HOT STORIES OF THE WEEK

Nominado si Supreme Court Associate Justice Teresita de Castro bilang bagong Ombudsman kapalit ni Ombudsman Conchita Carpio Morales na nakatakdang mag-retiro sa Hulyo.

Si retired Associate Justice Arturo Brion ang nag-nominate kay De Castro sa puwesto.

Ayon kay Brion, kuwalipikado bilang Ombudsman si De Castro dahil napatunayan nito ang kanyang kakayahan at integridad sa mahigit sampung taon nito sa hudikatura.

Naging laman ng mga balita si De Castro nang tumestigo ito sa impeachment hearing ng House Committee on Justice laban kay Supreme Court Chief Justice on leave Maria Lourdes Sereno.

Napag-alamang kailangang tanggapin muna ni De Castro ang nominasyon bago ito mapasama sa mga ikukunsiderang kandidato ng Judicial and Bar Council o JBC.

Sa Mayo 15 ang deadline ng nominasyon para sa magiging kapalit ni Morales.

—-

Pinag-aaralan ng House Committee on Transportation na gawing criminal offense ang pagkakansela ng mga driver ng Transport Network Vehicle Services o TNVS sa booking ng kanilang mga pasahero.

Gayundin ang pagtanggi o pamimili ng mga taxi drivers na ihatid ang kanilang mga pasahero sa kahit saang destinasyon.

Ayon kay House Committee on Transportation Vice Chairman Representative Edgar Mary Sarmiento, layunin ng panukala ang madisiplina ang drivers ng mga TNVS at maproteksyunan ang karapatan ng mga mananakay.

Aniya, sa pagbubukas pa lamang ng session sa Mayo 15 muli nilang tatalakayin ang mga nabinbing panukalang batas na nagre-regulate sa mga TNVS.

Samantala, hinimok naman ni Deputy Speaker Raneo Abu ang Land Transportation Franchising and Regulatory Board o LTFRB na tiyaking napoprotektahan nito ang publiko laban sa mga abusadong TNVS at taxi drivers.

—-

Dalawang araw bago siya maupo sa pwesto, nag-inspeksyon kahapon sa loob ng Bilibid ang bagong hepe ng BuCor o Bureau of Corrections na si Dir. Gen. Ronald “Bato” Dela Rosa.

TINGNAN: Bagong talagang hepe ng Bureau of Corrections na si Dir. Gen. Ronald Dela Rosa, surpresang nag-inspeksyon sa Bilibid bago siya umupo sa pwesto bukas, May 7 @dwiz882 pic.twitter.com/dgjGDyKtrr

— Jonathan Andal (@JonathanAndal_) May 6, 2018

Sa panayam ng DWIZ, sinabi ni Bato na binisita niya ang kanyang tutuluyan doon at sinilip na rin ang kondisyon ng mga preso.

“Naawa ako sa mga tao dun, sobrang init ng panahon tapos ang hirap ng sitwasyon nila doon, parang mga sardinas…grabe. Grabe ang skip so overcrowded na talaga yung ating piitan.”

Binista rin niya ang medium security compound dahil sa mga ulat na naroon ang mga high profile drug lord pero nalaman niyang naibalik na ang mga ito sa building 14.

Napansin naman ni Dela Rosa sa kanyang pag-iinspeksyon na mababa ang pader sa tabi ng maximum security compound na madali anyang paghagisan ng mga kontrabando papasok sa Bilibid.

Dahil dito, gustong ipatanggal ni Bato ang kalsada sa labas ng maximum security compound para walang makalapit doon na sibiliyan.

“Dapat off limits yan, restricted area yan kasi maximum security compound e. Anybody that will get closer to that area pwedeng barilin para hindi makalapit.”

Nang matanong naman kung magpapatupad siya ng oplan tokhang sa bilibid, sagot ni Bato.

“Totokhangin pa ba natin o tokbang nalang diretso? …. Basta bantay kayo mga druglord at tapusin ko itong problema na yan. Bakit ako mamomroblema sa inyo na kayo ang nasa loob? Kayo ang mamroblema sa akin.”

—-

Hindi dapat ipagsawalang-bahala ng gobyerno ang pagdedeploy ng China ng mga missile sa Spratly islands.

Ito ang reaksyon ni Senador JV Ejercito, isa sa mga miyembro ng Senate Committee on National Defense and Security sa pahayag ni Presidential spokesman Harry Roque na hindi naman banta sa Pilipinas ang mga nasabing missile.

Ayon kay Ejercito, hindi man itutok sa Pilipinas ang mga nasabing armas, may direkta pa rin itong epekto sa seguridad sa paligid ng pinag-aagawang karagatan lalo sa Palawan.

Mag-file na tayo ng diplomatic protest, sobrang pambabastos na ito sa ating soberanya. Sabi nga eh, one of our constitutional duties is to protect our territorial integrity. Pahayag ni Ejercito

Samantala, duda naman ang senador kung may magagawa ang Estados Unidos sa nagpapatuloy anyang militarisasyon ng Tsina sa mga pinag-aagawang isla.

