HOT STORIES OF THE WEEK

Ipinagtanggol ni Labor Secretary Silvestre Bello III ang Executive Order kontra endo o kontraktuwalisasyon.

Ito ang tugon ng kalihim matapos batikusin nina Kilusang Mayo Uno President  Elmer Labog at  Nagkaisa Leader Renato Magtubo na pumapabor anila sa mga employer.

Itinanggi ni Bello na ang nabanggit na EO ay pumapabor sa mga employer at iginiit na nilagdaan ni Pangulong  Rodrigo Duterte ang nabanggit na bersyon ng kautusan sa paniwalang makatutulong ito sa interes ng mga manggagawa at employer.

Gayunman, aminado si Bello hindi tuluyang mapagbibigyan ng gobyerno ang hiling ng mga labor group na tuluyang wakasan ang kontraktuwalisasyon.

Gobyerno mahihirapan sa  tuluyang pagbuwag sa kontraktuwalisasyon ayon sa isang labor expert

Posibleng  mahirapan  ang  gobyerno  na  ipagbawal  ang  lahat  ng  uri  ng  kontraktuwalisasyon.

Ito ang reaksyon ni dating UP School of Labor and Industrial Relations Dean, Dr. Rene Ofreneo makaraang lagdaan ni Pangulong Rodrigo Duterte ang Executive Order kontra “endo.”

Ayon kay Ofreneo, ang nabanggit na kautusan ay isang hakbang patungo sa mas mahigpit na  regulasyon sa outsourcing at short-term hiring ng mga manggagawa.

Dapat anyang mapagtanto ng mga labor group na hindi lahat ng trabaho ay maaaring i-regular.

Ipinunto ni Ofreneo na ang tunay na issue ay ang pagwawakas sa pang-aabuso ng ilang  employer na nagreresulta sa  pangongontrata tulad ng mga manpower agency upang maiwasan ang regularisasyon ng mga manggagawa.

—-

Tiwala si Foreign Affairs Secretary Alan Peter Cayetano na malalampasan din ng Pilipinas at Kuwait ang pinagdaraanang gusot sa kasalukuyan.

Kasunod ito nang naging pahayag ni Kuwait Deputy Foreign Minister Nassel Al-Subaih na hindi nila nais pang lumala ang sitwasyon sa pagitan ng Pilipinas at ng kanilang bansa.

Ayon kay Cayetano, ang naging pahayag ng Kuwait ay nagpapakita ng kahandaan nito na maayos ang gusot sa pagitan ng Pilipinas at Kuwait.

Kinikilala aniya ng Pilipinas ang pagtitiyak ng Kuwait na makikipagtulungan sa bansa para sa pagbibigay proteksyon sa mga pilipinong manggagawa.

Tiniyak din ni Cayetano na nananitili pa rin ang matibay na pagkakaibigan ng dalawang bansa.

Nilagdaan na ng Pangulong Rodrigo Duterte ang executive order na inaasahang tatapos sa endo o end of contract sa mga manggagawa.

Sa harap mismo ng mga dumalo sa pagdiriwang ng Labor Day sa Cebu City nilagdaan ng Pangulo ang EO.

“I remain firm in my commitment to put an end to ‘endo’ and illegal contractualization.” Ani Pangulong Duterte

Binasa ng Pangulo ang isang bahagi ng EO na nagbabawal sa contracting at sub-contracting ng mga empleyado na nagkakait sa kanila ng seguridad sa trabaho.

Tiniyak ng Pangulo na hindi titigil ang kanyang pamahalaan hangga’t hindi tuluyang natutuldukan ang anya’y kahiya-hiyang nakagawian ng mga employers.

Dahil dito, hiniling ng Pangulo sa Kongreso na muling bisitahin ang Labor Code at iba pang batas sa paggawa upang maamyendahan ito at maiakma sa kasalukuyang panahon.

“I can only implement but if there are things that need to be corrected, modified to suit the needs or the demand of time… We have to amend or correct or recommend revision or revisit the laws.” Pahayag ng Pangulo

Inatasan rin ng Pangulo ang Department of Labor and Employment o DOLE na isumite sa kanya ang listahan ng lahat ng kumpanya na sangkot sa endo.

