HOT STORIES OF THE WEEK

Magpapatupad ang Department of Interior and Local Government ng ID system sa isla ng Boracay.

Ito ay bahagi ng paunang panuntunan ng ahensya oras na isailalim na sa rehabilitasyon ang Boracay simula sa Abril 26.

Ayon kay DILG Assistant Secretary Epimaco Densing, dapat ipakita ng mga residente ang ibibigay sa kanilang identification card na nagsasaad ng kanilang tirahan sa Boracay upang makalabas-masok ang mga ito sa isla.

Layon nito na mapigilan ang pagpasok ng mga turista maging ng mga bisita ng mga residente ng isla.

BASAHIN: https://www.dwiz882am.com/index.php/boracay-closure-guidelines-inilatag-na-ng-dot/

Simula na ngayong araw ang election period na may kaugnayan sa halalang pambarangay at Sangguniang Kabataan.

Ayon sa Commission on Elections o Comelec, ngayong araw ay magsisimula na silang tumanggap ng certificate of candidacy mula alas-otso ng umaga hanggang alas-singko na tatagal hanggang Abril 20.

Kasabay nito, pinaalalahan ng Comelec ang publiko na epektibo na rin simula kaninang hatinggabi ang Comelec gun ban o ang pagbabawal sa pagdadala ng baril o anumang deadly weapon.

Para naman sa mahigpit na pagpapatupad nito, sinabi ni incoming PNP chief at NCRPO chief Oscar Albayalde na asahan na ang mga ilalatag na checkpoint ng PNP katuwang ang puwersa mula sa Armed Forces of the Philippines.

Kasabay nito nagpaalala naman si Albayalde sa mga motorista na magdahan-dahan at huminto sa mga checkpoint upang hindi maabala.

Comelec at PNP, naghahanda na para sa mga ilalatag na checkpoints

Naghahanda na ang Commission on Elections at Police Provincial Office para sa mga ilalatag nitong checkpoints sa Ilocos Norte kaugnay ng implementasyon ng election gun ban simula ngayong araw na ito.

Ito’y isasagawa bunsod ng idaraos na Barangay at Sangguniang Kabataan elections kung saan nagdeklara na rin ng red alert ang Philippine National Police.

Sinasabing target din ng PNP ang zero crime incident ngayong election period.

Nilinaw naman ni Atty. Alipio Castillo III, Provincial Election Supervisor ng Ilocos Norte, na hindi obligadong sumama ang mga taga-Comelec sa mga ilalagay na checkpoints sa iba’t ibang lugar sa probinsya.

Ayon naman kay Chief Inspector Angelito de Juan, Chief Investigator ng Provincial Police, ilalatag ang mga checkpoints sa mga lugar kung saan madalas may nagaganap na krimen.

Tinawag na bobo at ignorante ng Pangulong Rodrigo Duterte si Chief Justice on leave Maria Lourdes Sereno.

Galit na sinabi ng Pangulo na kaya niya kinastigo sa publiko si Sereno ay dahil ignorante ito sa batas.

Tinukoy ni Duterte ang warning noon ni Sereno sa publiko laban sa pag-aresto sa mga drug suspect nang walang warrant of arrest.

“Alam mo kung bakit I castigated you in public, ignorante ka eh,” “Sabi ko, hindi ko susundin ‘yan Madame Justice kasi bobo ‘yang batas mo,”

“Eh ‘pag ganoon, lalaban lahat ‘yan. Kung walang warrant, if there’s a crime committed in the presence of military and police, bakit? Magproproduce ba siya ng warrant galing sa ‘yo?”

“Kaya nagalit ako sa ‘yo because even an ordinary flunker ng law, alam ‘yan. There are instances the military and the police and persons authority and civilians, for that matter, can make arrest, citizens arrest.”

Binigyang diin ng Pangulo na walang karapatan si Sereno na magtagal pa sa puwesto kaya’t dapat ay mag-resign na ito.

“Sabi ko, torpe ka. That’s why you should not be there. For a Chief Justice, hindi mo alam ‘yan.”

“Talagang dapat alisin ka. Noon pa. Bobo ka na. P***** ***,” Pahayag ng Pangulong Duterte

 

—-

Magsisimula na bukas , Abril 14 ang election period para sa gaganaping barangay at Sangguniang Kabataan elections sa Mayo.

Ayon kay Commission on Elections o COMELEC Spokesperson James Jimenez, kasabay ng election period ay ang pag-iral naman ng gun ban hanggang sa Mayo 21.

Ipinagbabawal sa ganitong panahon ang pagdadala ng baril sa labas ng tahanan o trabaho nang walang gun ban exemption mula sa COMELEC.

Tanging ang mga alagad lamang ng batas na nakasuot ng kumpletong uniporme ang siyang papayagang magdala ng baril.

Asahan na rin ang kaliwa’t kanang mga checkpoints upang masigurong nasusunod ang itinakda ng Comelec.

Simula rin bukas hanggang sa Abril 20 ay maaari nang maghain ng certificate of candidacy ang mga nagnanais na tumakbo sa darating na eleksyon.

Mula naman Mayo 4 hanggang 12 lalarga ang campaign period ngunit isang araw bago ang eleksyon sa Mayo 14 ay ipagbabawal na ang pangangampanya.

—-

Nahigitan ng Bureau of Internal Revenue o BIR ang target nitong koleksyon para sa unang quarter ng taon.

Ayon sa BIR, umabot sa mahigit apatnaraang (400) bilyong piso ang kanilang nakolektang buwis simula Enero ng kasalukuyang taon hanggang Marso.

Labing apat (14) na porsyentong mataas ito sa nakolekta ng ahensiya noong nakaraang taon sa kaparehong panahon na umabot sa mahigit tatlong daan at pitumpong (370) bilyong piso.

Mahigit labing anim (16) na porsyentong mataas naman ito sa target na tatlong daan at animnaput isang (361) bilyong pisong tax collection ng BIR para sa unang quarter ng taon.

Iniugnay naman ni Finance Secretary Carlos Dominguez ang pagtaas sa tax collection ng BIR sa unang tatlong buwan ng taon sa ipinatupad na Tax Reform for Acceleration and Inclusion o TRAIN Act simula noong Enero.

—-