HOT STORIES OF THE WEEK

Dumating na sa bansa ang pinakahuling batch ng mga Overseas Filipino Workers o OFWs na nag-avail ng amnesty program ng pamahalaan ng Kuwait.

Sakay ang dalawang daan at labing anim (216) na mga OFW ng Qatar Airways at lumapag sa Ninoy Aquino International Airport Terminal 1, dakong alas-6:15 kaninang umaga.

Kasama nilang bumalik ng bansa sina Acts-OFW Representative John Bertiz, Communications Assistant Secretary Mocha Uson, Foreign Affairs Diplomacy Acting Assistant Secretary Elmer Cato at Consul General Pendosina Lomondot.

Habang sinalubong naman sila sa NAIA ni Foreign Affairs Secretary Alan Peter Cayetano.

Ayon sa DFA, umabot sa mahigit limang libong (5,000) mga OFW ang napauwi ng pamahalaan sa pamamagitan ng alok na amnesty program ng Kuwaiti government noong Pebrero.

(Ulat ni Raoul Esperas)

Isang dating barangay chairman at kandidato sa May barangay elections at tatlong iba pa ang patay matapos pagbabarilin ng mga hindi nakilalang salarin sa bayan ng Ungkaya Pukan, Basilan.

Kinilala ang mga biktima na si Usan Asani, 45-anyos, dating barangay chairman ng Camamburingan mga kaanak na sina Andatun Asani, 47-anyos; Jannalun Matindo, 60-anyos at Nadzmi Matindo, 19-anyos.

Ayon kay Brigadier General Juvymax Uy, Commander ng Joint Task Group Sulu, tinarget ng mga salarin ang bahay ni Usan na isa sa mga naghain ng certificates of candidacy (COC) para sa barangay at Sangguniang Kabataan elections.

Ilang oras matapos ang insidente, inaresto ang kasalukuyang barangay chairman ng Camamburingan na si Hernie Asao dahil sa pagbibitbit ng M-16 rifle na paglabag sa COMELEC gun ban habang inaalam na kung may kinalaman si Asao sa pagpatay kay Usan at sa pamilya nito.

Samantala, isa ring barangay chairman at pangulo ng Association of Barangay Captains sa Monkayo, Compostela Valley na kinilalang si Danilo Daanton ang patay matapos pagbabarilin ng mga hindi nakilalang salarin.

Paghihiganti ang tinitingnang motibo kay Daanton na kasalukuyang chairman ng barangay banlag na muling tatakbo sa May 14 elections nang walang kalaban.

—-

Inimbitahan mismo ni Pangulong Rodrigo Duterte si CPP-NPA at NDF founding chairman Jose Maria Sison na umuwi sa Pilipinas upang dito idaos ang usapang pangkapayapaan.

Sa kanyang talumpati sa 24th Annual Convention of the National Federation of Motorcycle Clubs of the Philippines sa Legazpi City, Albay kahapon, sinabi ng Pangulo na binigyan niya ng 60 araw si Sison para umuwi sa Pilipinas.

Gayundin ay upang ibaba ng mga rebelde ang lahat ng kanilang mga armas nang walang pangamba na sila’y maabuso ng mga kawal ng gobyerno.

I created a small window, 60 days, proposal ko kay Sison, hindi ako ang magpunta dun. Ikaw ang pumunta rito, ako magbigay  ng pamasahe, ako magbabayad ng expenses, pati pagkain. Pahayag ng Pangulo

Dahil dito, umapela ang Pangulo sa mga rebelde na samantalahin na ang maliit na puwang na kanyang ibinigay upang makamit na ang ganap na kapayapaan sa bansa.

Kayong mga guerrilla front, you stay in one place, mag-kampo na kayo. Dalhin niyo ang baril diyan sa loob ng kampo niyo, tell us where you are. You can go out of the camp minus the arms, I’m giving you the complete freedom to move. Take advantage of that 60 days, if it succeeds then I would like to thank God muna and the Filipino and the military for their understanding. Paliwanag ng Pangulo

Nangunguna pa rin ang EJK o extrajudicial killings at mga pagpatay na kinasasangkutan ng mga pulis sa ilalim ng drug war ng administrasyong Duterte sa mga pangunahing human rigths concern ng US State Department.

Batay sa US State Department 2017 Country Report on Human Rights Practices, kapansin-pansin umano ang biglaang pagtaas ng bilang ng mga EJK cases sa bansa noong 2016 kung kailan nagsimula ang anti-drug war ng administrasyon.

Lumala rin ayon sa report ang police impunity o ang mga pagpatay na kinasasangkutan ng mga pulis pero naaabsuwelto sa mga parusang legal.

Gayunman, kinikilala rin ng US State Department ang mga ginagawang pagsisikap ng pamahalaan para sa pangangalaga sa karapatang pantao dahil sa mga ikinakasang imbestigasyon hinggil mga pang-aabuso sa karapatang pantao.