Courage

Samantala, hindi makikinabang ang mga contractual workers ng pamahalaan sa executive order ng Pangulong Rodrigo Duterte na tatapos sa kontraktuwalisasyon.

Ayon kay Ferdinand Gaite ng grupong Courage, isa sa bawat tatlong government employees sa kasalukuyan ang hindi regular sa kanilang trabaho o kabuuang pitong daan at dalawampung libo (720,000).

Sinabi ni Gaite na hindi naman sila sakop ng labor code na nagbibigay ng proteksyon sa mga manggagawa.

Dahil dito, tiniyak ni Gaite na tuloy tloy ang gagawin nilang pakikipaglaban para sa kapakanan ng mga tinaguriang permanent contractual employees ng pamahalaan.

Bukod sa mas maliit ang suweldo, wala ring aasahang retirement benefits ang mga hindi regular na manggagawa ng gobyerno.

—-

Idinipensa ng Department of Interior and Local Government o DILG ang pagpapalabas nila ng Philippine Drug Enforcement Agency o PDEA ng dalawandaan at pitong (207) pangalan ng mga opisyal ng barangay na sangkot umano sa iligal na droga.

Sa panayam ng DWIZ, iginiit ni DILG Assistant Secretary Epimaco Densing III na dumaan sa masusing beripikasyon mula sa apat na intelligence ng pamahalaan ang inilabas nilang ‘narco-list’.

Sinabi ni Densing na ang mga naturang opisyal ay nakatakda nilang kasuhan sa tanggapan ng Ombudsman.

“’Yun ang pagkakaiba, kung ikaw ay public official at ikaw ay pribadong indibiduwal, ‘yung pribado hindi mo  basta-bastang puwedeng pangalanan kasi meron silang right to privacy, ‘yung mga halal may responsibilidad sila na dapat maganda ang kanilang uri ng pamumuhay, hindi sila sangkot sa questionable na pamumuhay at kinikita.” Ani Densing

Samantala, nanawagan naman sa publiko si PDEA Director General Aaron Aquino sa publiko na makipagtulungan sa kanilang tanggapan kung may nalalaman sa aktibidad ng mga opisyal ng mga barangay na isinasangkot sa iligal na droga.

Ito aniya ay para mapalakas pa ang mga ihahaing ebidensya laban sa mga tiwaling opisyal ng pamahalaan.

“Hindi biro kasing maglagak ng mga ebidensya laban sa mga ito lalong-lalo na kung ikaw ay isang protektor, sabi ko nga kung hindi ka namin mabira sa concrete evidence o material evidence ay bibirahin ka naman namin sa financial investigation, mas mahaba-habang investigation ito.” Pahayag ni Aquino

 (Ratsada Balita / Balitang Todong Lakas Interview)

Dalawa sa bawat sampung negosyante sa Pilipinas ang nakahandang manuhol para manalo ng kontrata o manatili sa negosyo.

Resulta ito ng 15th EY Global Fraud Survey sa dalawang libo limandaan at limampung (2,550) business executives na isinagawa sa limampu’t limang (55) mga bansa.

Ayon sa EY Philippines, bagamat halos isandaang (100) porsyento ng mga respondents sa Pilipinas ang nagsabing pinakamahalaga pa rin sa kanila ang integridad ng kanilang negosyo, may dalawampu’t anim (26) na porsyento rito ang nagbigay ng kahandaang manuhol para makakuha ng kontrata sa negosyo.

—-

Bumagsak ang economic optimism sa bansa sa unang tatlong buwan ng 2018.

Batay sa IBR o Grant Thorntons International Business Report, bumagsak ng labing dalawang (12) puntos ang economic optimism sa bansa, ang pinakamababang lebel sa nagdaang dalawang taon.

Mula sa 88 percent sa huling bahagi ng 2018 ay nakapagtala lamang ng 74 percent ang Pilipinas.

Ilan sa mga nakitang dahilan ng IBR ang bumabang expectations sa trabaho, pagbaba ng investment sa technology at bumagsak na profitalibity expectations.

Sa kabila nito, pumapangatlo pa rin ang Pilipinas sa mga bansa sa Asya na pinakapositibo ang pananaw sa negosyo.

—-