NATIONAL NEWS

Dadagdagan pa ng dalawang taon ng Land Transportation Franchising and Regulatory Board ang age limit para sa mga pampublikong sasakyan.

Nakasaad sa Board Resolution no. 106 series 22, mula sa pitong taon, siyam na taon na ang age limit para sa Transport Network Vehicle Services (TNVS).

Samantala, 17 taon na ang mga bus mula sa 15 taon habang ang mga UV Express naman ay 15 taon na at ang tourist bus ay magiging 12 taon ang maximum age limit mula sa 10 taon lamang.

Gayunman, extended na rin ang pgababayad ng supervision fee hanggang December 21.

Layunin ng nasabing mga resolusyon na matulungan ang mga driver at operator dahil kinakailangan ng mas maraming pampublikong sasakyan ngayong balik eskwela na face-to-face ang mag-aaral. —sa panulat ni Jenn Patrolla

Matagumpay ang anim na araw na working visit ni Pang. Ferdinand marcos jr., sa Estados Unidos.

Sa isang media interview sa New York, sinabi ni Pang. Marcos na kuntento rin sya sa resulta ng mga ginampanang tungkulin ng kanyang delegasyon.

Matatandaan na kabilang sa mga naging aktibidad ng Pangulo sa Amerika, ang pagdalo at pabibigay ng talumpati sa United Nations General Assembly (UNGA), pakikipagpulong sa mga kilalang personalidad at ibat-ibang lider sa mundo, partikular na ang pakikipag-usap kay US president Joe Biden.

Nagkaroon din ng pagkakataon ang Punong Ehekutibo na magsalita at hikayatin ang mga foreign investor doon na mamuhunan sa Pilipinas.

Magugunita na sa unang araw pa lamang ng chief executive sa estados unidos, agad itong nagtungo sa New Jersey upang harapin at magpasalamat sa filipino community na sumuporta at nagtiwala sa kanya noong nagdaang eleksyon.

Ayon kay Pang. Marcos, masaya syang iulat na napakapositibo ng ipinapakitang suporta sa Pilipinas ni US Pres. Biden at ng ating mga kaibigan sa Amerika.

Kaya naman ikinukonsidera ng Punong Ehekutibo na matagumpay ang kanyang working visit sa US at satisfied sya sa lahat ng kanilang ginawa doon.

Napakaganda rin ani PBBM ng naging response sa kanyang panawagan na pagkakaisa para sa mga miyembro ng unga.

Binanggit rin ni Pang. Marcos sa kanyang naging speech sa event na ito ang ilang mahahalagang usapin gaya ng climate change, food security, at ang hangarin ng kanyang gobyerno na makamit ng pilipinas ang upper middle-income status sa susunod na taon.

Nakauwi na ng bansa ang nasa 350 distressed Filipinos mula sa Jeddah, Saudi Arabia.

Ayon sa Department of Foreign Affairs, dumating sa Pilipinas ang mga repatriated Filipinos nitong nakalipas na Biyernes.

Ayon kay DFA acting Undersecretary for Migrant Workers’ Affairs Eduardo Jose De Vega, na kabilang sa mga
ilang senior citizens, expectant women, mga bata, at anim na sanggol.

Pahayag ni De Vega, ngayong pumasok na ang holiday season, sisikapin nilang mapauwi ang mga kababayan natin sa ibayong dagat na nais nang magbalik-bansa, nang sa gayu’y makapiling nila sa araw ng pasko ang kanilang mga mahal sa buhay.

Giit pa ni De Vega, na isang malaking inspirasyon para sa kanila ang saya’t ngiti na nakikita nila sa bawat Repatriated Filipinos pagdating ng mga ito sa kanilang lupang sinilangan.

Kaya naman gagawin aniya nila ang lahat upang maibigay at maipadama sa mga bagong bayani ng bansa ang tunay at maayos na serbisyo ng kanilang ahensya.

Pumalo na sa 3,934,778 ang kabuuang kaso ng COVID-19 sa bansa matapos na madagdagan ng 2,691 new COVID-19 cases.

Ayon sa Department of Health (DOH), ito na ang ikatlong sunod na araw na nakapagtala ng mahigit dalawang libong kaso ng virus ang ahensya.

Umakyat naman sa 32,323 ang active cases mula sa 30,056 nitong Biyernes.

Pahayag ng DOH, nakuha ng National Capital Region (NCR) ang pinakamataas na  kaso ng COVID-19 sa nakalipas na dalawang linggo na umabot sa 13,202 infections, na sinundan ng CALABARZON na nakapagtala ng 4,738 cases, Central Luzon – 2,627, Davao Region 1,248, at Western Visayas – 842.

Aabot naman sa 62,759 ang naitalang death toll habang sumirit na sa 3,839,696, ang bilang ng mga gumaling sa buong bansa.

Pumanaw na si dating Land Tranportation Office (LTO) chief Alberto Suansing sa edad na 70.
Ito ang inanunsyo ng Department of Transportation (DOTr) sa kanilang official facebook page ngayong araw.
Nagpaabot naman ng pakikiramay ang kagawaran sa pamilya at mahal sa buhay ng yumao.
Maliban sa pagiging LTO chief, nagsilbi rin si Suansing bilang chairman ng Land Transportation Franchising and Regulatory Board, DOTr senior consultant, toll regulatory board consultant at secretary general ng Philippine Global Road Safety Partnership.

Ipinasara ng Department of Public Works and Highways (DPWH) ang Kennon Road dahil sa severe tropical storm Karding na posibleng manalasa sa Northern Luzon.

Batay sa abiso ng joint Inter-Agency Task Force Kennon at DPWH Cordillera Administrative Region (CAR), lahat ng uri ng sasakyan ay hindi papayagang dumaan sa Kennon Road.

Pinapayuhan din ang mga residente na mag-ingat partikular na sa mga taong nakatira malapit sa mudslides prone areas.

Inabisuhan din ng kagawaran ang mga motorista na pupunta ng Baguio City at kalapit na bayan na dumaan na lamang sa mga alternatibong lugar.

Nabatid na inaasahang bukas magla-landfall sa Isabela ang naturang bagyo.

Ipinag-utos ng Department of Migrant Workers (DMW) na tanggalin ang patakarang nag-aatas sa mga overseas Filipino workers (OFWs) na magsuot ng full Personal Protective Equipment (PPE) sa kanilang pag-alis sa mga paliparan sa bansa.

Ang utos ni DMW secretary Susan Ople ay nakapaloob sa advisory na inilabas ng Philippine Overseas Employment Administration (POEA) na may petsang September 23.

Nilinaw ni Ople na hindi nire-require ng POEA ang paggamit ng PPEs sa mga aalis na OFW.

Samantala, naglabas din si DMW Undersecretary for Licensing and Adjudication Bernard Olalia ng abiso na nagpapaalala sa recruitment agencies na itigil ang naturang requirement sa mga OFW.