HOT STORIES OF THE WEEK

Tinatayang 700 sundalo o mahigit isang batalyon mula sa Philippine Airforce, Army at Navy ang inalerto ng armed forces para sa mga protesta sa labor day celebration, ngayong araw.

Ayon kay Brig. Gen. Allan Arrojado, commander ng A.F.P. Joint Task Force-N.C.R., hindi ikakalat sa mga kalsada ang mga naturang sundalo at naka standby lamang sa kani-kanilang mga kampo hanggat hindi nagpapasaklolo ang P.N.P.

Sa ngayon, tulad ng P.N.P. walang namomonitor na banta sa seguridad ang militar para sa araw ng paggawa.

Libu-libong raliyista na karamiha’y nagmula sa iba’t ibang labor group ang inaasahang maglulunsad ng kaliwa’t kanang protesta sa iba’t ibang bahagi ng bansa, ngayong araw.

Inilabas na ng Philippine Drug Enforcement Agency o PDEA ang listahan ng mga barangay officials na sangkot sa illegal drugs.

Ayon kay PDEA Director Aaron Aquino, ang pagsasapubliko nila sa listahan ay batay sa direktiba na rin ng Pangulong Rodrigo Duterte.

Siyamnapung (90) barangay chairmen at isandaan at labing pitong (117) kagawad ng barangay ang kasama sa inilabas na ‘narco-list’ ng PDEA.

Pinakamarami rito ang mula sa Region 5, tatlumpu’t apat (34) ang mula sa Caraga at labing tatlo (13) mula sa Autonomous Region in Muslim Mindanao o ARMM.

Tiniyak ni Aquino na mayroon silang sapat na ebidensya laban sa mga suspects bago nila inilabas ang listahan.

“The dispensure of valid and valuable information is needed to pertain and minimize corruption amongst officials of the government, to promote the highest standards of honesty in public service and to elevate morality in public administration. This is the reason why public officials permitted to right of privacy as compared to ordinary individuals. These officials served the public and are therefore, accountable to the public.”

Samantala, kinontra naman ni DILG Secretary Eduardo Año ang mga nagsasabing parang naglabas ng hit list ang pamahalaan para sa mga vigilante.

“I don’t believe that it is equivalent to hit list because this people in the list have been validated by different inter-agencies and we are filing charges against these people. In fact, they even release and encourage people to testify against these government barangay officials. You know sa isang barangay, alam naman talaga nila kung sino yung promotor ng drugs diyan.”

—-

BADAC

Ikinakasa na ng Department of Interior and Local Government o DILG ang kasong administratibo laban sa mga opisyal ng barangay na nabigong magtatag ng BADAC o Barangay Anti-Drug Abuse Council.

Ayon kay DILG Secretary Eduardo Año, sa labing anim (16) na barangay na natukoy nilang walang BADAC, lima rito ang mula sa National Capital Region at labing isa sa Bicol Region kung saan sampu ang mula sa Aroroy Masbate at isa sa Gubat Sorsogon.

Sinabi ni Año na hindi nagpabaya ang DILG sa pagpapalabas ng mga memorandum para paalalahanan ang mga barangay officials sa kahalagahan ng BADAC sa paglaban sa illegal drugs.

Unang batch pa lamang aniya ito ng kakasuhan dahil may animnaraan (600) pang barangay ang walang BADAC report sa DILG.

Samantala, sinabi ni Año na isusunod nilang aalamin ang performance ng mga alkalde sa pagtatatag ng anti-drug abuse council at kung gumagana ang mga tanggapan nito.

”The DILG will also monitor functionality with their respective BADACS. When we say ‘’functional’’, it means that the concerned LGUs have allowed substantial budget for the anti-drug campaign like committee-based rehab program. They must have also submitted their BADAC action plans to the concerned DILG offices and observe implemented program, projects, and activities in the step on their action plan.”

(With report from Jill Resontoc)

Posibleng mapaaga pa ang paglalabas ng desisyon ng Korte Suprema kaugnay sa inihaing quo warranto petition ng Office of the Solicitor General o OSG laban kay Chief Justice on leave Maria Lourdes Sereno.

