HOT STORIES OF THE WEEK

Dedesisyunan na umano ng Korte Suprema ang kapalaran ni Chief Justice Maria Lourdes Sereno sa Mayo.

Ayon sa mga court insider, magsasagawa ng isang special en banc session ang mga mahistrado sa Mayo 17 upang pagbotohan ang quo warranto petition na inihain ng Office of the Solicitor General laban kay Sereno.

Sususpendihin ang regular en banc sessions matapos ang Abril 24 habang ang buong buwan ng Mayo ay inilalaan para sa pagsusulat ng desisyon subalit nagkasundo ang mga associate justice na pagpasyahan ang kaso ni Sereno bago magbalik ang regular sessions sa Hunyo.

Una nang ipinakalat ni Associate Justice Noel Tijam kung saan na-raffle ang kaso, ang inisyal na 60-page draft decision noong Abril 2 at inaasahan sa a-bente tres ang kanyang final draft habang ang ilan pang mahistrado ay mayroong hanggang Mayo 11 upang isumite ang kanilang dissenting opinions.

Batay sa draft decision, pinahintulutan ang hirit ng SolGen na nag-dedeklarang null and void ang appointment ni Sereno noong August 24, 2012 dahil sa kanyang kabiguang sumunod sa itinakdang eligibility requirement ng Judicial and Bar Council nang mag-apply siya para sa pagiging Punong Mahistrado.

—-

Isa ang Pilipinas sa mga bansa na may pinaka-siksikang silid-aralan sa buong Asya.

Ito ayon kay ACT Teachers Party-list Representative Antonio Tinio, ay batay sa lumabas na datos ng UNESCO Institute for Statistics.

Nasa 43.9 aniya ang lumabas na average size ng mga elementary school sa Pilipinas, mas mataas kumpara sa 31.7 class size sa Malaysia at 23.6 sa Japan.

Bukod sa elementary schools, sinabi ni Tinio na malala na rin ang sitwasyon sa mga public high school sa bansa kung saan umaabot sa 56.1 ang average na class size ng mga estudyante.

Ayon kay Tinio, umaabot ng animnapu (60) hanggang walumpu (80) ang mag-aaral sa loob ng isang silid-aralan na nagiging dahilan ng paghina ng kalidad ng edukasyon sa bansa.

—-

Tanggal na bilang miyembro ng National Food Authority Council si Secretary to the Cabinet Leoncio ‘Jun’ Evasco.

Ayon sa Palasyo, awtomatiko nang hindi mapapabilang si Evasco sa konseho ngayong ibinalik na sa Department of Agriculture ang pangangasiwa sa National Food Authority.

Matatandaang si Evasco ang dating chairman ng NFA council bago nagdesisyon si Pangulong Rodrigo Duterte na ibalik na ang pamamahala sa NFA sa ilalim ng Department of Agriculture.

Samantala, magiging bagong kasapi naman ng NFA council ang Department of Social Welfare and Development o DSWD.

 NFA, tiniyak na hindi na aabutin ng lean months ang pag-susupply ng bigas sa mga rice traders

Hindi na aabutin ng lean months ang pagsu-supply ng bigas ng mga rice traders mula sa Nueva Ecija.

Sinabi sa DWIZ ni NFA spokesman Rex Estoperez na tuluy-tuloy ang pagsu-supply ng bigas ng rice traders hanggang ma-deliver ang mga inangkat na bigas ng bansa.

Kapag nag-stabilize naman, we will concentrate on the establishment of our buffer stock.  Hindi na ito aabuti ng lean months. Pahayag ni Estoperez

Ulat ni Jopel Pelenio (Patrol 17)

Asahan nang paiigtingin pa ng militar ang kanilang opensiba laban sa puwersa ng mga New People’s Army o NPA partikular na sa Silangang Mindanao.

Ito’y dahil sa inaasahang pananamantala ng NPA sa panahon ng halalan para makapangalap ng dagdag na pondo upang gamitin sa kanilang operasyon.

Ayon kay Lt. General Benjamin Mardrigal, Commander ng EASTMINCOM o Eastern Mindanao Command ng Armed Forces of the Philippines (AFP), madalas mangingil ang NPA para sa permit to campaign sa mga kandidato na papasok sa kanilang mga baluwarte.

Dahil dito, nakikipag-ugnayan na aniya sila sa Philippine National Police o PNP upang matugunan ang mga posibleng banta ng mga rebelde sa kanilang lugar habang papalapit ang halalan.

—-

(Updated)

Nagdududa na ang grupong Associated Labor Union- Trade Union Congress of the Philippines (ALU-TUCP) sa sinseridad ng Malacañang sa usapin ng endo o kontraktuwalisyayon sa bansa.

Ito ay ayon kay ALU-TUCP Spokesperson Allan Tanjusay matapos silang makatanggap ng abiso mula sa Department of Labor and Employment o DOLE na kanselado ang nakatakda sanang pulong ng mga labor groups kay Pangulong Rodrigo Duterte ngayong hapon.

