HOT STORIES OF THE WEEK

Sumuko na sa kampo Crame ang dating pulis at sinasabing middleman sa 50-million pesos bribery scandal sa Bureau of Immigration na si Wally Sombero.

Iniharap kanina sa media ni incoming PNP chief Oscar Albayalde si Sombero na umano’y bagman ng negosyanteng si Jack Lam.

Kasunod nito ay dinala na sa Sandiganbayan sixth division si Sombero para hintayin ang commitment order ng Korte para malaman kung saan ito ikukulong.

Nahaharap sa kasong plunder si Sombero matapos masangkot sa naturang scandal sa Immigration.

Kahapon ay ikinulong na ang mga dating opisyal ng immigration na sina Al Argosino at Michael Robles na sinasabing mga nanghingi ng 50 million pesos sa negosyanteng si Jack Lam noong 2016 kapalit ng paglaya ng higit 1,000 undocumented Chinese nationals na mga empleyado ni Lam na naaresto sa isang raid sa Clark.

TINGNAN: Wally Sombero (in black shirt) na umano’y bagman ni gaming tycoon Jack Lam at nahaharap sa kasong plunder, sumuko kay incoming PNP chief Oscar Albayalde sa Camp Crame @dwiz882 pic.twitter.com/T1N8VNnkXv

— Jonathan Andal (@JonathanAndal_) April 11, 2018

 

TINGNAN: Wally Sombero, isinailalim ng CIDG sa booking procedure sa Camp Crame pic.twitter.com/CYfVUDKein

— Jonathan Andal (@JonathanAndal_) April 11, 2018

CIDG, tiniyak na walang ibibigay na special treatment kay Sombero

Tiniyak ng PNP-CIDG na wala silang ibibigay na special treatment kay wally sombero, ang sinasabing middleman sa 50 million peso bribery scandal sa Bureau of Immigration na sumuko kanina sa pnp para sa kasong plunder.

Ayon kay CIDG Dir. Roel Obusan, bagamat dating opisyal ng CIDG si Sombero, tatratuhin pa rin nila ito bilang normal na akusado sa krimen.

Matapos isailalim sa booking procedure, hindi na pinosasan si Sombero nang biyahe itong patungong sandiganbayan para sa commitment order.

Ayon kay Atty. Jesi Lanete, abogado ni Sombero, gusto ng kanyang kliyente na makulong sa PNP Custodial Center sa Camp Crame. May natatanggap kasi aniya itong death threats.

Si Sombero ang sinasabing nagsuhol ng 50 million pesos kina dating Immigration Commissioner Al Argosino at Michael Robles para palayain ang higit isang libong undocumented chinese nationals na mga empleyado ng gaming tycoon na si Jack Lam.

Pero ayon sa kampo ni Sombero, hindi nila ngayon nakakausap si Lam at walang pahiwatig kung susuko rin ito.

Ulat nina Jonathan Andal (Patrol 31) at Jill Resontoc (Patrol 7)

Paiimbestigahan ni Senador Antonio Trillanes ang nakatakdang 6-month shutdown ng isla ng Boracay, Aklan.

Ayon kay Trillanes, nakapagtatakang mabilisang ipinag-utos ni Pangulong Duterte ang pagpapasara sa isla na maaaring paraan lamang upang magbigay daan sa pagpapatayo ng isang casino ng Chinese gaming firm na Galaxy Entertainment.

Hindi rin kumbinsido ang senador sa pahayag ni Pangulong Duterte na magpapatupad ng land reform sa Boracay habang hinimok ang mga residente ng isla na kuwestyunin ang temporary shutdown.

Magfa-file ako ng resolution, calling for a Senate investigation dito sa planong pagsara ng Boracay. Irerefer natin ito sa Committee on Tourism, headed by Sen. Nancy Binay, doon natin sila kukuhanan ng master development plan, nung rehabilitation plan at livelihood plan para sa mga residente doon. Doon naman sa mga residente ng Boracay, I encourage them to file a petition for TRO sa Supreme Court nang mahinto na itong kabalbalan na ito ni Duterte. Pahayag ni Trillanes

Sa katunayan aniya ay nakipagkita si Pangulong Duterte sa may-ari ng Macau-based gaming firm na Galaxy Entertainment batay sa isang larawan na kuha noong isang taon.

At sinasabi niya na wala raw siyang alam sa casino na itatayo, maliwanag sa isang picure na kinakamayan niya ‘yung may-ari ng casino, ito ay nangyari noong December 2017. Maliwanag na nagsisinungaling si Mr. Duterte. Sinabi rin niya noong February na mayroon siyang moratorium sa paggawa ng casino, inulit din niya ‘yan kahapon. Pero noong March 21 ay nag-grant ng license itong PAGCOR, so dito niyo makikita kung gaano kasinungaling si Duterte. Dagdag ni Trillanes

Planong imbestigayson ng Senado sa Boracay closure, hindi na papatulan ng Palasyo

Ayaw nang patulan ng Palasyo ang hirit ni Senador Antonio Trillanes na imbestigahan ang pagpapasara sa isla ng Boracay, sa Aklan.