Ito’y makaraang itakda ng High Tribunal sa susunod na Biyernes, Mayo 11 ang botohan ng mga mahistrado mula sa orihinal nitong petsa na Mayo 17.

Kasabay ng isasagawang botohan, nakatakda ring ilabas ng mga mahistrado sa Mayo 11 ang kani-kanilang mga opinyon kaugnay ng naturang kaso.

Isasagawa ang special en banc session ng mga mahistrado sa nabanggit na petsa o ilang araw bago tuluyang magbalik sesyon ang mga mambabatas mula sa kanilang Lenten break sa Mayo 14.

(With report from Bert Mozo)

Pinatitiyak ni Philippine National Police o PNP Chief Director General Oscar Albayalde na hindi mahahaluhan ng mga armadong indibiduwal ang ikinakasang malawakang kilos protesta ng mga grupo ng mga manggagawa para sa Labor Day bukas.

Ayon kay Albayalde, bagamat wala pa silang namomonitor na anumang banta sa seguridad bukas, hindi naman aniya nila inaalis ang posibilidad na may mga armadong indibiduwal o grupo ang manamantala sa kilos protesta.

Tulad aniya ng nangyari sa Tarlac at Kidapawan City kung saaan nauwi sa madugong engkwentro ang dapat sanang mapayapang pagkilos ng mga magsasaka.

Dagdag ni Albayalde, maximum tolerance ang kanilang ipatutupad bukas pero aarestuhin aniya ang mga mahuhuling gagawa ng iligal.

Naka-heightened alert na rin ang buong pwersa ng PNP para sa Labor Day bukas.

(With report from Jonathan Andal)

Binigyan na lamang hanggang ngayong araw, Abril 30 ni Justice Secretary Menardo Guevarra ang lahat ng undersecretaries at assistant secretaries na itinalaga ni dating Justice Secretary Vitaliano Aguirre para magsumite ng kanilang resignation kay Pangulong Rodrigo Duterte.

Ito ay para bigyang kalayaan ang bagong kalihim na mamili ng kanyang makaka-trabaho sa kagawaran.

Hindi naman kasama sa pinaghahain ng resignation ang mga career officials.

Sa sandaling makapaghain ang mga opisyal ng kanilang resignation ay mananatili sila sa puwesto hangga’t wala pang kaukulang aksyon dito si Pangulong Duterte.

Sa record ng DOJ, mayroong limang undersecretaries at anim na assistant secretaries na itinalaga si dating Justice Secretary Aguirre kabilang na sina sina Undersecretaries Erickson Balmes; Raymund Mecate; Reynante Orceo; Deo Marco at Antonio Kho Jr.

Binabalak na ni Pangulong Rodrigo Duterte na sampahan na ng kaso ang mga hotel at business owners sa Boracay.

Ito ang binigyang-diin ng pangulo kasabay ng pagbibigay nito ng babala sa mga negosyante sa isla na wag gumawa ng anumang panggulo sa mga ipinatutupad ng pamahalaan na mga hakbangin para muling maibalik ang dating ganda ng Boracay.

Pahayag ng pangulo, handa niyang isailalim sa land reform ang buong isla lalo na’t binalahura lamang ito ng mga abusadong negosyante.

Ayon sa punong ehektibo, hindi nya sasantuhin ang sinuman kahit pa may-ari ng isang 5 star hotel.

“Kayong mga negosyante wag kayong mag udyok udyok diyan, pag ini-land reform ko yan, sinsilyo ang abot ninyo. We have what? To test 5 star hotels? I don’t give a sh*t. You have spoiled the place.”

Ipinagtataka naman ni Pangulong Duterte kung paanong nasabi ng mga negosyante doon na pag-aari nila ang ilang property sa Boracay gayung isa itong forestal o agricultural land.

Giit ng pangulo, walang batas sa Pilipinas na nagdedeklarang isang commercial area ang Boracay.

