HOT STORIES OF THE WEEK

Pinag-aaralan na ng grupo ni Magdalo Party-list Representative Gary Alejano ang panibagong paghahain ng impeachment complaint laban kay Pangulong Rodrigo Duterte.

Ayon kay Alejano, ang kanilang magiging batayan sa paghahain nito ay ang labis na pagpapabaya ni Pangulong Duterte hinggil sa usapin ng West Philippine Sea.

Giit ni Alejano, maituturing na isang “treason” ang kawalan ng aksyon dito ng Pangulo kahit tila may banta na ng pananakop ng China sa naturang isla.

Magugunitang noong nakaraang taon ay nabasura ang inihaing impeachment complaint ni Alejano laban sa Pangulo kaugnay sa serye ng patayan sa gitna ng kampanya kontra iligal na droga at sa mga umano’y hindi deklaradong yaman ng Pangulo.

Samantala, minaliit lang ng Malacañang ang plano ng grupo ni Magdalo Party-list Representative Gary Alejano na magsampa ng impeachment complaint laban kay Pangulong Rodrigo Duterte hinggil sa isyu ng West Philippine Sea.

Ayon kay Presidential Spokesperson Harry Roque, wala siyang nakikitang legal na basehan sa reklamo ni Alejano.

Inalala pa ni Roque ang noo’y pagkakabasura ng impeachment complaint na inihain din ng kongresista.

Gayunman sinabi ni Roque na karapatan ito ni Alejano kahit ilang beses pa niya ipa-impeach ang Pangulo.

Ngunit payo ni Roque dapat ang hinahabol ni Alejano ay ang mga kakampi nito nuong nakalipas na administrasyon na walang ginawa habang itinatayo ang mga artificial islands sa naturang teritoryo.

—-

Nakatakda nang tumulak patungong Philippine Rise si Pangulong Rodrigo Duterte mula Mayo 15 hanggang 16 o sa susunod na linggo.

Ito ang inihayag ng Malacañang bilang bahagi na rin ng unang anibersaryo ng paglagda ng Pangulo sa Executive Order 25 na nagpapalit sa pangalan ng Benham Rise sa Philippine Rise.

“The President will be commemorating the renaming of Benham Rise to Philippine Rise by visiting the Philippine Rise itself, and this is on May 15 to 16.”

Ayon kay Presidential Spokesman Harry Roque, may 50 mga Pinoy scientist din ang kanyang ipadadala sa undersea plateau o talampas sa ilalim ng karagatan para magsagawa ng pag-aaral sa naturang lugar.

“The event will be attended by 50 scientists whom the President will be sending off as they start their scientific researches in Philippine Rise.” Pahayag ni Roque

Nakapaloob ang Philippine Rise sa 200 nautical mile na Exclusive Economic Zone o EEZ ng Pilipinas na may kabuuang sukat na 13 ektarya kung saan, ginawaran ang Pilipinas ng sovereign rights sa ilalim ng United Nations Convention on the Law of the Sea.

—-

Ipinaubaya na ng Malacañang sa Ombudsman ang imbestigasyon kaugnay sa kontrobersiyal na 60 milyong pisong advertisement contract ng Department of Tourism o DOT sa programa ng mga kapatid ng nagbitiw na si Secretary Wanda Tulfo-Teo.

Ayon kay Presidential Spokesman Harry Roque, nasa Ombudsman na ngayon ang tutukoy kung meron o kung sino ang mga dapat managot sa nasabing advertisement deal.

Nilinaw din ni Roque na bagama’t isinauli na ng pamilya Tulfo ang 60 milyong piso, ay hindi ibig sabihin nito ay ligtas na sila sa mga posibleng pananagutan.

Ngunit ayon din kay Roque, hindi rin naman nangangahulugan na isang pag-amin o pagiging guilty ang ginawang pagbibitiw ni Teo.

Kaugnay nito, umaasa umano ang Malacañang ng isang mabilis at transparent na imbestigasyon mula sa Ombudsman.

—-

Kumpirmado na ang pagbibitiw sa puwesto ni Tourism Secretary Wanda Tulfo-Teo.

Ayon kay Atty. Ferdinand Topacio, abogado ni Teo, isinumite ng kalihim ang resignation letter nito kay Executive Secretary Salvador Medialdea bago pa man magsimula ang cabinet meeting sa Malacañang kahapon.

Iginiit ni Topacio, sariling desisyon ni Teo ang magbitiw sa puwesto at hindi ito hiniling ni Pangulong Rodrigo Duterte sa kanya.

Ang pasya aniya ng kalihim ay kasunod na rin ng mahaba at mahinahong pagninilay-nilay matapos ng kinasangkutang isyu sa pagbabayad ng 60 milyong piso ng Department of Tourism sa programa ng kapatid nito sa PTV-4.

