HOT STORIES OF THE WEEK

Muling ipinaalala ng Catholic Bishops’ Conference of the Philippines o CBCP ang sampung utos sa tamang pagboto ngayong barangay at Sangguniang Kabataan o SK elections.

Ayon sa CBCP, mahalaga ito upang maging gabay ng mga botante para sa isang makabuluhan at makatotohanang halalan sa mga barangay.

Unang dapat isaalang-alang ng botante ang isang kandidatong may takot sa Diyos at hindi kailanman iniaalis ang sarili sa pananampalataya.

Ikalawa, hindi dapat ginagamit ng mga kandidato ang pangalan ng Diyos o nagbibitaw ng mga salitang tumutuligsa sa pangalan ng Diyos.

Ikatlo, maliban sa paggalang sa araw ng pagsamba sa Diyos, dapat isinasabuhay din ng kandidato ang pagtulong sa kapwa na siyang tunay na misyon ng isang Kristiyano anuman ang kanyang pananampalataya.

Ika-apat, dapat maging mabuting halimbawa ang isang kandidato at hindi kaanib ng political dynasty upang masupil ang monopolya sa gobyerno.

Ika-lima, dapat maging malinaw sa botante ang paninindigan ng isang kandidato sa pangangalaga ng buhay, hindi pumapatay at lalong hindi sumusuporta sa anumang hakbang na makapamiminsala sa buhay.

Ika-anim, dapat suriin ang paninindigan ng isang kandidato sa usapin ng kasal, diborsyo at kasarian.

Ika-pito, huwag iboto ang mga kandidatong may tatak na sa pagnanakaw sa halip, dapat hanapin ang isang may kakayahang sugpuin ang katiwalian sa pamahalaan.

Ika-walo, huwag iboto ang mga kandidatong sinungaling at mambobola o iyong mga magaling sa pagyayabang o pagpalusot para lamang makaakit ng boto.

Ika-siyam, dapat tingnan kung ang isang kandidato ay namumuhay sa isang masayang pamilya at hindi nasasangkot sa iba’t ibang uri ng iskandalo hinggil sa pakikipagrelasyon o pagpapamilya.

At panghuli, dapat tingnan ang mga kandidatong hindi naninira ng kapwa kandidato, kayang tumanggap ng pagkatalo at handang maging solusyon sa halip na makadagdag sa problema.

—-

Nakatakdang irekomenda ni Department of Labor and Employment o DOLE Secretary Silvestre Bello III ang partial lifting ng deployment ban sa Kuwait.

Ito’y ayon kay Bello makaraang magbalik normal nang muli ang relasyon ng dalawang bansa nang ganap nang maselyuhan ang memorandum of understanding o MOU na magbibigay proteksyon sa mga OFW o Overseas Filipino Workers sa nasabing bansa.

Magugunitang sabay na umuwi sa bansa kahapon sina Bello at Presidential Spokesman Harry Roque kasama ang may 87 distressed OFW, madaling araw kahapon.

Gayunman, nilinaw ni Roque na ang partial lifting ng deployment ban ay para lamang sa mga skilled at professional workers habang pag-aaralan pa kung tatanggalin na rin ang ban sa pagpapadala ng mga household service workers.

Subalit batay sa ulat ng ilang pahayagan, inihayag umano ni Presidential Spokesman Harry Roque na lifted na ang ban para sa pagpapadala ng mga skilled at professional workers sa bansang Kuwait.

Batay sa talaan ng DOLE, 60 porsyento ng humigit kumulang 260,000 documented OFWs sa Kuwait ay pawang mga household service workers sa nabanggit na bansa.

Magugunitang mismong si Pangulong Rodrigo Duterte na ang nagsabi sa kaniyang pagbisita sa Marawi noong Biyernes na pabor siyang tanggalin ang deployment ban sa Kuwait basta’t masusunod lahat ng inilatag nilang kondisyon.

—-

Posible ring ipagharap ng quo warranto petition ang Pangulo at Pangalawang Pangulo kung sila’y mapatutunayang nagpabaya o naging taksil sa sambayanang Pilipino.

Iyan ang ipinaliwanag ng Korte Suprema sa naging desisyon nito na paboran ang inihaing petisyon laban naman sa napatalsik sa Chief Justice na si Maria Lourdes Sereno.