Hindi pa panahon para isapubliko ang listahan ng mga barangay officials na sangkot sa iligal na droga.

Ito ang binigyang-diin ni Pangulong Rodrigo Duterte sa kanyang arrival speech kaninang umaga sa Davao City.

Ayon kay Pangulong Duterte, kailangan niya munang muling pag-aralan ang narco list na hawak ng Philippine Drug Enforcement Agency o PDEA bago ipag-utos ang pagsasapubliko nito.

Taliwas naman ang pahayag na ito ng pangulo sa naunang statement ng PDEA na nagbigay na umano siya ng go signal upang ilabas na sa publiko ang naturang listahan.

Matatandaang sinabi rin ng PDEA na bukas, araw ng lunes, kanila nang isasapubliko ang hawak na narco list.

Walang balak si Pangulong Rodrigo Duterte na bawasan ang 6 month closure ng Boracay island.

Sa ginanap na press conference sa Davao International Airport ni Pangulong Duterte, kasabay ng kanyang pagbabalik bansa mula sa ASEAN summit sa Singapore, sinabi nito na hindi niya pakikialaman ang rekomendasyon nina Environment Secretary Roy Cimatu, Interior Officer-in-Charge Eduardo Año at Tourism Secretary Wanda Teo hinggil sa period of closure ng kilalang tourist destination sa bansa.

Paliwanag ng pangulo, hindi siya agad-agad nagrerevoke ng mga rekomendasyon ng mga cabinet members dahil tiyak aniyang 90 porsyentong mayroon itong katotohanan.

Nanindigan rin ang panunong ehekutibo na tuloy-tuloy ang paglilinis at rehab effort sa isla upang maiwasan ang mga posibleng mangyari sa hinaharap na hindi na maaring maligo o lumangoy sa Boracay.

Matatandaang inirekomenda ng ilang cabinet officials ang six-month closure sa isla para maisailalim ito sa rehabilitasyon matapos lumala ang mga kinakaharap nitong environmental problems.

Balik bansa na si Pangulong Rodrigo Duterte mula sa kanyang pagdalo sa 32nd ASEAN o Association of Southeast Asian Nation Summit sa Singapore.

Sa kanyang arrival speech kaninang pasado alas-2:00 ng madaling araw, ibinida ng Pangulo ang milyun-milyong pisong puhunan na kaniyang naiuwi mula sa kanyang biyahe.

“We also agreed to promote free and fair and rules based trading system to sustain the gains of our economic growth, I also met business leaders and I’am pleased to have witnessed the signing of 10 business agreements projected to generate at least 1,900 jobs and bring in at least 185 million in investments.” Ani Pangulong Duterte

Kasabay nito, umapela ang Pangulo sa Kuwait na huwag abusuhin ang mga OFW o Overseas Filipino Workers na nagtatrabaho roon.

Una rito, nanawagan ang Pangulo sa mga OFW na nagtatrabaho sa naturang bansa na umuwi na lamang sa Pilipinas.

“Philippines and Kuwait have shared history that both sides must learn to value, current developments however test our commitment to work together, we must be undeterred in the work of helping our fellow human beings as we pursue our shared interest with due respect to each others sovereignty. But if my people are considered a burden to some government mandated to protect them and uphold their rights then we will do our part. To our Filipino professionals who may wish to stay in Kuwait, there is really no problem, all I ask is that the employers treat the Filipinos with the humanity they deserve, please do not abuse Filipino workers.” Dagdag ng Pangulong Duterte

Muli ring iginiit ng Pangulo na mananatili ang pagpapatupad ng deployment ban o hindi pagpapadala ng mga Overseas Pinoy Workers sa nasabing bansa hangga’t hindi aniya umaayos ang pagtrato roon sa mga Pilipino

“This ban stays permanently, there will be no more recruitment especially domestic helpers, wala na. China is also getting some 1,000 teachers, we will give them preference, unahin muna natin ‘yun, I will be going to communicate with my friend how they can help us but they estimate that within five years we will be sending something like 100,000 English teachers.” Pahayag ng Pangulong Duterte

—-