HOT STORIES OF THE WEEK

Tiniyak ni Senador Panfilo Lacson na magkakaroon ng bagong liderato ang Senado ngayong taon.

Ayon kay Lacson, nagkaroon na ng kasunduan sina Senate President Koko Pimentel at Senate Majority Leader Tito Sotto oras na bumaba ang kasalukuyang Senate President sa pwesto dahil sa pagkandidato nito muli sa pagka-senador sa 2019 midterm elections.

Pero paglilinaw ni Lacson, pagkakasunduan pa ng mayorya kung si Sotto ang papalit kay Pimentel bilang pinuno ng Senado.

Posible aniyang mangyari ang pagpapalit sa pwesto sa pagbubukas ng 18th Congress sa Hulyo o sa Oktubre, kung kailan magsusumite ng kanilang certificate of candidacy ang mga tatakbo sa pagka-senador.

Ulat ni Cely Ortega-Bueno (Patrol 19)

Kumbinsido si Retired Chief Justice Reynato Puno na magbabago pa ang isip ng mga Pilipinong tutol sa ngayon sa Charter Change.

Ayon kay Puno, bagamat 64 porsyento ng mga Pilipino ang tutol sa Charter Change, 32 porsyento naman nito ang tutol lamang sa ngayon pero pabor na isagawa ito sa hinaharap.

Umapela si Puno sa mga Pilipino na pagbigyan munang magtrabaho ang Constitutional Commission na kanyang pinamumunuan para maipakita sa sambayanan ang mga pagbabago sa konstitusyon na matagal nang dapat ipinatupad.

Pinuna ni Puno na karamihan sa mga dahilan ng pagtutol sa Charter Change ay nakabase sa mga pangamba na malabo aniyang mangyari dahil hindi ito makakalusot sa Con-Com.

“Kapag tiningnan natin ang mga base ng pagkontra nila ay panay mga fears, mga pangamba na kapag ginawa ang Charter Change, ‘yang bill of rights ay mababalewala, mababawasan, ang term of office ng mga nakaupo ay palalawigin, na magiging diktador ang nakaupong Presidente, mga ganun ang objections nila, sa tingin natin panay mga pampupulitika lang ‘yan.” Ani Puno

Naniniwala si Puno na matatamo lamang ng Pilipinas ang tunay na pag-unlad kapag naikalat sa iba’t ibang rehiyon ang kapangyarihan ng pamahalaan na sa ngayon ay naka-sentro lamang sa Metro Manila.

Isandaang taon na aniyang umiiral ang Presidential System of Government sa Pilipinas at kitang-kita naman ang mga depekto nito na nakakahadlang sa pag-unlad ng bansa.

“Na-experience natin ang klase ng gobyerno na ang lahat ng poder ay nandito sa Metro Manila, kailan pa po natin ito babaguhin? Lalo na po tingnan natin ang nangyayari sa Mindanao, ang ibang grupo diyan gusto lang humiwalay sa ating republika, bakit po nagkakaganyan ‘yan dahil sa concentration of powers dito sa Metro Manila.” Pahayag ni Puno

‘Two party system’

Target ng Constitutional Commission na magkaroon na lamang ng dalawang malalakas na partido sa bansa sa ilalim ng binabalangkas nilang amyenda sa konstitusyon.

Ayon kay Retired Supreme Court Chief Justice Reynato Puno, Chairman ng Con-Com, mas lalakas ang demokrasya sa bansa kung mapipigilan ang mga balimbing na mahilig magpalipat-lipat ng partido para sa kanilang pansariling interes.

Binigyang diin ni Puno na ang pagiging balimbing ng maraming mga pulitiko ang nagiging ugat ng political patronage sa bansa.

 (Ratsada Balita Interview)

Kumpiyansa ang Malacañang na madedepensahan ni dating Customs Commissioner ngayo’y Defense Deputy Administrator for Operations Director Nicanor Faeldon ang kanyang sarili.

Ito’y makaraang irekomenda ng Ombudsman ang pagsasampa ng mga kasong administratibo at kriminal laban kay Faeldon kaugnay ng mahigit anim na bilyong pisong shabu shipment mula sa China.

Ayon kay Presidential Spokesman Harry Roque, isa aniyang magandang pagkakataon iyon para kay Faeldon upang maipagtanggol nito ang sarili sa korte mula sa mga alegasyong ibinabato sa kaniya.

Magugunitang inihayag ng special investigation panel ng Ombudsman na may sapat na ebidensya na magdiriin kay Faeldon hinggil sa naturang usapin.

Samantala, inabsuwelto naman ng Ombudsman ang magbayaw na sina dating Davao City Vice Mayor Paolo “Pulong” Duterte at Atty. Manases Carpio na asawa ni Davao City Mayor Sara Duterte.

—-

Kinumpirma ni Pangulong Rodrigo Duterte ang kanyang nakatakdang pagbiyahe patungo sa Philippine Rise o Benham Rise.

Kasabay ito ng unang anibersaryo ng nilagdaan niyang Executive Order Number 25 noong Mayo 16 2017 na nagdedeklarang baguhin ang pangalan ng naturang talampas sa ilalim ng dagat.

Ayon sa Pangulo, mahalagang bigyang halaga ang nasabing okasyon para igiit ang soberanya ng Pilipinas sa naturang karagatan na hitik sa mga yamang dagat at pinaniniwalaang mayaman din sa deposito ng langis.

Kasunod nito, sinabi rin ng Pangulo na nangako sa kaniya ang China na hindi nila gagalawin ang Bajo de Masinloc o mas kilala bilang Scarborough o Panatag Shoal na bahagi ng pinagtatalunang teritoryo sa West Philippine Sea.

Ayon sa Pangulo, nagkaroon siya ng panibagong pakikipag-usap sa mga opisyal ng China, tatlong linggo na ang nakalilipas subalit hindi naman niya pinangalanan kung sinong opisyal ang kaniyang naka-usap.

—-