Kaya lang may mga instances na noong nagkaroon tayo ng problema eh parang hindi naman tayo sinuportahan. Ang sa akin lang, as a sovereign nation, regardless sa ating alliance. Supposed to be ang China ay kaibigan ng administrasyong Duterte, eh sana man lang ay respetuhin nila ‘yung ating territorial integrity. Paliwang ni Ejercito.

Sen. Honasan, inirekomenda na dapat munang beripikahin ang impormasyon ng pagdedeploy ng missile sa PH reefs

Duda si Senate Committee on National Defense and Security Chairman Gringo Honasan sa ulat na nagdeploy ang China ng mga missile sa Fiery Cross, Subi at Mischief reefs sa Spratly islands na inaangkin din ng Pilipinas.

Ayon kay Honasan, dapat beripikahin ang naturang impormasyon upang maiwasan ang posibleng ‘miscommunication’ sa pagitan ng Pilipinas at China.

 I’m assuming na itong impormasyon na ito ay totoo. Huwag tayong padalos-dalos, may mga photograph daw.. Alam mo sa ngayon, sa panahon ng computer technology, maniguro lang tayo na nasa tama tayo at totoo ang impromasyon na dumarating sa atin. Pahayag ni Sen. Honasan

Samantala, ipinunto ng senador na dehado ang Pilipinas sa pakikipag-bilateral talk sa China sa issue ng maritime dispute.

Ito, aniya, ang dahilan kaya’t dapat ng himukin ang iba pang claimant na Vietnam, Brunei, Malaysia at Taiwan na makipag-usap sa Tsina.

Tanungin na natin ‘yung UN, ASEAN ‘yung mga karatig bansa na hindi lang kami ang apektado nito. So habang maaga, magkaisa na tayo at diplomasya, kausapin natin nang masinsinan ang China. Diba ang gusto ng China ay bilateral, one on one ay wala tayong kalaban-laban diyan pero kung multilateral meron tayong dagdag na pwersa. Paliwanag ni Sen. Honasan

Sinisi ni Pangulong Rodrigo Duterte ang Amerika at ang nakalipas na administrasyon sa patuloy na militarisasyon ng China sa pinag-aagawang teritoryo sa West Philippine Sea.

Partikular na tinukoy ng Punong Ehekutibo si dating Pangulong Noynoy Aquino dahil sa kabiguan umano nitong pigilan ang China.

Ayon sa Pangulo, nakuha ng dating administrasyon ang paborableng desisyon mula sa Permanent Court of Arbitration na sumusuporta sa claim ng Pilipinas. Wala naman aniyang ginawa ang dating Pangulong Aquino para komprontahin at igiit sa China ang karapatan ng Pilipinas sa mga pinag-aagawang teritoryo.

Gayunman, matatandaang lumabas ang desisyon International Tribunal noong Hulyo a-dose ng 2016, ilang araw magmula nang umupo bilang Pangulo si Duterte.

Target ng Commission on Elections o COMELEC na maabot ang pitumpu (70) hanggang walumpung (80) porsyentong voters turnout sa barangay at Sangguniang Kabataan elections.

Ayon kay Director James Jimenez, Spokesman ng COMELEC, umaasa silang marami pa rin ang boboto sa kabila ng kakaunting mga kandidato sa ilang mga barangay.

Sa pag-arangkada ng kampanya ngayong araw na ito, pinaalalahanan ni Jimenez ang mga kandidato hinggil sa mga ipinagbabawal ng batas sa pangangampanya.

“Kapag wala sa common poster area ang mga propaganda materials at posters ay bawal po sa batas ‘yan, kailangan nasa common poster area tayo, pangalawa, kailangan ‘yung mga propaganda materials natin kahit na nakapaskil sa common poster area kailangan tama ang sukat, ‘yan ang common na violation masyadong malalaki ang inilalabas na posters ng mga kandidato, kailangan po ang sukat ay maximum ng 2 feet by 3 feet.” Ani Jimenez

Maging ang mga botante na hindi nakaboto noong 2016 elections ay binigyan ng paalala ni Jimenez.

Sakali anyang hindi sila makaboto ngayong barangay at SK elections ay tatanggalin na ang kanilang pangalan sa listahan ng mga botante.

“Magiging pilosopo lang ako ng konti, ang talagang pinakamabigat na konsekuwensya ng hindi pagboto eh syempre kumbaga wala kang input kung sino ang magiging leader mo sa barangay, mahirap ‘yan baka paggising mo kinabukasan barangay captain mo na pala ay ‘yung nakaaway mo, kailangan lumahok ka para may say ka rin.” Pahayag ni Jimenez

Pre-mature campaigning

Nakatali ang kamay ng Commission on Elections o COMELEC sa mga kandidatong sangkot sa maagang pangangampanya.

Sa kabila ito ng pagkumpirma ni Director James Jimenez, Spokesman ng COMELEC na marami na silang natatanggap na reklamo laban sa mga kandidato na nagsimula nang mangampanya bago pa ang pagsisimula ng campaign period sa araw na ito.

Ayon kay Jimenez, nagkaroon na noon pa ng desisyon sa isyung ito ang Korte Suprema.

(Ratsada Balita Interview)