HOT STORIES OF THE WEEK

Sabay na magmamartsa sa Labor Day ang Kilusang Mayo Uno o KMU at Nagkaisa Labor Coalition na pinangungunahan ng Trade Union Congress of the Philippines o TUCP.

Ito ang kauna-unahang pagkakataon sa kasaysayan ng paggawa sa Pilipinas na nagbigkis ang iba’t ibang labor groups na may magkakaibang adbokasiya at pamamaraan ng pakikipaglaban sa kanilang karapatan.

Pinagbigkis ang iba’t ibang labor groups ng kabiguan ng Pangulong Rodrigo Duterte na lagdaan ang executive order na tatapos sana sa kontraktuwalisasyon.

Malalaking pako ang magiging simbolo ng malaking kilos protesta bilang pagpapakita sa anila’y pangakong napako ng Pangulo.

Binigyang diin ng Koalisyon at KMU na dalawang taon silang nakilahok sa mga diyalogo sa Pangulo at sa Department of Labor and Employment o DOLE at hiningan pa sila ng draft ng EO.

Pero matapos anila ang limang drafts ng EO na isinumite nila sa Malacañang ay nauwi rin sa wala ang lahat ng kanilang pagsisikap.

—-

Kinuwestyon ngayon sa Korte Suprema ng mga sandcastle maker, drivers at iba pang mga manggagawa sa Boracay island ang legalidad ng ginawang pansamantalang pagsasara ng pamahalaan sa number one beach resort sa bansa.

Batay sa 29 na pahinang petition for mandamus and prohibition ng mga petitioners, hiniling nila sa Korte Suprema na mag-isyu ito ng Temporary Restraining Order (TRO) o di kaya’y status quo ante order na pipigil sa pagpapasara sa Boracay na magsisimula mamayang alas dose uno ng umaga.

Ayon naman kay Atty. Angelo Karlo Guillen, National Union of Peoples’ Lawyers o NUPL-Panay Chapter na tumatayong abogado ng mga petitioner,  nagpatulong na aniya sa kanya sina Mark Anthony Zabal, Thiting Jacosalem at Odon Badiola upang dumulog sa Korte Suprema at maipaabot sa hukuman ang kanilang hinaing. Nanganamba raw ang tatlo na magugutom ang kanilang pamilya dahil sa Boracay closure.

Iginiit ni Atty. Guillen na hindi kailangang isara ang Boracay habang isinasagawa ang rehabilitasyon para hindi rin maapektuhan ang kabuhayan ng mga manggagawa doon.

Wala rin kasi umanong ipinangakong tulong ang lokal na pamahalaan ng Boracay kaya’t siguradong gutom ang aabutin ng mahigit 36,000 na manggagawa.

Ulat ni Bert Mozo (Patrol 3)

Dumipensa ang Bureau of Immigration (BI) sa pagkansela nila sa missionary visa ni Australian missionary Sister Patricia Fox.

Ayon kay Atty. Antonette Mangrobang, Spokesperson ng BI, hindi nila kailangang magpatawag ng hearing para marinig ang panig ni Sister Fox para sa kanselasyon ng kanyang missionary visa.

Ang pagkakaloob aniya ng missionary visa sa isang dayuhan ay isang pribilehiyo at hindi isang karapatan kaya’t malaya ang estado na bawiin ito, anumang oras na kanilang naisin.

Reaksyon ito ni Mangrobang sa pahayag ng abogado ni Sister Fox na hindi dumaan sa due process ang pagkansela sa missionary visa ni Sister Fox.

Gayunman, sinabi ni Mangrobang na maaari pa ring maghain ng kanyang motion for reconsideration si Sister Fox.

Maliban dito, malaya pa rin naman aniyang makakabalik ng Pilipinas si Sister Fox subalit bilang isang turista na lamang.

—-

Matatanggap na ng halos tatlong milyong benepisyaryo ng 4Ps o Pantawid Pamilyang Pilipino Program ang “cash assistance” mula sa pamahalaan bilang tugon sa Tax Reform Law.

Ayon sa Department of Social Welfare and Development o DSWD, maaari nang makuha ng bawat pamilya ang tig-dalawang libo apatnaraang piso na “unconditional cash transfer” sa pamamagitan ng kanilang cash cards mula sa LandBank.

Una nang ipinamahagi ng DSWD noong nakaraang buwan ang nasa mahigit apat na bilyong pisong ayuda para sa halos dalawang milyong benepisyaryo ng 4Ps.

Sa ilalim ng unconditional cash transfer, pagkakalooban ng dagdag na dalawang daang piso ang bawat pamilya bilang pangontra sa epekto ng ipinatutupad na TRAIN Law.

—-

Maaari nang muling magpakasal sa Pilipinas ang mga Filipino na nakipag-divorce sa ibang bansa.

Sa botong sampung pabor at tatlong hindi pabor, sinabi ng Korte Suprema na kikilalanin sa Pilipinas ang diborsyo ng isang Pilipino laban sa foreign spouse nito kahit pa ang Pinoy na asawa ang nag-file ng divorce.

Kabilang sa mga tumutol sa ruling ay sina Justices Mariano del Castillo, Estela Perlas-Bernabe at Alfredo Benjamin Caguio.

Samantala, tanging ang Pilipinas at ang vatican na lamang ang mga bansang hindi pabor sa diborsyo bagama’t legal ang annulment dito.

—-

Inirekomenda na ng National Disaster Risk Reduction and Management Council o NDRRMC kay Pangulong Rodrigo Duterte na magdeklara ng state of calamity sa Boracay.

Ito ang napagkasunduan ng iba’t ibang ahensya ng gobyerno sa special council meeting sa Camp Aguinaldo sa pangunguna ni Defense Secretary Delfin Lorenzana.

Ayon kay Lorenzana, ang kasalukuyang kondisyon ng Boracay at ang nakatakdang pagsasara nito ng 6 na buwan ang dahilan ng kanilang rekomendasyon.

Isang taong state of calamity ang inihihirit ng NDRRMC para sa mga barangay ng Balabag, Manoc-Manoc, at Yapak sa Malay, Aklan na siyang nakakasakop sa isla.

Sa ilalim ng state of calamity, magagamit ng lokal na pamahalaan ang kanilang calamity fund, makapagpapatupad ng price freeze sa mga pangunahing bilihin at makakautang sa gobyerno nang walang interes ang mga residente.