Ayon kay Presidential Spokesman Harry Roque, wala nang saysay ang panawagan ni Trillanes dahil si Pangulong Rodrigo Duterte na ang tumutol sa pagtatayo ng casino sa isla.

Kasabay ng pagpapasara sa isla sa loob ng anim na buwan, wala na rin aniyang itatayong mga bagong istruktura sa dahil gagawin na itong forested area na pagmamay-ari ng gobyerno.

Una nang nagsuspetsa si Trillanes sa tunay na motibo ng mabilisang pagpapasara sa Boracay simula Abril 26 dahil maaari umano itong maging daan upang itago ang konstruksyon ng casino.

Ulat ni Jopel Pelenio (Patrol 17)

Idineklara na ng Philippine Atmospheric Geophysical and Astronomical Services Administration o PAGASA ang panahon ng tag-init.

Sinabi ng PAGASA na tapos na ang amihan o northeast monsoon season kaya’t asahan na ang mas mainit pang temperatura sa mga susunod na araw.

Gayunman, ipinabatid ng PAGASA na mayroon pa rin isolated rainshowers o manaka-nakang pag-ulan at pagkulog sa ilang lugar lalo na sa hapon o gabi.

Ayon pa sa PAGASA, humina na rin ang Siberian high pressure area at ang presensya ng North Western Pacific high pressure area.

Pinayuhan ng PAGASA ang publiko na umiwas sa heat stress at palagiang hydrated.

—-

Dumulog sa tanggapan ng Kampo Krame ang nasa mahigit limampung (50) biktima ng Bitcoin online investment scam.

Ayon kay Philippine National Police (PNP) Chief Director General Ronald Dela Rosa tinatayang aabot sa siyamnaraang (900) milyong piso ang nakuha sa mga biktima at inaasahan pang aakyat ito sa oras na lumutang pa ang ibang mga biktima.

Pinangakuan umano ang mga investor na madodoble ang kanilang ipinasok na pera sa loob lamang ng labing anim (16) na araw.

Hanggang sa hindi nagparamdam pa ang mga suspek sa mga downline nito.

Magugunitang noong Abril 4 ay naaresto ng Criminal Investigation and Detection Group (CIDG) ang mag-asawang sina Arnel Ordonio 27-anyos at Leonady Ordonio na nakarehistrong may-ari ng NewG company.

Mahaharap sa syndicated estafa ang naturang mga suspek.

TINGNAN: Arnel Ordonio at asawang si Leonady, may-ari ng NewG investment company na nakapangloko umano ng higit 50 katao gamit ang Bitcoin, iniharap ni PNP chief Dela Rosa @dwiz882 pic.twitter.com/anBFwV9gQz

— Jonathan Andal (@JonathanAndal_) April 10, 2018

(Ulat ni Jonathan Andal)

Isa hanggang dalawang session days lamang ang kailangan para maikyat na sa Senado ang impeachment case laban kay Supreme Court Chief Justice on leave Maria Lourdes Sereno.

Ayon kay Congressman Reynaldo Umali, Chairman ng House Committee on Justice, nagkakaisa ang ‘super majority’ na i-impeach si Sereno.

Hawak na aniya ng rules committee na pinamumunuan ni Deputy Speaker Rodolfo Fariñas ang articles of impeachment na pinagbotohan nila sa Committee on Justice.

Sinabi ni Umali na agad pagbobotohan sa plenaryo ang articles of impeachment sa sandaling maikalendaryo ito ng rules committee at mabigyan ng kopya ang lahat ng miyembro ng Kongreso.

Sa Mayo 15 nakatakdang magbalik sesyon ang Kongreso.

Matatandaan na sinabihan ng Pangulong Rodrigo Duterte si House Speaker Pantaleon Alvarez na bilisan ang pag-akyat sa Senado ng impeachment case ni Sereno.

—-

Kumbinsido ang Pangulong Rodrigo Duterte na mahahawakan ng mga bansa sa Asya ang kalahati ng gross domestic product o GDP ng buong mundo pagsapit ng 2050.

Inihayag ito ng Pangulo sa kanyang talumpati sa Hainan China matapos dumalo sa Boao China Forum.

Ayon sa Pangulo, napatunayan niya na ang sama-samang pag-angat ng bawat bansa sa Asya ay kayang-kaya nang abutin.

Maging sa Pilipinas aniya ay maituturing na ring reyalidad ang matagal nang pangarap na pag-unlad ng mga Pilipino kung saan mayroong pantay na oportunidad para sa lahat.

Target aniya nila na maibaba pa sa 14 percent ang poverty rate sa bansa pagsapit ng 2022, mula sa 22 percent noong 2015 at panatilihin ang pito hanggang walong porsyentong paglago ng ekonomiya taon-taon.

“Our Build Build Build program will provide a solid backbone for growth, this will continue to breed infrastructure, connect more people and communities and create more jobs, already we have started a 3-year rolling program amounting to over 69 billion until 2022. We are investing on innovations, in government processes and technology and in human development. In 2022, the Philippines sees itself  as joining the top 1/3 of the global innovation index.”

—-