsalita.

Inilabas ni Sec. Remulla ang pahayag matapos tawaging “politically motivated” ng abogado ni dating Pangulong Duterte na si Nicholas Kaufman ang naunang sinabi ng DOJ at sa posibleng pagtayong testigo sa ICC ni retired police colonel at dating PCSO General Manager Royina Garma laban sa dating pangulo.

Ayon sa kalihim, binanggit lang niya si Garma dahil inaasahan niyang hahanapan siya ng paliwanag at mas mainam na malinaw ang direksyon ng usapan. Muli rin niyang iginiit na wala siyang komunikasyon sa ICC.

Dinepensahan din ng kalihim ang pag-escort ng NBI kay Garma sa pakikipagpulong sa mga tauhan ng ICC. Ito aniya ay para matiyak lang na doon talaga ang pupuntahan nito at lehitimo ang pakay. —Sa panulat ni Jasper Barleta

Handa na ang Metropolitan Manila Development Authority sa ikakasang tigil-pasada ng grupong Piston at Manibela para tutulan ang kurapsyon ng Department of Public Works and Highways sa flood control projects.

Ayon sa MMDA, handa na ang kanilang Task Force Tigil Pasada upang alalayan ang mga pasaherong maiistranded sa kalsada ng Metro Manila.

Nakikipag-ugnayan na rin ang MMDA sa Department of Transportation, Land Transportation Franchising and Regulatory Board at sa mga lokal na pamahalaan.

Gayunman, hinimok naman ng nasabing transport groups ang publiko na lumahok sa kilos-protesta sa Linggo, Setyembre a-bente uno. —Sa panulat ni Jem Arguel

Mag-uusap pa ang minority bloc bago magpasya kung susuportahan ang nilikhang Independent Commission on Infrastructure na mag-iimbestiga sa mga isyu ng katiwalian sa flood control projects.

Ito ang inihayag ni Senate Minority Leader Alan Peter Cayetano. Aniya, napakahalaga ng kredibilidad, kaya kung may kinikilingan o may political agenda, maaaring mawalan ng tiwala ang publiko sa isasagawang imbestigasyon ng independent commission.

Dagdag pa ng senador, susuportahan lang aniya nila ang bagong buo na independent commission kung ang mga miyembro nito ay walang halong politika at walang koneksyon sa malalaking negosyo.

Gayunpaman, sinabi ni Senador Cayetano na may agam-agam ang minority bloc sa posibleng conflict of interest at dapat aniya na ang itinalaga para maging miyembro ng independent commission ay may pangako na hindi tatakbo sa national office sa 2028 elections. —Sa panulat ni Jem Arguel