Dismayado rin aniya sila na hindi matutuloy ang inaasahan nilang pagpirma sana ng pangulo sa Executive Order o EO laban sa kontraktuwalisasyon.

Dagdag ni Tanjusay, walang ibinigay na dahilan ang DOLE sa pagkansela sa pulong at sa petsa kung kailan pipirmahan ang nasabing EO.

“Ang pagkakaalam kasi namin ang version ng Labor groups ayng kanyang pipirmahan kasi kami ang kanyang inutusang gumawa ng executive order, nagkaroon kami ng final meeting with Secretary Bello nung nakaraang Biyernes at doon nilinis at inayos naming maigi ang aming executive order at nung Biyernes ding yun ay naibigay namin agad yung kopya sa Office ng Executive Secretary, akala po talaga namin ay matutuloy ang 4pm singing ng executive order.” Ani Tanjusay

Isinisisi naman ni Tanjusay sa mga negosyante na aniya’y nagla-lobby at humaharang sa EO ang pagkaka-udlot sa nakatakda nilang pulong kay Pangulong Duterte at paglagda na nito sa nasabing kautusan.

“Hindi rin sinabi sa amin kung kaya’t nagdududa na kami ngayon dahil syempre ire-recognize natin na may mga interes na naglalaro sa paligid ng isyu ng contractualization dahil karamihan sa mga negosyante kasi ayaw nilang magbayad ng tamang pasahod at parang benepisyo sa mga manggagawa, ang nais nila ay manatiling contractual ang ating mga manggagawa.” Pahayag ni Tanjusay.

(Balitang Todong Lakas Interview)

Sa panayam din ng DWIZ, sinabi naman ni Department of Labor and Employment Secretary Silvestre Bello III na pinag-aaralan na ng Malacañang ang pagsertipika ni Pangulong Rodrigo Duterte bilang urgent sa nakabinbing panukalang batas sa Senado kaugnay sa regulasyon sa kontraktuwalisasyon.

Ito ay ayon kay Bello ang dahilan sa kanselasyon ng nakatakda sanang pakikipagpulong ni Pangulong Duterte sa mga labor group.

Gayundin aniya sa inaasahang pagpirma ng Pangulo sa executive order laban sa endo at kontraktuwalisyon ngayong hapon.

Paggigiit ni Bello, mas magiging matibay aniya kung batas at hindi isang EO ang pipirmahan ng Pangulo.

Naniniwala naman si Bello na agad na tutugunan ng Senado ang panukalang batas hinggil sa kontraktiwalisasyon oras na pirmahan ito ni Pangulong Duterte bilang priority bill.

Kasabay nito, nilinaw ni Bello na hindi tuluyang pagbabawal kundi regulasyon lamang ng kontraktuwalisasyon ang nasaad sa nasabing batas.

“Dumaan na ang batas sa House of Representatives at papabilisin na lang ang pagpasa nito sa Senado. Ang purpose ng bill is not to prohibit (contractualization) totally, it is to regulate not to prohibit totally. Kasi merong mga serbisyo na hindi puwedeng ibigay sa regular employee, tulad ng seasonal employees, project-based na pagnatapos ay proyekto ay hindi na sila kailangan ng employer.”

“Ang gusto natin na as a general rule ay dapat direct hiring between the principal employer and the employee na kung maaari ay huwag nang idaan sa service providers.” Pahayag ni Bello

(Ratsada Balita Interview)

Magsasagawa ng job fair ang pamahalaan para sa mga manggagawang maaapektuhan ng pagsasara ng Boracay.

Ayon kay National Disaster Risk Reduction and Management Council o NDRRMC Spokesperson Romina Marasigan, target nito ang matulungan ang nasa tatlumpu’t anim na libong (36,000) manggagawa sa Boracay.

Posible aniyang idaos ang job fair bago ang pagsasara ng isla ng Boracay sa Abril 26.

Samantala, magsasagawa naman ng profiling ang Department of Social Welfare and Development o DSWD sa mga residente ng Boracay bago ikasa ang nasabing job fair para malaman kung anong trabaho ang maaaring ialok sa mga maapektuhan ng pagsasara ng isla.

(Ulat ni Jonathan Andal)

‘Closure preparation’

Mas pinaigting pa ng inter-agency task force ang kanilang paghahanda habang papalapit ang nakatakdang pagsasara at pagsasailalim sa rehabilitasyon ng isla ng Boracay.

Ayon kay Environment Undersecretary Jonas Leones, bukod sa tatlong pangunahing ahensiyang nangangasiwa sa pagpapasara at pagsasaayos sa Boracay, kabilang ang DENR, Department of Tourism at DILG, nakikipag-ugnayan rin sila sa ibang ahensya ng pamahalaan.

Aniya kasama na sa kanilang mga pulong ang mga kagawaran ng Trade and Industry, Health, Agrarian Reform at Labor and Employment para kuhanan ng inputs para sa anim na buwang pagpapasara at rehabilitasyon ng isla.

Sinabi pa ni Leones, mahigit isang daang (100) mga establisyementong naisyuhan na rin ng notice of violation ang kusa nang nagbaklas ng kanilang mga ari-arian.

—-