LINK: http://www.state.gov/j/drl/rls/hrrpt/humanrightsreport/index.htm?year=2017&dlid=277111

DFA, may buwelta sa nasabing ulat

Hindi kailangan ng Pilipinas ang mga bansa tulad ng Amerika na ang tingin sa sarili ay mas nakahihigit pa sa mga Pilipino.

Iyan ang buwelta ni Foreign Affairs Secretary Alan peter Cayetano sa 2017 Country Report on Human rights Practices ng US State Department.

Ayon kay Cayetano, dapat aniyang ibigay sa Pilipinas ang pantay na paggalang na ibinibigay nito sa lahat ng mga bansa sa mundo bilang isang malayang bansa.

Iginiit pa ng kalihim na pinaiiral pa rin ng Pilipinas ang rule of law sa kampaniya nito kontra sa iligal na droga at walang karapatang pantao aniya ang natatapakan sa pagpapatupad nito.

Pinoprotektahan lamang aniya ng pamahalaan ang buhay at kaligtasan ng mga inosenteng Pilipino na kadalasang nabibiktima ng mga lulong sa droga na wala nang kinikilalang diyos at batas.

Galit at dismayado ang Kilusang Mayo Uno o KMU sa tuluyang pagbasura sa inaasahang pagpapalabas ng executive order o EO ni Pangulong Rodrigo Duterte kontra kontraktuwalisasyon.

Ayon kay KMU Chairman Elmer Labog, pinaniwala lamang sila ng Pangulo na seryoso ito sa pangakong tuluyan nang mawakasann ang kontraktuwalisasyon sa bansa.

Iginiit ni Labog, ang nasabing EO sana ang maaaaring maging senyales ng Kongreso sa pagpapasa ng batas na papabor sa mga manggagawa.

“Mas maganda kung may executive order, sinasabi nga namin ito ang magbibigay tono sana doon sa magiging kahihinatnan ng batas, ang nais lang naman ng mga manggagawa ay ‘yung assurance na ang pangkalahatang patakaran sa pag-eempleyo ng manggagawa ay patakarang regular.” Ani Labog

Kasabay nito, nagbanta si Labog ng isang malaking kilos protesta sa Mayo 1 para kondenahin at ipakita ang galit matapos mabigo sa inaasahang EO mula sa Pangulo.

“Ang nakikita ko ay ang pagdagundong ng ating lansangan sa pagsasama-sama ng mga manggagawang Pilipino upang kondenahin hindi lamang dito sa Metro Manila kundi sa iba pang lugar ‘yung naging posisyon ng ating Pangulo na sa kabila ng paulit-ulit na pangako na wawakasan ang sistemang kontraktuwalisasyon ay mukhang nagingibabaw ngayon ang interes ng mga negosyo na manatiling pinagsasamantalahan ang mga manggagawa.” Pahayag ni Labog

(Balitang Todong Lakas Interview)

Sa unang araw ng kanyang pamumuno, ipinag-utos agad ni Philippine National Police o PNP Chief Oscar Albayalde sa mga hepe ng pulisya ang nationwide suprise inspection sa mga istasyon ng pulis.

Sa kanyang talumpati sa Camp Crame, sinabi ni Albayalde na layon nitong tiyakin ang kahandaan ng mga pulis.

Babantayan naman aniya ng PNP Oversight Committee ang trabaho ng mga ground commander na nagsasagawa ng inspeksyon.

Ayon kay Albayalde, gustuhin man niyang siya mismo ang mag-ikot at mag-inspeksyon sa mga presinto sa buong bansa, hindi niya ito kakayanin.

Pangako ng bagong PNP Chief, magiging huwaran siyang lider at didisiplinahin ang mga pulis.

Kung matatandaan, ilang beses nagsagawa ng surprise inspection si Albayalde noong siya pa ang hepe ng NCRPO kung saan sinibak niya sa puwesto ang mga naaktuhan niyang natutulog at nag-iinumang mga pulis.

—-

Pinaghahandaan na ng Department of Foreign of Affairs o DFA ang biyahe ni Pangulong Rodrigo Duterte sa Kuwait sa susunod na buwan.

Ito ay ayon kay Foreign Affairs Secretary Alan Peter Cayetano matapos kumpirmahing tuloy na ang pagbisita ng Pangulo sa Kuwait para saksihan ang paglagda sa kasunduang nagsasaad ng karapatan at kapakanan ng mga manggagawang Pinoy sa nasabing bansa.

Una nang inihayag ni Pangulong Duterte na pumayag na ang Kuwaiti government sa inilatag na kondisyon ng pamahalaan para sa pangangalaga sa mga karapatan ng mga Overseas Filipino Workers o OFWs sa kanilang bansa.

Samantala, hindi naman malinaw kung aaalisin na ang ipinatutupad na total deployment ban sa Kuwait oras na malagdaan na ang nasabing kasunduan.

—-