Nakasaad sa desisyong pinonente ni Associate Justice Noel Tijam, may kapangyarihan ang Presidential Electoral Tribunal o PET na ideklarang void o walang bisa ang pagkakaluklok sa Pangulo at Pangalawang Pangulo kung ihahain ito sa loob ng sampung araw mula nang sila’y maiproklama.

Sa kabilang dako, posible ring mapasailalim ang mga naturang grounds bilang other high crimes na maaari namang gamitin bilang impeachable offense sa ilalim ng batas.

Samantala, tiniyak ng constitutionalist at dean ng San Beda Graduate School of Law na si Fr. Ranhilio Aquino na walang dapat ikabahala si Vice President Leni Robredo.

Ito’y kung mapatutunayan walang nilabag na batas si Robredo sa inihaing electoral protest ni dating Senador Ferdinand ‘Bongbong’ Marcos Jr. na isa ring uri ng quo warranto case.

—-

Ia-apela ng kampo ni Ma. Lourdes Sereno ang desisyon ng Korte Suprema na pagbigyan ang quo warranto petition na nagpapawalang bisa sa kanyang ‘appointment’ bilang punong mahistrado.

Ayon kay Atty. Carlo Cruz, tagapagsalita ni Sereno, maghahain sila ng Motion for Reconsideration o MOR sa desisyon na umano’y nagtakda ng ‘precedent’ para sa pagpapatalsik sa mga impeachable officials.

Giit pa ni Cruz, nagsimula ang pagpapatalsik kay Sereno nang labanan nito ang madugong war on drugs ni Pangulong Rodrigo Duterte.

Gayunman, umaasa ang kampo ni Sereno na mababaliktad pa rin ang desisyon lalo pa’t naging dikit ang botohan sa bilang na 8 – 6.

Pirmado na ng Pilipinas at  Kuwait ang Memorandum of Agreement para sa proteksyon ng mga Overseas Filipino Worker sa nasabing Gulf State.

Nilagdaan nina Foreign Affairs Secretary Alan Cayetano at Kuwaiti Deputy Prime Minister at Foreign Minister Sheikh Sabah Khalid Al Hamad Al Sabah ang kasunduan sa kanilang paghaharap sa Kuwait, kahapon.

Sinaksihan din nina Labor Secretary Silvestre Bello, Presidential Spokesman Harry Roque at Special Envoy to Kuwait Abdullah Mamao  ang paglagda sa MOA.

Magugunitang lumamig ang diplomatic relations ng dalawang bansa noong mga nakalipas na linggo dahil sa ilang insidente ng pang-aabuso o pagkamatay ng ilang OFW na nauwi sa deployment ban ng mga manggagawang Pinoy sa Kuwait.

Hindi na pagbibigyan pa ng Human Rights Victims’ Claims Board o HRVCB ang mga claimants na biktima ng martial law na magbabalak na umapela para mabayaran ng danyos o bayad pinsala.

Ayon kay Human Rights Victims’ Claims Board Chairperson Lina Sarmiento, hanggang ngayong araw na lamang, Mayo 11 ang kanilang trabaho at madi- dissolve na ang kanilang tanggapan.

“Nagsimula tayo February 2014, at ang sabi ng batas hanggang May 12, 2018 na lang kami, bukas, pero ang opisina natin hanggang ngayong na lang. Nagpapasalamat po tayo sa lahat ng suporta sa atin.” Ani Sarmiento

Sinabi ni Sarmiento na nasa 11,103 ang kabuuang bilang nang makatatanggap ng kompensasyon mula sa mahigit 70,000 claimants na nag-apply sa kanila.

“Karamihan naman ay kumpleto ng requirement pero ang pinag-uusapan ay ang laman ng requirements, ‘yun ang mahalaga. Nasa 75,000 (human rights victims) ang nag-apply at ang nakapasa ay 11,103.” Pahayag ni Sarmiento

Paghahati- hatian aniya ng mga ito ang sampung bilyong piso na sa narekober ng gobyerno ng Pilipinas mula sa secret Swiss bank deposits ng yumaong si dating Pangulong Ferdinand Marcos.

“Meron kaming mga dinesisyunan na 6,737 na mga appeals, ‘yung mga appeals na umabot ng hanggang nung Lunes ay dinesisyunan pa rin ng board,  after niyan no further appeals na po, hindi na po talaga.” Dagdag ni Sarmiento

(Balitang Todong Lakas Interview)