HOT STORIES OF THE WEEK

Nagpadala ng military aircraft ang China sa isa nitong artificial island sa Zamora o Subi Reef sa West Philippine Sea.

Batay ito sa nakuhang satellite imagery ng Asia Maritime Transparency Initiative sa Washington.

Sa ulat ng AMTI, nakapagpadala na rin anila ng military aircraft ang China sa dalawa pa nitong mga ginawang naval and air base sa Kagitingan o Fiery Cross at Panganiban Reefs.

Bukod pa anila ito sa na-monitor na 15 barkong pandigma ng China na naglayag at dumaong sa mga nasabing bahura na tila bahagi ng kanilang military rotational deployment.

Una nang naiulat ang paglalagay ng missile system at radar jamming ng China sa mga artificial bases nito na mas nagpa-init pa sa usapin ng militarization activity ng nasabing bansa sa West Philippine Sea.

(Photo published by the Asia Maritime Transparency Initiative)

Bumaba ang net satisfaction rating ni Pangulong Rodrigo Duterte sa unang tatlong buwan ng 2018.

Batay ito sa isinagawang survey ng Social Weather Stations o SWS ngayong Marso kung saan nakakuha ang Pangulo ng plus 58 o gradong ‘very good’.

Mas mababa ito sa plus 70 rating o excellent grade na nakuha nito noong Disyembre.

Sa survey ng SWS, 69% ng mga adult Filipino ang nagsabing kuntento sila sa performance ng pamahalaan habang 11 porsyento naman ang hindi kuntento at 18 prosyento ang undecided.

Nakita naman ang malaking pagbaba ng rating ng Pangulo mula 71 points o excellent sa 58 point o very good sa Metro Manila.

Nanatili naman sa very good ang net satisfaction rating ni Pangulong Duterte sa balance Luzon at Visayas habang excellent pa rin sa Mindanao.

Isinagawa ang survey mula Marso 23 hanggang 27 sa may 1,200 adult Filipino.

—-

Lumago sa 6.8 percent ang gross domestic product o GDP ng bansa sa unang tatlong buwan ng 2018.

Mas mataas ito sa naitalang 6.5 percent GDP sa parehong panahon noong 2017.

Pinakamalaking kontribusyon sa paglago ng ekonomiya ang industry sector na nagtala ng halos walong porsyentong paglago, ang sektor ng serbisyo na nagtala ng 7% at sektor ng agrikultura, 1.5 percent.

Ayon kay Socio Economic Planning Secretary Ernesto Pernia, kung hindi dahil sa mataas na inflation rate, posibleng naabot sana ang target nilang pito hanggang walong porsyentong paglago ng ekonomiya ngayong unang bahagi ng 2018.

Sa kabila nito, ipinagmalaki ni Pernia na nananatiling isa ang ekonomiya ng Pilipinas sa pinakamabilis na lumago sa rehiyon.

Kasunod aniya ang Pilipinas ng Vietnam na may 7.4 percent, kapantay lamang ng China at mas mataas sa Indonesia na may 5.1 percent.

—-

Sasabayan ng kilos protesta ng mga tagasuporta ni Chief Justice Maria Lourdes Sereno ang special en banc meeting ng Korte Suprema bukas, Mayo 11.

Unang napaulat na pagbobotohan na ng mga mahistrado ng Korte Suprema sa special en banc meeting ang quo warranto petition laban kay Sereno.

Isang Jericho March ang planong isagawa ng mga supporters ni Sereno.

Ang Jericho March ay pagmartsa na may kasamang pagdarasal na nasasalig sa Bibliya.

Ipapanawagan ng Coalition for Justice sa Korte Suprema ang pagbasura sa quo warranto petition at igigiit na tanging impeachment ang paraan upang matanggal sa puwesto ang isang Chief Justice.

—-

Nakatakdang lagdaan bukas, Mayo 11, ang memorandum of agreement sa pagitan ng Pilipinas at Kuwait kaugnay sa pagbibigay ng proteksyon sa mga Overseas Filipino Workers o OFWs sa naturang bansa.

Ito ang inihayag ni Labor Secretary Silvestre Bello III sa press briefing sa Philippine Embassy sa Kuwait bilang bunga ng matagumpay nilang pakikipagpulong sa mga opisyal sa nasabing bansa kasama si Presidential Spokesman Harry Roque.

Bukod sa magaganap na pirmahan ng MOA, sinabi naman ni Roque na pumayag din ang Kuwait na bumuo ng grupo ng mga awtoridad kung saan maaaring humingi ng tulong ang embahada ng Pilipinas bente kwatro oras sakaling may magpasaklolong mga OFW.

Sinaksihan din ng delegasyon ng mga opisyal ang pagpapalaya sa apat na drivers ng embahada na inaresto ng mga pulis sa Kuwait matapos ang kontrobersiyal na pag-rescue ng mga ito sa mga distressed OFW noong nakaraang buwan.

Magugunitang tumulak patungong Kuwait noong Martes sina Roque, Bello at iba pang opisyal matapos utusan ni Pangulong Rodrigo Duterte na ayusin ang gusot doon.

—-

Nanganganib na masibak ang isa na namang opisyal ng pamahalaan dahil pa rin sa usapin ng katiwalian.

Iyan ang ipinahiwatig muli ni Pangulong Rodrigo Duterte nang pangunahan nito ang presentasyon ng mga bagong pananalapi sa Malacañang kahapon.

“There’s another one coming up.”

Bagama’t hindi tinukoy ng Pangulo kung sinong opisyal ang kaniyang sisibakin, sinabi nito na dahil aniya iyon sa madalas na pagbiyahe.

Magugunitang pinaiimbestigahan ng Pangulo si PhilHealth Interim President at Officer-in-Charge Celestina Dela Serna dahil umano sa madalas na pagbiyahe, pananatili sa mamahaling hotel at sobra-sobrang allowance.

Sinabi ng Pangulo, matatanggap lamang niya ang pagbiyahe ng mga opisyal kung may maibubungang maganda para sa bansa ang mga dadaluhan nilang mga pagpupulong sa loob man o labas ng bansa.

“You know, if you go to other places to attend important meetings that would affect the country, I would appreciate it.” Pahayag ni Pangulong Duterte

—-

Balik-trabaho na ngayong araw si Supreme Court Chief Justice Maria Lourdes Sereno matapos ng mahigit dalawang buwang pagbabakasyon.

Batay sa source ng DWIZ sa Korte Suprema, dakong alas-7:30 nang dumating si Sereno sa Korte Suprema para mag-report sa trabaho.

Tumawag rin umano si Sereno kay acting Chief Justice Antonio Carpio kaninang umaga at nagpa-abisong magrereport na sa siya sa trabaho.

Ang pagbabalik-trabaho ni Sereno ay nangyari dalawang araw bago ang nakatakdang botohan ng mga mahistrado ng Korte Suprema ang quo warranto petisyon na inihain ni Solicitor General Jose Calida sa Punong Mahistrado.

Samantala, dakong alas-10:40 naman ng lumabas si Sereno ng kanyang tanggapan para magpakita at kumaway sa kanyang mga tagasuporta na nasa labas ng Korte Suprema.

 (Ulat ni Bert Mozo)