Sa kanyang regular press briefing sa Malacañang, kinumpirma rin ni Presidential Spokesperson Harry Roque ang pagsusumite na ng resignation letter ni Teo matapos makatanggap ng confirmation text mula kay Medialdea.

Hindi naman masabi ni Roque kung tinanggap na ito ng Pangulo at kung may kaugnayan ito sa isinagawang imbestigasyon ng Office of the Executive Secretary.

Samantala, ipinauubaya naman ng Malacañang sa Ombudsman ang pagpapasiya kung kakasuhan si Teo kaugnay ng naturang kontrobersiya.

 (Photo Courtesy SAP Bong Go)

Binuweltahan ni Supreme Court Chief Justice on leave Maria Lourdes Sereno ang pinakamahigpit niyang kritiko na si Senior Associate Justice Teresita Leonardo de Castro.

Ito’y kasunod ng mga akusasyon kay Sereno bilang mahistrado na may pinakamalaking ginastos at may pinakamaluhong biyahe sa panahon ng kaniyang panunungkulan sa High Tribunal.

Tahasang inakusahan ni Sereno si De Castro bilang mahistrado na may pinakamaraming biyahe sa lahat ng mga mahistrado na nagkakahalaga ng milyun-milyong piso.

Ayon kay Sereno, labinlimang beses bumiyahe si De Castro sa iba’t ibang bansa sa loob ng limang taon nito bilang mahistrado ng Supreme Court subalit aminado siyang aprubado naman ito ng En Banc.

Karamihan sa mga naging biyahe ni De Castro ay dahil sa pagiging Pangulo nito ng International Association of Women Judges mula taong 2014 hanggang 2016.

Samantala inendorso ni Retired Associate Justice Arturo Brion si De Castro para maging nominado sa Office of the Ombudsman kapalit ni Conchita Carpio-Morales na nakatakda nang magretiro sa buwan ng Hulyo.

Ayon kay Brion, kuwalipikado si De Castro para sa naturang posisyon dahil napatunayan na nito ang kaniyang kakayahan at integridad sa mahigit isang dekada nito sa hudikatura.

Magugunitang naging laman ng balita si De Castro nang tumestigo ito laban kay Sereno sa pagdinig ng House Committee on Justice nang talakayin dito ang impeachment case laban sa Punong Mahistrado.

—-

Nakatakda nang pagbotohan ng mga mahistrado ng Korte Suprema ang quo warranto petition na inihain ng Solicitor General laban kay Chief Justice on leave Maria Lourdes Sereno sa Biyernes, Mayo 11.

Pero ayon sa isang source ng DWIZ, posilbeng siyam na mahistrado ang bumoto pabor, tatlo ang tutol at dalawa ang mag-abstain sa naturang petisyon.

Ito’y dahil umano sa paniniwalang nabigo si Sereno na isumite sa Judicial and Bar Council o JBC ang mga kinakailangang bilang ng kanyang Statements of Assets, Liabilities and Networth o SALN noong siya’y aplikante pa lamang sa naturang posisyon.

Subalit apela ni Supreme Court Spokesman Atty. Theodore Te sa publiko, hintayin ang magiging hatol ng mga mahistrado kay Sereno at iwasan ang paglikha ng samu’t saring ispekulasyon sa isyu.

Kasunod nito, patuloy na nagkakampo sa harap ng Korte Suprema sa Maynila ang mga tagasuporta gayundin ang mga kritiko ng nakabakasyong Chief Justice.

Pinangunahan ni DWIZ anchor at WCC o Citizen’s Crime Watch Legal Committee Chairman Atty. Ferdinand Topacio ang grupo ng mga kontra Sereno at ipinanawagan ang pagbibitiw nito sa puwesto sa ngalan ng delicadeza.

Pero panawagan naman ni Manila Auxillary Bishop Broderick Pabillo na sumusuporta kay Sereno, dapat igiit ng publiko ang paninindigan nito laban sa mga mahistrado ng High Tribunal na ginagamit ang kanilang kapangyarihan para paglaruan ang batas.

 (Ulat ni Bert Mozo)

All systems go na ang Philippine National Police para sa Barangay at Sangguniang Kabataan elections.

Ayon kay PNP Chief Dir. Gen. Oscar Albayalde, pinagana na nila ang “task force safe election 2018” upang matiyak na ligtas ang halalan sa Mayo 14.

Bubuuin ito ng 70 hanggang 80% ng pwersa ng PNP ang maagang idedeploy sa bawat polling precincts.

Bukod sa task force safe ay may binuo pang special operation task group ang police regional office-5 para tutukan naman ang halalan sa Masbate kung saan may kasaysayan ng madugong eleksyon at may presensya ng mga armadong grupo.

“Dito sa safe 2018 ng poll elections, dapat merong mga nakadeploy na eksaktong pangalan atsaka yung kanilang mga cellphone numbers so that in any emergency, pwede natin silang matawagan in a specific police center”.